[19] Same 96

¹Dou sere vei Jiova ena sere vou! Me sere vei Jiova o vuravura kecega.

²Dou sere vei Jiova, vakacaucautaka na yacana; Kacivaka nai tukutuku vinaka ni Nona veivakabulai ena veisiga yadudua.

³Tukuna na Nona lagilagi vei ira na veivanua, Na Nona veivakurabuitaki vei ira na tamata.

⁴Sa levu o Jiova, me vakacerecerei vakalevu. Me rerevaki ena kedra maliwa na Kalou.

⁵Na matakau, sa kalou vei ira na tamata, Io, na Kalou sa bulia na lomalagi.

⁶Na vakarokoroko kei na vakaturaga sa tu ga e Matana, na qaqa kei na totoka sa tu ena Nona Vale Tabu.

⁷Dou solia vei Jiova, oi kemudou na Nona tamata, dou solia vei Jiova na lagilagi kei na kaukauwa.

⁸Dou solia vei Jiova na lagilagi sa ganita na Yacana, dou kauta mai nai soro ka lako mai ki na Nona loma ni bai.

⁹Dou lotu vei Jiova ena totoka ni Nona savasava tabu, me sautanini vua o vuravura taucoko.

¹⁰Tukuna vei ira na veimatanitu, "Sa veiliutaki o Jiova; sa vakadeitaki talega o vuravura, ena sega ni yavalati rawa; sa na lewai ira vakadodonu na tamata o Jiova."

¹¹Me reki o lomalagi, me marau o vuravura me rorogo mai na wasawasa, ena kena levu e taucoko;

¹²Me reki kecega na vanua kei na ka kece sa tu kina. Era na rekireki na veivunikau ni veikau ena matai Jiova.

¹³Ni sa lako tiko mai o Koya, ni sa lako tiko mai o Koya me lewai vuravura. Ena lewai vuravura ena dodonu Ena lewai ira na tamata ena dina.