[19] Same 95

¹Mo ni lako mai me da mai lagasere vei Jiova! Me da kaila ena reki ki vua na Vatudei ni noda vakabulai.

²Me da lako mai e Matana ena vakavinavinaka, Me da kaila ena reki vei Koya ena Same.

³Ni sai Jiova ga na Kalou Cecere, sa Tui cecere vei ira na viavia kalou.

⁴Sa tu e Ligana na vanua titobu kecega e vuravura; sa tu talega e Ligana na ulunivanua cecere kecega e vuravura.

⁵Sa Nona na wasawasa kecega, ni sa bulia ga o Koya; na Ligana sa bulia na vanua mamaca.

⁶Mo ni lako mai, me da mai lotu vua ka cuva sobu vua; me da mai cuva vei Jiova, o Koya sa buli keda.

⁷Ni sai Koya na noda Kalou, eda sa tamata ni Nona veiwere, ka sipi ena Ligana. Ni kua kevaka o sa via rogoca na domona:

⁸Kakua ni vakaukauwataka na yalomu, me vakataki ira na talaidredre, Me vaka na veisiga ni vakatovotovo ena vanua liwa.

⁹Ena gauna era sa via vakatovolei Au kina o ira na tamamuni, era sa vakadinadinataki Au, e dina ga ni ra sa raica na Noqu cakacaka.

¹⁰Ena vasagavulu na yabaki, Au sa rarawataki ira nai tabatamata oqo, Au a tukuna, 'O ira na tamata era sa lako sese ena yalodra, era sa sega ni kila na Noqu sala.'

¹¹Au sa bubului ena Noqu cudru, 'Era na sega ni curu kina Noqu i vakavakacegu.'"