[19] Same 94

¹I Jiova na Kalou, sa Nomuni na lewa ni veisausaumi, sa kilai yani na Kalou, o Koya sa Nona na veisausaumi!

²Mo Ni tucake, na Turaga ni Lewa kei vuravura; me ra sa totogitaki na dokadoka.

³I Jiova, me cava soti na kena dede, o ira na daucaka ca, me cava soti na kena dede ni nodra vakacola mua tiko?

⁴Era sa tukuna tiko nai tukutuku, ka vosataka na veivakacacani; o ira kece na daucaka ca era sa dau tukutukuni ira.

⁵I Jiova, era sa wasewasei ira vakalalai na Nomuni tamata, ka vakamavoataki ira na Nomuni votavota.

⁶E ra sa vakamatei na yada kei ira na vulagi, era sa labati na luve ni yali.

⁷E ra sa tukuna tiko ga, "O Jiova sa sega ni raica, se o koya na Kalou i Jekope me kila."

⁸Oi kemudou na tamata lialia ena kedra maliwa na tamata, mo dou kila, oi kemudou talega dou na qai vuku e ni naica?

⁹O Koya sa tea na daliga, me qai sega ni rogoca? O Koya sa bulia na mata, me qai sega ni raica?

¹⁰O Koya sa vakasalataka na matanitu, me qai sega ni vakadodonutaka? O Koya sa vakavulica na tamata me yalomatua?

¹¹O Jiova, sa kila na vakanananu ni tamata, ni ra sa ka wale.

¹²Sa kalouvinaka na tamata o ni sa vakasalataka Jiova, ka vakavulica mai na Nomuni vunau,

¹³Mo Ni solia kina vua na vakacegu ena veisiga ni rarawa, me yacova ni sa keli oti na qara me nodra na tamata ca.

¹⁴O Jiova ena sega ni biuti ira na Nona tamata, se guilecavi ira na Nona i votavota.

¹⁵Ia na lewa ena lesu vei ira na yalododonu, o ira sa dodonu sara ena yalodra era na muria.

¹⁶O cei me na tucake ena vukuqu vei ira na daucaka ca? O cei ena tucake ena vukuqu vei ira sa daucakava na ka vakasisila?

¹⁷Kevaka ga sa vukei au o Jiova, na yaloqu sa na tiko vakamalua.

¹⁸Kevaka me'u tukuna mada, "Au sa sika lutu," na Nomuni loloma, Jiova, sa na qai tauri au cake.

¹⁹Ena loma ni noqu lomaocaoca, na Nomuni veivakacegui sa vakamarautaka na yaloqu.

²⁰Me cakacaka yaco tiko beka na kaukauwa ni valavala ca, o koya sa vakasesea nai vakaro vinaka kecega ena nona veitokani kei iko?

²¹Era sa to vata ka bolea na Nona bula na yalododonu, ka vakacacani ira na dra sega ni cala.

²²Ia, o Jiova sa noqu i Sasabai, na noqu Kalou na vatudei ni noqu i Drodro.

²³O Koya, ena kauta mai vei ira na nodra cala, ka musuki ira laivi mai na nodra caka cala, o Jiova na noda Kalou, ena musuki ira tani.