[66] Vakatakila 19

¹Ni oti na veika oqo, au qai rogoca e dua na rorogo levu na domo ni mamaue nodra na lewe i lomalagi, era cavuta tiko, "Aleluya! Me ia vei Jiova na noda Kalou, na lagilagi na vakarokoroko kei na kaukauwa ni veivakabulai!

²"Ni Nona lewa e dina ka dodonu, ni sa cudruva o Koya me rusa na yalewa ka dautagane ena vuku ni nona vakacacani vuravura ena veibutakoci; ka sa saumi kina vei koya na nodra dra na i talai ni Kalou."

³Sega ni cegu nodra tukuna tiko, "Aleluya! Sa lako cake tikoga na kuvu ni nona kubou me sega ni mudu rawa!"

⁴O ira na qase lewe ruasagavulu ka va kei na va na ka bula, era cuva sobu ka vakarokoroko vua na Kalou ena Nona i tikotiko, era tukuna, "Emeni! Aleluya!"

⁵Sa qai dua na domo e rogo mai ena i tikotiko tabu, ka vaka, "Me vakacaucautaki na noda Kalou, vei kemudou na Nona tamata kei kemudou sa rerevaki Koya, vakatalega kina o ira na cecere kei ira sa lolovira!"

⁶Au sa rogoca e dua na rorogo, sa rorogo dina ni lewe levu na tamata, sa vaka na rogo ni lutu ni wai mai na savu kei na rogo ni kurukuru, era tukuna, "Aleluya! O Jiova na Kalou Kaukauwa sa vakatulewa tiko!

⁷"Meda reki ka mai marau vata me soli tikoga Vua me Nona na lagilagi, ni sa na yaco na vakawati ni Lami, na watina yalewa sa vakarautaki koya vinaka tu mai."

⁸Vua na watina yalewa ena daramaka mai nai sulu lineni matailalai, sa savasava ka serau, na lineni matailalai, sai vakaraitaki ni bula dodonu nodra na yalosavasava.

⁹Sa qai tukuna vei au o koya, Vola: "Sa kalouvinaka o ira era sa kacivi ki na vakayakavi ni vakawati ni Lami!" baci vosa tale vei au, me tukuna, "Oqo sara ga na vosa dina ni Kalou."

¹⁰Au sa cuva sobu sara ki yavana ka vakarokoroko vua. Ia sa qai vosa mai vei au, mo kakua ni cakava na ka oqori! Oi au na nomu i tokani, ka dua talega na wekamu ena vuku ni tukutuku vinaka. Mo qarava na Kalou! Na yalo ni parofisai sa dau kacivaka na i tukutuku kei Jisu.

¹¹Ia oqo au sa raici lomalagi ni sa dolavi tu, ka raica e dua na ose vulavula. O Koya e vodo toka e delana sa vakatokai o Yalodina ka Dina, ena Nona lewa dodonu e vakayacora kina Nona vakatulewa kei na vakayacoi valu.

¹²Na matana sa vaka na yameyame ni buka, ka daramaka tiko e uluna e levu nai sala vakaturaga. Sa volai tiko na yacana ka sega ni dua me kila, vakavo duadua ga o Koya.

¹³E dara tiko e dua nai ubi balavu ka toni sua oti tu ena dra, ka yacana Na Vosa ni Kalou.

¹⁴O ira na mataivalu mai lomalagi, ka ra daramaka tu na lineni matailalai, e vulavula ka savasava, era yadua na ose vulavula era vodo kina, era sa qai muri Koya tu.

¹⁵Sa lako tiko mai gusuna nai seleiwau gata, ka rawa kina Vua me valuta na veimatanitu. O Koya ena liutaki vuravura ena i titoko kaukamea. Ena vakasavasavataka na i keli waini ni cudru katakata ni Kalou Kaukauwa.

¹⁶E na Nona i ubi balavu kei na sagana, e dua na yaca e volai tiko kina, ka vaka oqo: NODRA TUI NA TUI KEI NA NODRA TURAGA NA TURAGA

¹⁷E dua na agilosi au raica ni tu ena matanisiga; sa kaci tiko ena domo levu, "Me tukuna vei ira kece na manumanu vuka ka ra vuka tiko e maliwa lala, me ra vakaroro vata mai, ka vakarau mai vakayagataka na nona vakayakavi na Kalou kaukauwa.

¹⁸"Dou na rawa ni mai kania kina na lewedra na tui, kei na lewedra na turaga ni valu, na lewedra na tamata qaqa, na lewe ni ose kei na lewedra na vodo tiko kina, kei na lewedra na tamata kecega, ira na bobula kei nai taukei, lewedra na kaukauwa kei na malumalumu,"

¹⁹Au a raica na manumanu, kei ira na tui kei vuravura, kei na kena mataivalu, ni ra sa duavata mai, mera na valuti Koya ka vodo tiko ena ose, kei na Nona mataivalu.

²⁰E a vesu na manumanu, kei ira na parofita vakailasu ka ra tokona tiko na manumanu ena vei vakatakilakila lasulasu, nona veivakacalai mera cuva kina vakatakarakara, kei na kena volai vei ira na i vakatakilakila ni manumanu. Oi rau ruarua oqo e rau na viritaki sobu bulabula, kina drano sa caudre ena yameyame ni bukawaqa kei na sulifure.

²¹O ira sa vo mai, era na qai mai mate ena i seleiwau ka lako tiko mai ena gusu i Koya, sa vodo tiko ena ose. Era na kana ka mamau ena lewedra na manumanu vuka.