[45] Roma 1

¹Oi au o Paula, nai talatala i Jisu Karisito, sa kacivi mei apositolo, ka tawasei me'u tukuna nai tukutuku vinaka ni Kalou.

²Ni sa yalataka sara tu mai liu o Koya, ena gusudra na Nona parofita, ka sa volai tu mai ena i Vola Tabu,

³Me baleti Koya na Luvena o Jisu Karisito na noda Turaga, ka mai sucu vakatamata mai na kawa i Tevita,

⁴E mai vakaraitaka ni o Koya na Luve ni Kalou, ena kaukauwa ni Yalo Tabu, ena Nona tucake mai na mate.

⁵Mai Vua keitou sa rawata kina na loloma kei na cakacaka vaka i Apositolo, me keitou tukuna kina vei ira na veimatanitu tani, me ra talairawarawa ka vakabauta na vosa ena Vukuna,

⁶Oi kemudou talega dou sa tiki tiko ni kaci oqo, ni dou sa digitaki oti vei Jisu Karisito;

⁷Vei kemudou mai Roma, oi kemudou na ka lomani vua na Kalou, na nona tamata digitaki me nomudou na loloma kei na vakacegu ni Kalou na Tamada kei na noda Turaga o Jisu Karisito.

⁸Taumada au vakavinavinaka vua na noqu Kalou, ena vuku i Jisu Karisito me baleti kemudou kecega, ena vuku ni nomudou vakabauta ni sa roboti vuravura taucoko na kena i tukutuku.

⁹Na noqu i vakadinadina na Kalou, au sega ni dau cegu ni masulaki kemudou ena vuku ni dredre dou dau sotava, ni'u sa qaravi Koya ena yaloqu dina, ena vuku ni tukutuku vinaka nei Koya na Luvena.

¹⁰Au sa dau kerea tiko, me dua na gauna vinaka me vakarautaka vei au ena nona lewa ga na Kalou, me'u rawa ni lako yani kina vei kemudou.

¹¹Au sa dau gadreva makawa sara tiko mai me'u raici kemudou, me'u vakatikora vei kemudou eso nai solisoli vakayalo, me rawa ni dou tauyavutaki vinaka kina.

¹²Ka me rawa talega ni veivakaukauwataki na nomudou vakabauta vei au, kei na noqu vakabauta vei kemudou.

¹³Au vinakata mo dou kila na veiwekani, ni sa noqui nakinaki makawa tiko mai me'u raici kemudou (ia au sa dau tarovi tiko me yacova mai oqo) Ni'u sa vinakata me'u tamusuka mai na vua ni nomudou cakacaka, me vakataki ira na veimatanitu tani.

¹⁴Oi au na tamata lewai vei ira na kai Kirisi kei ira na lewe ni veivanua wale, vei ira na vuku kei ira na sega ni vuku.

¹⁵Ni'u sa vinakata dina, me vaka ni'u sa vakarautaki au oti tu, me'u lako yani i Roma vei kemudou, ka vunautaka nai tukutuku vinaka.

¹⁶Au sa sega ni maduataka nai tukutuku vinaka I Karisito, ni sai koya oqo, na kaukauwa ni Kalou me veivakabulai vei ira kecega sa vakabauta, sa liu vei ira na Jiu kei ira talega na kai Kirisi.

¹⁷Ni sa vakaraitaki mai kina, na dodonu ni Kalou mai na vakabauta kina vakabauta; ni sa volai, "Na yalododonu ena bula ena vakabauta." Na Cudru Ni Kalou Vei Ira Na Sega Ni Dodonu

¹⁸Na nona cudru na Kalou sa vakatakilai mai lomalagi, me baleti ira na tamata sega ni savasava kei ira na sega ni dodonu,

¹⁹Era sa kila vinaka sara tu ga na dina ni Kalou, ni sa vakaraitaka oti vei ira na Kalou.

²⁰Ena sega ni dua na nodra i ulubale, ni Kalou sa vakaraitaka na Nona i valavala mai nai vakatekivu, ena veika e bulia kei na Nona kaukauwa va Kalou ena veika bula e raici rawa.

²¹O ira oqo era sa kila oti tu na Kalou, ka ra sega ni bau via vakarokorokotaki Koya me vaka ni sa Kalou, era sega ni via vakavinavinaka, na nodra vakasama era vakanananutaka tu ga na veika dukadukali, ka sa yaco kina me vakabutobutotaki ka lialia na nanuma ni lomadra.

²²Era via vakaraitaka tiko ni ra tamata vuku, sa qai tukuni ira tikoga mai na levu ni nodra lialia,

²³Ena nodra vakaisosomitaka na qaravi ni Kalou bula, ena nodra kauta mai na vatu kei na kau, me ra bulia kina na manumanu vuka, na manumanu yava i va, na manumanu qasi voli, kei na i vakatakarakara ni tamata.

²⁴O koya oqo, na Kalou sa qai solia vei ira na yalo, me ra sega ni kila na vinaka kei na ca kei na nodra sa cakava ga na dodomo ca ni yalodra, me vaka na ka era sa vinakata,

²⁵Era veisautaka na dina ni Kalou mai na ka lasulasu, era cuva ka qarava na ka sa buli, ka sa sega ni o Koya na Dauveibuli, o Koya sa dodonu me vakalagilagi ka sega ni mudu. Emeni.

²⁶Oqori na vuna, sa solia ga kina vei ira na Kalou, me ra sa cakava na veika vakasisila me vaka nodra gagadre. O ira na kena yalewa era sa domona tale na yalewa ka sega ni tagane.

²⁷O ira talega na tagane era sa besetaka na yalewa, era sa qai domona tale na tagane, me ra sa veiwatini ga vakatagane, o koya oqo sa saumi kina vei ira nai sau dodonu ni nodra i valavala.

²⁸Ia kevaka me ra sega ni via vakarokorokotaka tikoga na Kalou, na Kalou ena solia vei ira na vakasama cala, me ra cakava kina na veibasai ni bula vakatamata.

²⁹Me ra vakasinaiti tu ena veika dukadukali, na veibutakoci, na yalo e ca, na kocokoco, na veivakacacani, dauvuvu, daulaba, dauveiqati, dauveivakaisini, dauvakanananutaka na ca, dau vosa kudrukudru lo,

³⁰Me ra dauveikaseti, me ra sega ni taleitaka na Kalou, me ra i valavala kaukauwa, era dau dokadoka. Era dau viavialevu, era dau segata me yaco na tiko veicati, era dau talaidredre vei ira nodra i tubutubu,

³¹Sa sega vei ira na yalo ni vakatulewa vinaka, sa sega ni ra tamata me vakabauti, sa sega ni tu vei ira na yalo ni loloma, sa sega na veivosovosoti vei ira, sa yali ena nodra bula na veikawaitaki;

³²Ni ra sa kila vinaka na Nona lewa dodonu na Kalou, o ira kece era bulataka tiko nai valavala sa vakaoqo, nai totogi duadua ga ena vakayacori vei ira me vakamatei, era sega walega ni cakava, era vakauqeta na tamata me ra cakava talega.