[45] Roma 2

¹O koya oqo, sa sega ni qai dua na nomui ulubale, o iko na tamata, sa dau levu nomu veivakalewai, na nomu vakalewai koya o sa vakaleqai iko tikoga, ni tautauvata vinaka sara tikoga na ka drau cakava tiko.

²Ia eda kila na Nona lewa dodonu na Kalou, ena vakayacori vei ira na kitaka tiko na bula vakaoqori.

³O iko na tamata o nanuma beka ni Kalou ena lewai ira ga na tamata o ya, ka sega ni na ia na veilewai kei iko ni'o cakava tiko?

⁴Se o beca beka na Nona loloma levu, na Nona vosota vakadede, kei na Nona cudru vakamalua, ka o sega ni vakasamataka ni sa tuberi iko kina veivutuni na loloma ni Kalou?

⁵Ia o iko me vaka nomu yalokaukauwa kei na nomu lomaqa, o sa binia tikoga vei iko na cudruvi kina siga ni veicudruvi, ena vakaraitaka kina na Kalou Nona lewa dodonu,

⁶"Me na saumi kina vua na tamata nai sau ni nona i valavala.

⁷Na bula Sega ni mudu vei ira era kitaka tiko na loma ni Kalou, ka dau gadreva na vanua vakaiukuuku ka lagilagi e na vanua e sega kina na mate;

⁸Ia ena cudruvi ira vakararawa o ira era sega ni via muria nai vakavuvuli dina, ka muria lako ga nai vakavuvuli cala,

⁹Na veika rarawa kei na yaluma vei koya na tamata e caka ca, sa liu vei ira na Jiu ka vakatalega kina na kai matanitu tani.

¹⁰Ia ena vakaiukuukutaki, ka vakalagilagi ena kune vakacegu na tamata e caka vinaka tiko, e liu vei ira na Jiu ka muri vei ira na kai matanitu tani.

¹¹Na Kalou e sega ni dau veitovaki.

¹²O ira era i valavala ca ni sega na vunau, ia ni ra sa cakava era sa vesuki ira tikoga vakai ira, ka ra sega tiko ni kila,

¹³Ni o ira era dau rogoca walega na vunau era na sega ni dodonu ena mata ni Kalou, ia o ira ga era cakava era na vakadonui;

¹⁴O ira na kai matanitu tani era sega ni kila nai valavala ni vunau, ia ni ra sa cakava era sa vesuki ira tikoga vakai ira, ka ra sega tiko ni kila,

¹⁵Na nodra cakacaka e vakaraitaka ni sa volai tu e yalodra na vunau, ka sa vakadinadinataka talega na nodra lewa e loma, ena ka era cakava ni sa veicalati).

¹⁶Me vaka na dina ni noqu i tukutuku vinaka, ni na yaco na siga me na veilewaitaki ira kina na tamata, ena nodra bula i valavala ca na Kalou, e na vuku i Jisu Karisito.

¹⁷Kemudou na Jiu dina, dou bula tiko e nai vunau, ka dou dokadoka tiko ena vuku ni Kalou,

¹⁸Dou sa kila Nona lewa, dou sa rawa ni vakaduiduitaka talega na ka vinaka, mai na nomudou kila na vunau,

¹⁹Sa rawa ni dou vakadeitaka ni dou sa tubera kina na mataboko, ka dou sa rarama talega vei ira era tiko ena butobuto,

²⁰Mo dou dau ni veivakavulici vei ira na lecaika, mo dou nodra dauniveituberi na gone lalai, ni dou buta vinaka tu ena vunau, o koya nai yaloyalo ga ni ka dina kei na kila ka.

²¹Dou via vakavulici ira sara tiko na tamata, oi kemudou mada ga dou sega ni rawa ni vakavulici kemudou? Dou vunauca sara tiko na tamata me kakua ni butako, vakacava oi kemudou dou sega ni butako?

²²O ni cavuta, "Me kakua na veibutakoci," dou tarogi kemudou mada, dou sa cakava oti se sega? Dou cata tiko na matakau, dou sega beka ni butakoca tiko na yaya ni vale ni soro?

²³Sa dua na ka nomudou dokadokataka na nomudou kila tu na vunau ni Kalou, ia oi kemudou sara ga dou sega ni dokai Koya ena nomudou bula talaidredre?

²⁴Sa rauta me tukuna nai Vola Tabu, "Ni o ira na kai matanitu tani era vosa vakacacataka na Kalou," ka vakavuna oi kemudou.

²⁵Na cilivi e yaga kevaka me se maroroi tikoga na vunau; ia ni dou sa tawase tani mai ena vunau, na nomudou cilivi sa yaco me sega cili.

²⁶O koya oqo, kevaka me dua na sega cili me maroroya vinaka na bula ni vunau, e rawa ni da tukuna, o koya sa cilivi, ka dina mada ga ni se sega cili?

²⁷O koya oqo, o ira na sega cili era muria na vunau, era na vakalewai kemudou na maroroya tiko nai vola kei nai dusidusi ni vunau ka qai talaidredre tiko?

²⁸E sega ni o Jiu dina baleta ni o sucu ena kawa vaka Jiu, se nomu vakatakilakilataki iko ena yagomu;

²⁹Na Jiu dina o koya e qarava na Kalou ena yalona, ka sega ni via vakasaqara na Kalou, o koya e vakaraitaka na ka e caka ena yagona, o koya ga e veisau na yalona kei na nona vakasama.