[45] Roma 12

¹O koya oqo, au sa vakamamasu vei kemudou na veiwekani, ena vuku ni Nona loloma levu na Kalou, mo dou cabora na yagomudou mei madrali bula, me ka tabu, me rawa ni ciqoma na Kalou, ka me nomudou i soro vakayalo.

²Dou kakua ni vakatatamuria na bula vakavuravura, ia mo dou veisau ga ni sa vakavoui tiko na nomudou vakasama, ka mo dou kila kina na loma ni Kalou, sa yaga, ka vinaka, ka uasivi sara.

³Ena loloma sa soli mai vei au, au sa vosa yani kina vei kemuni taucoko, me kakua ni dua e nanuma ni o koya sa dua na ka, me vakasamataka vakayalomatua na cakacaka levu sa mai vakayacora na Kalou ena vuku ni vakabauta.

⁴Me vaka sa dua ga na yago, ka sa levu na kena veitikina, ia na veitikina kece oqori e duidui nai tavi era dui qarava.

⁵Oi keda eda duidui veitikina, ia eda sa dua ga na yagoi Karisito, ka veisemati vakavinaka na veitikina kecega.

⁶Sa solia vei keda nai solisoli e duidui me vaka na nona yalololoma vei keda, ka me da vakayagataka sara: Kevaka e dua sa parofisai, me da parofisai sara me vaka nai vakarau ni noda vakabauta;

⁷Kevaka nai solisoli ni dauveiqaravi, me da veiqaravi sara ena kena cecere; o koya sa dauveivakavulici, me veivakavulici sara vaka vinaka;

⁸Kevaka e dua sa dauvunau, mo raica ni nomu vunau me veivakayadrati ka veitaraicake; kevaka mo dausolisoli, mo dau soli ena yalo e galala; kevaka mo veiliutaki, mo qaseqase ka lewa matau; kei koya sa dauloloma vei ira na bikai, me cakava ena yalo e reki.

⁹Me ka dina na loloma, mo dou cata sara nai tovo ca. Mo dou kukuva matua na ka e vinaka.

¹⁰Mo dou veilomani vakai kemudou ena veilomani me vaka na veitacini, dou veiuasiviti ena veivakarokorokotaki;

¹¹Me kakua ni luluqa nomui tavi vakalotu vua na Turaga, mo gugumatua tikoga;

¹²Dou reki ena i nuinui, vosota na ka rarawa, ka dou masu tikotikoga.

¹³Dou vukei ira na vakaloloma tu ena i soqosoqo lotu, dau sureti ira na vulagi ena nomudou veivale.

¹⁴Dou vosa vakalouvinakataki ira sa vakacacani kemudou; dou vosa vakavinaka vei ira ka kakua ni rukaka.

¹⁵Dou reki vata kei ira sa reki, ka tagi vata kei ira sa tagi.

¹⁶Dou dau cakacaka vata ka lomavata, dou kakua ni dau via rogo, dou veitokani vata kei ira na sega ni rawa ka. Dou kakua ni via vaka vukuvukui kemudou.

¹⁷Me kakua ni dou sauma na ca ena ca. Na nomudou bula ga me rakorako ena matadra na tamata.

¹⁸Dou tovolea, me kua ni dua mo dou veivala vata, dou segata na tiko veisaututaki kei ira na tamata kecega.

¹⁹Oi kemudou na wekaqu lomani, dou kakua ni via sauma lesu na ca vei kemudou, ia mo dou laiva ga vua na Kalou; ni sa volai, "Sa Noqu i tavi Me'u na vala kina,Au na sauma lesu vei ira," sa tukuna na Turaga.

²⁰O koya oqo, "kevaka sa viakana na kemu meca, mo vakani koya; kevaka sa via gunu wai, mo vagunuvi koya ena wai; ni o sa cakava oqo, o sa binia tiko kina, ki na uluna na qilaiso sa waqa tu."

²¹Me kakua ni rawai iko na ca, ia mo rawai koya ena nomu gumatua taka na caka vinaka.