[45] Roma 11

¹Au sa qai taroga, sa sega ni qai via ciqomi ira Nona tamata na Kalou? E sega sara! Oi au talega na Isireli mai na kawa i Eparaama, ena yavusa i Penijamini.

²Na Kalou e sega ni biuti ira tani na Nona tamata, o ira sa digitaka e liu o Koya. Dou sa sega beka ni kila na ka e tukuna nai Vola Tabu baleti Ilaijia, na nona tukuni ira vakaca na Isireli vua na Kalou, ka vaka,

³"I Jiova, era sa vakamatei ira Nomuni parofita, era qai basubasuraka sobu na Nomuni cabocabo ni soro, oi au duadua ga sa vo tiko, era sa vakasaqarai au mera vakamatei au?"

⁴Ia na cava sa qai sauma mai vei koya na Kalou? "Au sa maroroya tiko me Noqu e lewe vitu na udolu na tamata, era sa sega ni cuva me tekiduru vei Peali."

⁵Sa tautauvata talega ena gauna oqo, e vo tiko e vica na Jiu era sa digitaki ena nona yalololoma na Kalou.

⁶Ia kevaka sa yaco ena vuku ni loloma, sa qai ka walega na cakacaka, ke sega sa na maumau ga na loloma, ia kevaka ena vuku ni cakacaka, sa qai ka walega na loloma; ke sega sa na maumau ga na cakacaka.

⁷Sa qai vaka oqo? Sa qai sega ni rawa me taura o ira na Isireli na ka era sasagataka tiko mai; Ia sa mai nodra na digitaki, e so vei ira se dredre tikoga me raica na dina oqo.

⁸Me vaka na ka sa volai: "Na Kalou sa solia vei ira na yalo ni moce, kei na mata me kua ni raica rawa kei na daliga me kua ni rogoca rawa, me yacova mai na siga ni kua."

⁹Sa tukuna talega o Tevita na ka vaka oqo: "Na nodra teveli ga ni kana mera vakawelei kina ka coriti, mei tatao vei ira ena nodra raica na ka vinaka.

¹⁰Me vakabutobutotaki na matadra me kakua kina ni dua na ka mera raica rawa, ka me vakalairoro tu ga na bula ena vuku ni colacola bibi." E Sega Ni Ka E Tudei Na Sega Ni Ciqomi Na Isireli

¹¹Au sa qai taroga, era tarabe mera bale kina? E sega sara! Ia me rawa ni ra vakabulai kina na kai matanitu tani, ka me vakacudrui ira mera yalovuvu.

¹²Oqo kevaka sa mai vutuniyau o vuravura taucoko ena vuku ni nodra sa mai bale sobu, na nodra malumalumu sa vuni qaqa vei ira na kai matanitu tani, e na duatani tale nai rairai ni bula ena kena uasivi cake, kevaka mera sa kila na dina o ira na Jiu!

¹³Au vosa tiko vei kemudou na kai matanitu tani; ni'u sai apositolo vei ira na kai matanitu tani, au rui doka vakalevu na cakacaka au sa lesi kina.

¹⁴Au vinakata me'u vosa tonotonomata vei ira na wekaqu, me rawa kina me'u solia vei ira na yalo ni vuvu, me so vei ira me vakabulai mai.

¹⁵Na nodra sa biu tani e yaco kina na veivinakati vei ira na kai vuravura, ni ra sa na ciqomi tale, ena vaka beka na tamata sa bula tale mai na mate?

¹⁶Kevaka sa ka tabu o ira na tamada, era tekivuna mai, sa dodonu me ka tabu talega oi keda na luvena, me vaka na bulabula ni wakana ena bulabula talega vaka kina na veitabana.

¹⁷Ia kevaka sa musuki sobu eso na tabana, o iko na taba ni olive ni veikau, o qai mai sema vata kei ira, mo na vakaivotavota talega ena nona veivakalouvinakataki na Kalou.

¹⁸Mo kakua ni viavialevu ni o sa mai sema mo tabana, mo beca kina na vei tabana tale eso, ia kevaka o viavialevu, nanuma, o iko o sega ni vuni kaukauwa ni wakana, na nomu bula e vakatau tiko mai ena wakana.

¹⁹O na rawa ni tukuna, "Sa musuki sobu na veitabana, me'u rawa ni mai sema kina ka vakalouvinakataki."

²⁰E dina oqori. Era musuki laivi baleta na nodra sega ni vakabauta, ia o iko sa mai dei ena vuku ni vakabauta, mo kakua ni dokadoka, mo vakamalumalumutaki iko, ka rere tiko.

²¹Kevaka sa sega ni vosoti ira na veitabana dina na Kalou, ena sega ni dua na kena dredre Vua me cakava talega vei iko.

²²O koya oqo mo qai raica vakavuku na loloma kei na cudru ni Kalou: Na nona cudru vei ira na sega ni tudei; ia na yalololoma ni Kalou, vei iko ni o tudei tiko Vua, ke sega o na tautauvata talega kei ira sa musuki laivi.

²³O ira talega na Jiu, kevaka mera biuta tani na sega vakabauta, na Kalou ena veisematitaki ira tale kina vuna dina, e sega ni dua na ka me dredre vua na Kalou.

²⁴Kevaka sa rawa vua na Kalou, me musuki iko tani mai ena vuni olive ni veikau o a tu mai kina, me qai mai semati iko kina vuni olive dina sa samaki vinaka tu, ena rawa talega vua na Kalou me semati ira tale na Jiu kina vuna dina, ni ra a tabana dina tu ga e liu?

²⁵Au vinakata na veiwekani, mo dou kila tiko na ka vuni oqo, ka dou raica tiko vakavuku, ena so vei ira na Isireli era na vakayaloqa tiko, ka vakavo ga kevaka mo ni lesu taucoko mai na kai matanitu tani.

²⁶Era na qai vakabulai taucoko kina na Isireli, me vaka na ka sa volai: "Ena lako mai Saioni o Koya nai Vakabula, ena qai mai veisautaki ira na Jekope mai na nodra i tovo ca,

²⁷Ni sa Noqu veiyalayalati oqo vei ira, Ni'u na kauta tani na nodra I valavala ca."

²⁸Ena kosipeli era sa meca vua na Kalou era cata, ia sa vuni nomudou vinaka, ia na Kalou se lomani ira tikoga, ena vuku ni nona vosa yalayala mai vei ira nodra qase.

²⁹Ena sega ni rawa me veisautaki tale nai solisoli kei na veikacivi ni Kalou.

³⁰Oi kemudou dou a sega vakabauta tu na Kalou e liu, ia oqo, dou sa mai lomani ena vuku ni nodra sega vakabauta,

³¹Ia era se sega vakabauta tikoga oqo, oi kemudou sa mai lomani, na loloma oqo era na lomani talega kina.

³²Ni Kalou e vakayacora taucoko vei ira na tamata mera talaidredre, me rawa ni yalololoma vei ira kecega na tamata.

³³Sa dua na ka, na titobu ni Nona vuku kei na Nona rai yawa na Kalou! Sa dredre sara me da kila rawa na Nona lewa kei na sala e dau muria!

³⁴"O cei e rawa ni kila na vakanananu ni Kalou? Se dua e rawa me vakavulici Koya?

³⁵Se o cei me solia taumada Vua, me na qai sega ni saumi tale vei koya.

³⁶Ni ka kecega sa vakavuna o Koya, ena Vukuna duadua ga, ka me kilai kina na Nona kaukauwa, me vakarokorokotaki tikoga o Koya ka sega ni mudu. Emeni.