[45] Roma 10

¹Kemudou na veiwekani, sa luvuci vakaidina na yaloqu ena vukudra na Isireli, au sa masu kina vua na Kalou mera vakabulai.

²Ni'u sa kila ni sa dua na ka, na levu ni nodra lomakatakata tiko vua na Kalou, ia sa sega ga ni tiko vei ira na yalomatua.

³Ni ra sa sega ni kila na veivakadonui sa vakayacora na Kalou, ia era sa sasaga tikoga vagumatua me ra caka vinaka vua na Kalou, ena nodra maroroya vinaka na vunau mera vakadonui kina.

⁴Era sega ni kila na ka kece me baleta na vunau sa mai vakaotia vakadua na Karisito, na veivakadonui mai vua na Kalou e yaco ni sa vakabauti na Luvena.

⁵Sa tukuna oti mai o Mosese na veivakadonui sa yaco ena vuku ni vunau, "Na tamata e cakacakataka me vakadonui kina me bula tiko kina."

⁶Ia na veivakadonui sa rawa ena vuku ni vakabauta sa vakaoqo, "Mo kakua ni tukuna e yalomu, o cei me na lako cake ki lomalagi?" (ka me kauti Karisito sobu mai)

⁷Se, "O cei me na lako ena vanua sa nodra na mate?" (ka me, vakaturi Karisito cake mai na mate)

⁸Ia na cava sa tukuni? "Sa volekati iko sara tu ga na vosa, sa toka sara ga ena gusumu ka tiko sara e yalomu" (Oqori na vosa ni vakabauta, o koya keitou sa vunautaka)

⁹O ya kevaka mo vakatusa ena gusumu na Turaga o Jisu, ka vakadinata mai na vu ni yalomu ni sa vakaturi Koya cake tale mai na mate na Kalou, o na qai bula.

¹⁰Ni sa vakadinata na tamata mai na vuni yalona ena vakadonui kina, ni sa vakatusa ena gusuna ena vakabulai kina.

¹¹Ni sa tukuna nai Vola Tabu, "Ena sega ni rawa me vakamaduataki o koya sa vakabauti Karisito."

¹²E ke e sega ni vakaduiduitaka na Jiu se kai matanitu tani, ni dua ga na Turaga era qarava vata, o Koya e vakarorogo tu ena nodra masu me sova vakayauyau vei ira, ke vaka me ra masuti koya.

¹³Ni, "O koya ga e masuta na yacai Jiova ena vakabulai."

¹⁴Ena rawa vakacava mera masuti Koya, ni ra sega tu mada ga ni vakabauti Koya? Ena qai rawa vakacava mera vakabauti Koya, ni ra se bera tu mada ga ni se rogoci Koya? Ena rawa vakacava mera rogoca kevaka e sega ni dua me vunautaka?

¹⁵Ena rawa vakacava me dua me la'ki vunautaka vei ira, kevaka e sega na veitokoni ena nona talai? Ni sa volai: "Sa ka talei vakaidina na yavadra era sa kauta na kosipeli ni veika vinaka!"

¹⁶Ia era sega ni via rogoca taucoko na kosipeli, ni sa tukuna o Aisea, "I Jiova o cei sa vakabauta na neitou i tukutuku?"

¹⁷Ni vakabauta sa rawa ena ka eda rogoca, na ka eda rogoca mai na vosa ni Kalou.

¹⁸Ia au qai taroga, era sa rogoca oti beka na vosa ni Kalou? Io era sa rogoca oti: "Ni sa rogoci na vosa mai na veivanua taucoko e vuravura, na vosa ni Kalou sa tukuni taucoko me yacova nai yalayala kei vuravura."

¹⁹Ia au qai taroga tale, o ira na Isireli era sega tiko beka ni kila? Ni a tukuna taumada o Mosese: Na Kalou ena solia vei kemudou na yalo e vuvu ena vukudra na kai tani, ena solia vei kemudou na yalocudrucudru, ena vukudra na veimatanitu lecaika,

²⁰Ia sa qai tukuna vakadoudou o Aisea: "Era sa kunei Au o ira era a sega ni vakasaqarai Au; Au vakaraitaki Au vei ira era sega sara ga ni via kilai Au."

²¹Ia sa tukuni ira na Isireli, ka sa vakaoqo: "Ena veisiga kecega ka'u sa dodoka yani na Ligaqu, ki vei ira na tamata dau talaidredre ka dauvakatitiqa."