[45] Roma 9

¹Au tukuna oqo ena matai Karisito e dua na ka dina, au sega ni lasu tiko, sa vakadinadina talega vei au na noqu lewa e loma na Yalo Tabu,

²Au sa rarawa sara vakalevu ka vutugu na yaloqu.

³Ni ka'u sa daugadreva me'u tawase tani vei Karisito e na vukudra na wekaqu, o ira era sa wekaqu dina vakayago,

⁴Oqo o ira na Isireli, na luve ni Kalou, era sa vakaiukuukutaki, era gone ni veiyalayalati, sa soli vei ira na vunau, era kila na bula ni vunau, era kila na ka sa yalataki;

⁵Na nomuni qase oi ratou na patereaki e drodro mai kina na kawa ka mai basika kina na Karisito, ka sa tu vua na lewa kecega, ka me nona kina na Kalou na vakarokoroko me sega ni mudu. Emeni.

⁶E vaka me sega ni vakayaco ka na vosa ni Kalou. Ni so vei ira na Isireli e sega ni Isireli dina,

⁷E sega, ni kawa kecega i Eparaama o ira na Isireli, Ia, "O Aisake ga na nomu kawa ena vakatokai kina."

⁸E kenai balebale ni sega ni luvei Eparaama kece me vakatokai me luve ni Kalou; ia o koya ga na luve i Eparaama ka yalataki, oqo na nona kawa dina.

⁹Ni sa vakaoqo na vosa yalayala ni Kalou: "Ena gauna vakaoqo Au na lako mai, me na sucu vei Sera e dua na gonetagane".

¹⁰E sega ni koya walega o ya, o Repeka e vakasucuma e rua na gone mai na dua na tagane, sai koya oqori na tamada o Aisake.

¹¹E dina ni se bera ni rau sucu mai me rau cakava na ka ca se na ka vinaka, ia nai naki ni Kalou sa davo oti tu ena i vakarau ni Nona veidigitaki, ka sega ni vakatau tiko mai ena cakacaka, ia ena Nona veikacivi ga.

¹²Sa tukuna oti vua na Kalou, "O koya na qase (Iso) ena qaravi koya sa gone (Jekope)"

¹³Me vaka na ka sa volai, "Au sa lomani Jekope, ia Au sega ni taleitaki Iso."

¹⁴Cava me da na tukuna? Na Kalou beka sa sega ni dodonu? E sega sara!

¹⁵E tukuna vei Mosese, "Au na lomani koya ka'u sa lomana, Ia ka'u na yalovinaka vua ka'u sa yalovinaka kina."

¹⁶Na veivakalouvinakataki ni Kalou e sega ni soli ki vua e dua e vinakata me cakacakataka me rawa ni qai taukena, ia e solia sara ga na Kalou ena nona lomana na tamata.

¹⁷Ni cavuta nai Vola Tabu vei Fero, "Ena vuku ni ka oqo Ka'u sa vakaturi iko cake kina, Me'u vakaraitaka vei iko na Noqu kaukauwa, me tukuni kina na Yacaqu ki vuravura taucoko."

¹⁸O koya oqo, sa yalololoma o Koya vei ira sa Yalona kina, e rawa ni solia talega vua na tamata, na yaloqa kevaka e vinakata me vaka kina.

¹⁹Mo qai tarogi au mai, "Na cava e beitaki ira tikoga kina ena nodra cala? E rawa beka ni ra sega ni via cakava na ka e vinakata?"

²⁰Ia o cei o iko na tamata, mo via vakalewa ena ka e cakava tiko na Kalou? E rawa beka ni dua na ka e buli, me tukuna vei koya e bulia, "Na cava o buli au tu kina vakaoqo?"

²¹E sega beka ni tu vua na dau tuli kuro na kaukauwa, me vakayagataka na qele cava ga e vinakata, me tulia kina eso me bilo vinaka ka so talega me bilo ca ka sega ni talei?

²²Vakacava kevaka sa vinakata tiko na Kalou, me vakaraitaka Nona cudru katakata kei na Nona kaukauwa, vei ira e dodonu me rusa, ni sa vosoti ira dede tiko mai na Kalou,

²³Ka me vakaraitaka talega na levu ni Nona loloma kina veibilo sa yalololoma kina o Koya, o ira sa vakarautaka makawa tu mai o Koya kina Nona vanua lagilagi,

²⁴Oi keda talega ni da sa kacivi, sega ni o ira ga na Jiu, ia o ira talega na kai matanitu tani.

²⁵Ni sa tukuna talega o Koya ena i vola i Osea: "O ira sa sega ni Noqu tamata, au na kacivi ira me Noqu tamata, kei ira sa sega tu ni lomani, au na kacivi ira me noqu ka lomani."

²⁶"Ena vanua e cavuti kina vei ira, oi kemuni sa sega ni Noqu tamata, ena vakatokai kina vei ira oi kemuni na luve ni Kalou bula."

²⁷E a kacivaka talega mai o Aisea na veika baleti Isireli: "Era na vaka na wiliwili ni nuku e wasawasa o ira na Isireli, ia ena wiliwili lailai sara era na vakabulai.

²⁸Me vaka na dina ni Nona vosa na Turaga, ena vakalekalekataka na gauna me qai vakaotia na vuravura."

²⁹Sa tukuna oti talega o Aisea: "Kevaka me sega ni biuta tiko mai o Jiova ni lewe vuqa e so na gone me noda kawa, eda na vakataki Sotoma, eda na tautauvata talega kei Komora."

³⁰A cava tale me da na tukuna? O ira na kai matanitu tani, ni ra sa sega ni vakadonui mai vua na Kalou, oqo era sa yaco me vakadonui, na veivakadonui ena vuku ni vakabauta;

³¹Ia na Isireli, era sa dinata na veivakadonui ena vuku ni vunau me ra vakadonui kina, ka sa dredre sara me ra vakadonui.

³²Baleta na cava? Ni ra sasaga tikoga ena nodra kaukauwa ka sega ena vakabauta, era sa tarabe kina ena vatu ni veivakatarabetaki.

³³Ni sa volai: "Raica, Au sa vakadavora mai Saioni na vatu me ra na tarabe kina na tamata, na vatu qiwa me ra bale kina (Jisu); ia o ira era vakabauti Koya (Jisu), era na sega ni vakamaduataki,"