[45] Roma 8

¹O koya oqo era sa sega kina ni lewai me cudruvi o ira era sa tuvata kei Karisito Jisu, ni ra sa sega ni muria tiko na i tovo vakayago, ia era sa muria ga na Yalo Tabu.

²Ni sa sereki au mai na vunau ni valavala ca kei na mate, na vunau ni Yalo i Karisito Jisu o Koya sa bula.

³Na ka e sega ni rawata na vunau ena vuku ni tovo vakayago ni tamata, na Kalou vakaikoya sa qai tala mai na Luvena dina ena yago vakatamata, me saumi Vua nai valavala ca: e mai colata taucoko e na yagona nai sau ni valavala ca,

⁴Meda sa qai cakava dodonu kina na i valavala ni vunau, ni da sa sega ni qai muria nai tovo vakayago, eda sa muria ga na Yalo Tabu.

⁵Ni ra sa gadreva na i tovo vakayago o ira era sai tovo vakayago, ia na veika vakayalo, o ira era sai tovo vakayalo.

⁶Ni sa vuni mate na gadreva na i tovo vakayago, ia sa vuni bula kei na vakacegu na gadreva na i tovo vakayalo.

⁷Baleta nai tovo vakayago e rau veimecaki kei na Kalou, e sega ni dau via vakarorogo me rogoca na vunau ni Kalou, ka sega ni rawa vakadua me rau na cakacaka vata.

⁸O ira kece, era bulataka tu ga nai tovo vakayago, ena dredre me ra cakava rawa na ka sa vinakata na Kalou.

⁹Ia oi kemudou sa sega ni vakayago ia dou sa vakayalo ga, kevaka sa tiko dina e na yalomudou na Yalo ni Kalou, o koya sa sega vua na yaloi Karisito, sa sega ni nona.

¹⁰Kevaka sa tiko vata kei kemudou yadudua na Karisito, na yagomudou sa dodonu me mate ena vuku ni valavala ca, ia na yalomudou sa qai bula ena vuku ni veivakadonui.

¹¹Ia kevaka sa tiko vakadua e na lomamudou na Yaloi Koya sa vakaturi Jisu cake tale mai na mate, o Koya sa vakaturi Karisito tale mai na mate, ena vakavouya tale na yagomudou mai na mate, ena Yalona sa tiko vakadua ena lomamudou.

¹²O koya oqo na veiwekani, eda sa sega kina ni vauci ki nai tovo vakayago, meda muria tiko kina nai tovo vakayago.

¹³Kevaka mo dou na bulataka tiko nai tovo vakayago dou na mate, ia kevaka me kaukauwa vei kemudou na Yalo Tabu mo dou na vakamatea kina nai tovo vakayago, dou na bula.

¹⁴O ira kecega sa tuberi ira tiko na Yalo ni Kalou, sai ira oqo na luve ni Kalou.

¹⁵Sa sega tale ni qai tiko vei kemudou na yalo mo dou tukuna ni dou se bobula, mo dou rere tiko kina, ia dou sa rawata na Yalo Tabu mo dou wili me luvena, o koya eda sa kaci kina, "Apa Tamaqu."

¹⁶Na Yalo Tabu oqo sa tukuna mai kina yaloda, ni da sa luve ni Kalou,

¹⁷Kevaka eda sa luvena, eda kawa-ka kawa ni kalou kei na luvena o Karisito, kevaka meda vosota vata kei Koya na veika rarawa, eda na taukena vata na nona i ukuuku vakaturaga. Mai Na Vakararawataki Ki Na Vakaukuukutaki

¹⁸Na veika rarawa eda sotava tiko oqo e vakalailai walega, me vakatautauvatani kei na veika lagilagi eda na laki taukena ni sa cava na bula eke.

¹⁹Na veika buli mai nai vakatekivu, era sa waraka tiko ka nanamaki ena gauna cava, mera na vakaraitaki ira kina na luve ni Kalou ena nodra bula.

²⁰Na veika rarawa kei na dredre e yaco e sega ni nakiti me vaka kina mai nai vakatekivu, ia baleti koya ga e talairawarawa me nuitaka na ka o ya.

²¹Na veika buli taucoko ena yaco talega vei ira na veivakavoui vou mai na vei vakatotogani ena vuku ni talaidredre, mera na wasea vata talega kei ira na luve ni Kalou na galala kei na lagilagi ni veivakaiukuukutaki.

²²Ni da sa kila o vuravura taucoko e vutugu ka kune rarawa tiko mai me yacova mai oqo.

²³E sega ni o koya ga o ya, oi keda talega na taura nai sevu ni ka vinaka mai vua na Yalo Tabu, eda vutugu ka kune rarawa talega ena veisiga, ena noda waraka tiko na gauna ni noda vakadonui meda luvena, kei na vakabulai ni yagoda.

²⁴Oi keda eda vakabulai ena nuinui oqo, ia nai nuinui e raici rawa tu e sega ni nuinui; a cava me nuitaki tiko kina e dua na ka eda raica tu ga?

²⁵Ia kevaka eda nuitaka e dua na ka eda sega ni raica, eda na vosota meda waraka tikoga.

²⁶Na Yalo Tabu talega sa vukea na noda malumalumu. Ni da sega tu ni kila na ka dina e yaga vei keda meda kerea, ia na Yalo Tabu sa masulaki keda ena vutugu e sega ni cavuti rawa.

²⁷Na kalou sa daudikeva na yalo ni tamata sa kila na loma ni Yalo Tabu, ni sa masulaki ira na tamata yalododonu me vaka na loma ni Kalou.

²⁸Meda kila ni ka kece e yaco mai, me rawa kina na ka vinaka vei ira sa lomana na Kalou, o ira era sa kacivi me vaka na ka sa nakiti oti.

²⁹O ira oqo sa kilai ira e liu o Koya, sa lesi ira mera tautauvata sara ga kei na Luvena, me ulumatua kina o Koya vei ira na tacina taucoko.

³⁰Ia o ira sa lesia e liu o Koya, sa qai kacivi ira, o ira sa kaciva o Koya, a qai vakadonui ira, o ira sa vakadonui, sa qai vakaiukuukutaki ira o Koya.

³¹A cava tale meda na tukuna ena veika oqo? Kevaka sa noda i to na Kalou, o cei tale me keda meca?

³²Ni o Koya mada ga e sega ni bureitaka na Luvena dina, ia sa soli Koya me mate ena vukuda kecega, ena sega ni dua na dredre vua me vukei keda ena ka eda vinakata?

³³O cei me beitaki ira sa digitaka na Kalou? Ni sa vakadonui ira na Kalou.

³⁴O cei me na cudruvi? O Karisito ga ni sa mai mate, sa qai tucake tale, ka sa tiko ena liga i matau ni Kalou, ka sa veimasulaki tiko e na vukuda.

³⁵O cei me na tawasei keda mai na loloma i Karisito? Na veivakararawataki, se veivakaleqai, se dauveivakacalai, se na dausiga, se nai seleiwau?

³⁶Me vaka na ka sa volai: "E na Vukumuni keitou sa vakamatei kina ena siga taucoko ka bogi; Keitou sa vaka na sipi sa vakarau me vakamatei".

³⁷E na veika oqo eda sa qaqa tikoga kina ena vuku i Koya sa lomani keda.

³⁸Ni'u sa kila dina sara, ni sa sega ni rawata na mate, se na bula, se o ira na agilosi, se o ira sa lewa, se o ira sa kaukauwa, se na veika sa yaco e daidai, se na veika ena yaco mai muri,

³⁹Se na ka cecere, se na ka titobu, se dua tale na ka ni vuravura oqo me na tawasei keda mai na loloma ni Kalou, sa yaco ena vukui Jisu Karisito na noda Turaga.