[45] Roma 14

¹Mo dou ciqomi koya se malumalumu na nona vakabauta e tiko vata kei kemudou, ke mani duidui na nona rai mai vei kemudou dou kakua ni vakacacani koya.

²Na nona vakabauta e dua e rawa ni kania kina na ka kecega e laukana, ia o koya e malumalumu ena rawa ni kania ga na kakana draudrau.

³Me kakua ni beci koya e sega ni kana o koya sa kana, kei koya sa sega ni kana, me kakua ni vakalewai koya sa kana, ni sa ciqomi koya na Kalou.

⁴O cei o iko mo via lewa e dua na tamata ni dua na turaga tani? Ena saumi taro ga vua na nona turaga, ka sega vei iko, ni Kalou sa rawa ni vakatucaketaki koya.

⁵Eso e nanuma me dokai eso na siga vakatabui mai na so tale na siga, eso e tukuna ni tautauvata kecega na siga vua na Kalou. Ni vakaoqori na vakasama, na tamata yadudua me vakatulewataka vakavinaka na nanuma ni lomana.

⁶O koya sa doka na siga, sa doka na Turaga sa lewa na siga; o koya sa sega ni doka na Turaga, sa sega ni doka na siga, o koya sa kania na kakana cabori, sa kania ni vakavinavinakataka na Kalou ni doka na Kalou; sa doka na Turaga, ena nona vakavinavinakataka na Kalou ena nona sega ni kana.

⁷Ni sa sega e dua vei keda sa bula ena vukuna ga, se dua sa mate ena vukuna ga.

⁸Kevaka eda bula, eda sa bula ena vuku ni Turaga; kevaka eda sa mate, eda mate ena vuku ni Turaga. O koya oqo, se da bula, se da mate, eda sa nona na Turaga.

⁹O ya na vuna e mate ka tucake tale kina o Karisito, me nodra Turaga na bula kei na mate talega.

¹⁰Ia na cava o via lewa tiko kina na wekamu? Na cava o via beci koya tiko kina? Ni da na tu kecega ena mata ni tikotiko ni veilewai nei Karisito.

¹¹Ni sa volai: "Me vaka au sa bula, sa tukuna na Turaga, ena tekiduru vei Au na duru vakayadua ga, kei na yame kecega ena vakatutusa vua na Kalou."

¹²Oi keda yadudua eda na dui solia nai tukutuku, ni veika eda cakava ena vukuna vua na Kalou.

¹³O koya oqo meda sa kakua ni via vakalewa na bula ni dua na tamata, meda sa qarauni keda ga meda kakua ni i tatao ni bula vei ira na wekada, me vakavuna na nodra suka tale kina bula makawa.

¹⁴Au sa kila, ka'u vakadeitaka ena noqu veiwekani kei na Turaga o Jisu, ni sa sega tale ni dua na kakana e dodonu me laukana se sega savasava tiko; ia, o koya ga e tukuna tiko ni sega savasava o koya sara ga e sega savasava tiko.

¹⁵Kevaka e dua na wekamu e vakaleqai koya ni raica na kakana o kania tiko, o sa vakaraitaka tiko ni sega vei iko na loloma, ni kakana o kania tiko ena vakavuna vua na nona mate, ni o koya sara ga, e mai mate kina o Karisito.

¹⁶O koya oqo mo dou kakua ni cakava na ka dou nanuma ni vinaka, mera vosacataki kemudou kina na tamata;

¹⁷Ni sa sega ni ka ni kakana se ka ni gunu na matanitu ni Kalou, sa ka ni yalododonu, na vakacegu kei na reki ena Yalo Tabu.

¹⁸Ena veika kece oqo me liu tikoga o Karisito, na Kalou ena marautaka, ka vaka talega kina o ira na tamata.

¹⁹O koya me da veilomani vakai keda, ka veivakatatataki cake.

²⁰Ena vuku walega ni kakana, mo dou kakua ni vakatawayagataka kina na cakacaka ni Kalou. E sega ni dua na kena leqa na kakana, na leqa ga kevaka e dua me kana, ka la'ki vakaleqa tale kina e dua.

²¹Sa vinaka cake ga me sa kakua ni kania na kakana cabori se gunuva na waini, baleta me kakua ni leqa tiko kina na wekamu ena nona lotu.

²²E tiko nomu vakabauta? Mo taura dei, ni sa raica na Kalou. Sa lagilagi sara na tamata e sega ni beitaki koya me cala, ni vakadeitaka e yalona na ka e cakava e dodonu vinaka.

²³Ia o koya sa sega ni vakadinata me kakua ga ni kania ena cala tale kina, baleta ni sega ni kania e na vakabauta; Na ka kece eda cakava kevaka e sega ni tukuna mai e yaloda ena noda vakabauta, meda kakua ga ni cakava, ni da na cala tale kina.