[45] Roma 15

¹Vei keda sa kaukauwa, meda vosoti ira sa mai malumalumu, meda kakua ni veikawaitaki tikoga vakai keda.

²Me da veivakacegui vaka mata veiwekani, me rawa ni kune kina vua na vinaka, ka i dola ni veivakatataki cake.

³O Karisito e sega ni cakava na ka e vinakata; ia sa volai, "Sa mai tau vei Au na veika rarawa, ena vukudra na vakacacani kemuni Jiova."

⁴Nai vola ka volai sara mai ena gauna e liu, sa baleta na noda vulica na vosota vakadede kei na noda tudei e nai Vola Tabu, ni da sa nuitaka tu na vosa yalayala.

⁵Na Kalou sa dauvosota, ka dauveivakacegui, me vauci kemudou vata ena lomavata vakai kemudou, me vaka sa tu vei Karisito Jisu,

⁶Sa na rawa kina mo dou duavata ka domovata, ena nomudou vakalagilagi Koya na Kalou ka Tama i Jisu Karisito na noda Turaga.

⁷O koya oqo, mo dou lomavinaka ka dou dau veiciqomi, me vakataki Karisito ena Nona dau ciqomi keda, ka me Nona kina na Kalou na lagilagi.

⁸Oqo me'u tukuna vei kemudou o Jisu Karisito sa nodra i talatala talega na cili, me vaka na dina ni Kalou, me tokona kina ni ka dina na vosa yalayala vei ira noda qase,

⁹Sa mai rawa kina vei ira na kai matanitu tani, mera vakarokorokotaka na Kalou ena vuku ni Nona loloma, me vaka sa volai: "Ena vuku ni ka oqo Au na vakatusai iko kina ena kedra maliwa na matanitu tani, ka seretaka na Yacamuni."

¹⁰A sa tukuna tale: "Dou kaila ena vakavinavinaka na kai matanitu tani, vata kei ira na Nona tamata!"

¹¹Ka baci tukuna tale: "Dou ia na vakavinavinaka vei Jiova, oi kemuni kece na kai matanitu tani! Kei kemuni kecega na tamata mo ni vakalagilagia na nomuni Kalou!"

¹²Sa tukuna takega o Aisea: "Ena dua mai na kawa i Jese; ena tubu cake mai me na lewai ira na kai matanitu tani, o koya ena nodra i nuinui na kai matanitu tani."

¹³Ia oqo na Kalou na vuni nuinui, me conaka vakavinaka na nomudou bula, ena reki kei na vakacegu ena vuku ni nomudou vakabauta, ka mo dou vuabale sara, ni dou sa vakataudeitaki tu ena kaukauwa ni Yalo Tabu.

¹⁴Oi au na veiwekani au sa kilai kemudou, ni sa tu vei kemudou na vuku vakayalo, mo dou veiciqomi ka veivosovosoti vakai kemudou.

¹⁵Ni dou raica na noqu volavola vei kemudou, eso na tikina au via vakabibitaka vei kemudou, baleta duadua ga na loloma ni Kalou vei au.

¹⁶Me'u yaco kina me i talatala nei Jisu Karisito vei ira na kai matanitu tani, ena cakacaka ni kena vakatetei na kosipeli ni Kalou, me rawa ni vakadonui na nodra i soro na kai matanitu tani, ena nodra sa vakavoui ena kaukauwa ni Yalo Tabu.

¹⁷Ena vuku i Jisu Karisito, eso na ka au sa bau dokadoka toka kina ena noqu cakacaka vua na Kalou.

¹⁸Au na sega ni tukuna e dua na ka au sega ni vakadinadinataka vei au, ia na ka ga e vakayagataki au kina o Karisito, ena nodra vakalesui mai na kai matanitu tani, mai na vosa au cavuta ka salavata kei na noqui valavala -

¹⁹Ka vaka talega kina na vei cakacaka mana veivakurabuitaki ena kaukauwa ni Yalo Tabu ni Kalou, au sa vunautaka oti nai tukutuku i Karisito mai Jerusalemi ka yaco sara i Ilirikomi.

²⁰Au sa mai rawata kina na ka au sa nakita oti mai lomaqu, o ya me'u vunautaka nai tukutuku vinaka, ka sega ni o ira sa kilai Jisu tu, de'u la'ki teivaka kina e dua na sore ni kau sa teivaki oti tu mai kea.

²¹Ia me vaka sa volai: "O ira se bera ni tukuni vakadua vei ira era na raici Koya; kei ira se bera ni rogoci Koya era na kilai Koya."

²²Oqo na vuna e tao tiko kina noqu via lako mai vei kemudou.

²³Ia oqo sa oti tu na noqu cakacaka eke, na noqu gagadre tu mai ena dua na gauna balavu me'u raici kemudou, sa vakarau yaco oqo.

²⁴Ena noqu na lako ki Sipeni, au vinakata me'u na la'ki cegu vakalailai e keri, medatou na veisotari mada, ke rawa ni dou veivuke vei au vakalailai, se medatou sota mada ga ka veimarautaki.

²⁵Ia oqo au sa vakarau biubiu sara tu ga me'u lakoi Jerusalemi, ena noqu kauta na ka ni loloma vei ira nai soqosoqo lotu.

²⁶E dua na veivuke levu era solia mai Masitonia kei Akaia, ena nodra dodoliga ena ka ni loloma, mera vukei kina o ira nai soqosoqo lotu mai Jerusalemi era dravudravua tu.

²⁷Era dodoliga ni ra marautaka na ka era cakava, ni ra kila e sega tu ni bau dua na ka mera yaga kina vei ira na lewe ni lotu mai Jerusalemi, na nodra mai kilai Karisito era kila tu ni o ira ga na soqosoqo lotu mai Jerusalemi kei na nodra mai vakaiyautaki vakayalo, e sega kina ni dua na ka vei ira na nodra i yau era solia ki Jerusalemi.

²⁸Ni'u sa laki solia oti vei ira nai solisoli loloma me baleti ira, au sa na qai lako ki Sipeni ena noqui lakolako oqori, au na tovolea me'u na yaco kina vei kemudou.

²⁹Ia au sa kila tu ni'u na lako yani vei kemudou, au na kauta yani na veivakalouvinakataki vakayalo kecega ka tu ena vosa i Karisito.

³⁰Au sa vakamamasu yani vei kemudou na veiwekani, ena vuku ni noda Turaga o Jisu Karisito, kei na vuku talega ni loloma ni Yalo Tabu, medatou na veitokonitaka vata na masulaki au vua na Kalou.

³¹Me'u rawa ni vakabulai mai vei ira na sega lotu mai Jutia, mera ciqoma talega ena yalo e marautaka o ira na lewe ni lotu mai Jerusalemi, na ka ni loloma au solia vei ira,

³²Baleta medatou qai sota, au sa marau tiko ena vuku ni lewa ni Kalou, medatou na qai wasea vata na vinaka ni Kalou e keri.

³³Ia me tiko vata kei kemudou kecega na Kalou ni veivakacegui. Emeni.