[45] Roma 16

¹E dua na tacida marama o Fipe, o koya sa dauqarava nai soqosoqo lotu mai Kenikiria, au via tataunaki koya vei kemudou,

²Mo dou dau raici koya ka soli ka vua ena vuku ni Turaga, me vaka nona dau veivuke o koya, o au e dua vei ira na vukei.

³Me tukuni yani na noqu i loloma vei rau o Pirisila kei Akuila, rau vukei au sara vakalevu ena vuku ni cakacaka i Jisu Karisito,

⁴E rau sega ni bau wilika nodrau bula me dua na ka, rau vinakata ga me'u bula vinaka tiko, ka sega kina ni o au ga e vakavinavinakataki rau, o ira kece na veisoqosoqo lotu ni kai matanitu tani, era vakavinavinakataki rau.

⁵Au sa loloma yani vei ira na lewe ni lotu era tiko e nodrau vale. Au sa loloma vei Epenito o koya au sa daulomana, na matai ni tamata me vakabulai mai vei Karisito ena yasayasa vaka Akaia.

⁶Dou tukuna talega vei Meri na noqui loloma, ni sa dau oga vakalevu ena vukuda.

⁷Au sa loloma vei Anariko kei Junia rau na wekaqu voleka keitou sa vesu vata, era dau dokai ira sara nai Apositolo, rau se lotu sara i liu ni bera me'u qai lotu mai.

⁸Au sa loloma talega vei Abalia, o koya au sa daulomana ena vuku ni Turaga.

⁹Au sa loloma talega vei Ubana e dua noda i tokani ena cakacaka vei Karisito, kei Setaia o koya au sa dau lomana.

¹⁰Au sa loloma vei Epeli, o koya sa dau caka vinaka vei Karisito. Au sa loloma talega ki na matavuvale nei Arisitopulu.

¹¹Au sa loloma vei Erotioni, na wekaqu dina. Au sa loloma ki na matavuvale nei Nasoso era sa nona na Turaga.

¹²Au sa loloma vei Taraivina kei Taraivosa, oi rau na liga ni cakacaka ni Turaga. Au sa loloma talega vei Veresi, o koya sa dau oca sara vakalevu ena cakacaka ni Turaga.

¹³Au sa loloma vei Rafa, na nona digitaki na Turaga, kei na marama tinana, e dua sa vaka ga e tinaqu dina.

¹⁴Au sa loloma vei Sikirito, vei Filioni, vei Ima, vei Verosa, vei Ema, kei ira na veiwekani era tiko vata kei ratou.

¹⁵Au sa loloma vei Filoko kei Tulia, vei Nereo kei na ganena kei Oliva kei ira kecega sa lotu era tiko vata.

¹⁶Dou lululu ka veiruguci ena yalo savasava kei ira kece nai soqosoqo lotu i Karisito era sa vakauta yani na nodra i loloma vei kemudou.

¹⁷Ni bera ni'u tinia, au sa kerei kemudou sara vakabibi, mo dou kakua ni veivolekati kei ira sa dau vakavuna na bula ni veitovaki kei na nodra kauta tani na vakabauta, ena nodra cavuta eso nai vakavuvuli ka sega ni vaka dou sa vakatavulici kina, dou vakayawaki kemudou mai vei ira.

¹⁸O ira sa vakaoqori era sega ni lotu vua na noda Turaga o Jisu Karisito, ia na nodra lotu baleti ira ga me sega kina na ketedra, na gusudra e kamikamica ka veirawai, era sikalutu kina o ira se gone vakayalo.

¹⁹O ira na tamata kecega era sa kila vinaka na bula ni nomudou talairawarawa. Sa dua na ka noqu marautaki kemudou; ia au vinakata mo dou raica vakayalomatua na ka ga e vinaka, ka mo dou kakua ni vakaleqai ena ka e ca.

²⁰O koya na Kalou ni veivakacegui ena butuvoroki Setani me dasila ena ruku ni yavamudou. Me na tiko vata kei kemudou na loloma ni noda Turaga o Jisu Karisito. Emeni.

²¹Sa loloma yani o Timoci na noqui tokani vakacakacaka, o Lusia, Jesoni, kei Sosiveta, ratou na wekaqu oqo ratou sa loloma yani.

²²Oi au o Teretiu, ka vola nai vola oqo, au sa loloma yani vakabibi, ni'u tacimudou talega ena vuku ni Turaga.

²³Sa tukuna o Keio me'u vakamoce yani ena vukuna, o au kei ira na soqosoqo lotu keimami soqoni tiko oqo ena nona vale era sa loloma taucoko tu yani, o Erasito na dauniyau ni koro oqo sa loloma yani, kei Kanito e dua na tacida sa loloma talega yani.

²⁴Me sa tiko vata ga kei kemudou kecega na yalololoma ni noda Turaga o Jisu Karisito. Emeni.

²⁵Ni o Koya sa vakataudeitaki kemudou ena i tukutuku vinaka i Jisu Karisito au vunautaka vei kemudou, sa qai vakatakilai mai kina na ka vuni a vunitaki sara tu mai ni se qai tekivu o vuravura.

²⁶Me dina kina na parofisai era cavuta na parofita mai nai Vola Tabu, ni na yaco na gauna era na vakabauta kina na lewei vuravura kecega na dina ni vosa ni Kalou.

²⁷Na Kalou duadua ga sa vuni vuku, me vakarokorokotaki tikoga o Koya ena vuku i Jisu Karisito, ka sega ni mudu. Emeni.