[45] Roma 4

¹A cava meda tukuna sa rawata o Eparaama na tamada, ena i valavala vakayago?

²Kevaka sa vakadonui o Eparaama ena vuku ni cakacaka, oqori e dua na ka me dokadoka kina o koya, ia ka sega ga ena mata ni Kalou.

³A cava e tukuna nai Vola Tabu? "Sa vakabauta na Kalou o Eparaama, sa yaco kina o koya mei valavala dodonu."

⁴Na tamata e cakacaka, na kena i sau e sega ni soli me vaka nai loloma, ia e soli vua ni cakacakataka.

⁵Ia, o koya sa sega ni cakacaka, sa vakabauti Koya ga sa vakadonui ira na tamata i valavala ca, na nona vakabauta sa yaco kina me i valavala dodonu,

⁶Sa vaka talega kina o Tevita, ni sa tukuna na kena kalouvinaka na tamata, sa vakayacori koya na Kalou mei valavala dodonu, ia ka sega ga ena vuku ni cakacaka:

⁷"Sa kalouvinaka o ira sa bokoci na nodra i valavala ca, a sa buluti na nodra caka cala;

⁸Sa kalouvinaka na tamata sa sega ni beitaka vua nai valavala ca o Jiova." Vakadonui O Eparaama Ni Se Bera Na Veicili

⁹Na veivakalouvinakataki oqo baleta na cilivi, se baleti ira talega na sega cili? Ni da tukuna na nona vakabauta o Eparaama sa yaco kina mei valavala dodonu.

¹⁰E yaco vua ena gauna cava? Na gauna sa cilivi oti kina, se na gauna se bera kina ni cilivi? E sega ni sa cilivi oti, ia ena gauna se sega cili kina.

¹¹Ea qai cilivi mei vakatakilakila ni sa yalododonu, ena vuku ni vakabauta ena gauna se sega ni cili tu kina. Na kenai naki me yaco o koya me tamadra kecega era sa vakabauta, kevaka mada ga se sega ni cili tiko, ka me ra yaco kina mera yalododonu.

¹²Ka tamadra talega vakayalo na cili, ni ra sa qai raica ni Kalou e vakadonui Eparaama e liu, ka yaco kina o koya mei valavala dodonu, ia era qai sasaga me ra biuta nai valavala ni bula makawa, me ra sa taurivaka ga nai valavala ni bula nei Eparaama. Soli Na Vosa Yalayala Ena Vuku Ni Vakabauta

¹³Ni sa sega ni yalataki vei Eparaama, se vei ira na nona kawa, mei taukei ni vuravura ena vuku ni vunau, ena vuku ga ni yalododonu sa rawa ena vakabauta.

¹⁴Kevaka era gone ni kawa o ira era bula ena vunau, sa qai sega ni yaga na vakabauta kei na vosa yalayala e sega na betena.

¹⁵Baleta na vunau e kauta mai na veicudruvi; ni sega na vunau, e sega nai valavala ca.

¹⁶O koya oqo, na vakabauta ga eda lomani kina, me rawa ni vakaivotavota kece na vei kawa ena vosa ni yalayala, sa sega ni o ira ga na bula tu ena vunau, o ira talega sa tu vei ira na vakabauta i Eparaama, o koya na tamada kecega.

¹⁷(Me vaka sa volai, "Au sa vakayacori iko mo tamadra na veimatanitu") Ni tucake tu e matana o Koya sa vakabauta “ Na Kalou, o Koya sa vakabulai ira tale na mate, a sa kaciva na veika sa sega ni kune, me vaka sa kune tu;

¹⁸Ia ni sa sega na ka me nuinui kina, sa vakabauta tikoga o Koya, ka vakanuinui ni na yaco me tamadra na veimatanitu, me vaka na vosa e cavuti vua, "Na nomu kawa ena vaka kina."

¹⁹E sega ni bau malumalumu vakadua na nona vakabauta, se me vakasamataka ni yagona dina, sa mate oti (Ni sa yacova tiko yani o koya na yabaki dua na drau), kei na kete i Sera talega sa mate tu.

²⁰E sega ni qai lomatarotarotaka na vosa yalayala ni Kalou, me sega ni via vakabauta, ia na nona vakabauta sa qai kaukauwa ga ka sa vakalagilagia tikoga na Kalou.

²¹A sa vakadeitaka tu e yalona, na veika sa vosa yalayalataki oti tu vua, ena rawata.

²²O koya oqo, "Sa yaco kina o koya mei valavala dodonu."

²³Na vosa ka tau vua, e sega ni volai ena vukuna duadua ga,

²⁴Ia ena vukuda talega, ni da vakabauta na vosa yalayala ni Kalou, ena nona vakatura cake na noda Turaga o Jisu Karisito mai na mate,

²⁵Ena soli yani me vakamatei ena vuku ni noda i valavala ca, ka qai vakaturi cake tale me da vakadonui kina.