[45] Roma 5

¹O koya oqo, ni da sa vakadonui ena vakabauta, eda sa qai veivinakati kei na Kalou, ena vuku ni noda Turaga o Jisu Karisito,

²Ena vuku ni noda vakabauta, eda sa mai vakadaberi ena dua nai cewacewa vakaturaga, me vaka eda sa tu kina ni kua, me da reki tiko, ni sa noda tu na vanua lagilagi ni Kalou.

³E sega ni o koya ga oqori, ni da vakararawataki eda qaqa kina, eda kila na veika rarawa e yaco vei keda e vakatubura na dauvosota;

⁴Na dauvosota e vakatubura nai tovo e vinaka; kei nai tovo e vinaka e vakatubura me da dau vakanuinui.

⁵Ni sa tu vei keda nai nuinui eda na vagalegalei keda, ena noda sa vakila tu na loloma ni Kalou ena noda bula, ni sovaraka tu vei keda na nona Yalo Tabu o Koya sa soli vei keda.

⁶Ni da se vakaloloma sara tu ga, sa mai mate o Karisito ena gauna dodonu baleta na tamata i valavala ca.

⁷Baleta ni sega ni rawa me mate e dua, ena vukuna nai valavala dodonu, ia me baleta na tamata me vinaka sara, e dodonu kina me dua na tamata me soli koya me mate.

⁸Ia na Kalou sa qai vakaraitaka vei keda na Nona loloma, ena gauna sara ga eda se bula i valavala ca tu kina, sa mai mate na Karisito.

⁹Ka sa yaco kina vei keda meda vakadonui ena vuku ni Nona dra, eda sa vakabulai talega mai na veicudruvi ni Kalou.

¹⁰Ni da a meca tiko vua, na nona mai mate na Luvena eda sa qai mai veivinakati kina kei na Kalou, eda vakabulai duadua ga ena Nona mai mate.

¹¹E sega ni o koya ga o ya, me da dau reki tiko vua na Kalou ena vuku ni noda Turaga o Jisu Karisito, ni o Koya e mai vakavinakataka na noda veiwekani kei na Kalou.

¹²O koya oqo, sa curu ki vuravura nai valavala ca, ena vuku ni tamata e dua kei na mate ena vuku ni valavala ca, a sa yaco kina na mate kina tamata kecega, baleta ni sai valavala ca taucoko na tamata-

¹³Se bera ni soli mai na vunau sa tu rawa e vuravura nai valavala ca, ia nai valavala ca e sega ni kilai tu me dua na ka, ni se bera na vunau.

¹⁴O mate e vakacolasau tiko mai ena gauna i Atama me yaco mai vei Mosese, vei ira talega era sega ni valavala ca ena talaidredre i Atama, oqori sai yaloyalo kei Koya ena qai lako mai.

¹⁵Ia nai solisoli loloma e sega ni tautauvata na caka cala, na nona caka cala e dua na tamata era mate taucoko kina na tamata, na loloma ni Kalou sa sega ni yalani rawa kei na nona i solisoli loloma, o Koya sa vakabulai ira na tamata kecega, oqori e dua talega na tamata o Jisu Karisito.

¹⁶Nai solisoli loloma e sega ni tautauvata, na veika e yacovi koya na lewe dua e valavala ca. Na lewe dua e valavala ca eda mai cudruvi kina ni da sa cala kece, ia ena vuku ni solisoli loloma eda sa vakadonui kina mai na noda caka cala.

¹⁷Ia kevaka sa lewa tiko na tamata o mate, ena vuku ni nona caka cala e dua na tamata, o ira talega na ciqoma nai solisoli loloma ni yalododonu, era na vakaiukuukutaki ka serauni kei na bula e sega ni mudu, ena vukuna na le dua o Jisu Karisito).

¹⁸O koya oqo, me vaka sa lewai me cudruvi na tamata kecega ena vuku ni dua walega na cala, sa vaka talega kina ena vuku ni dua walega nai valavala dodonu, sa rawa me ra vakadonui na tamata kecega mera bula.

¹⁹Ena vuku ni nona talaidredre e dua walega na tamata, era mai valavala ca taucoko kina na tamata kece, ia na Nona mai talairawarawa e Dua na tamata, era mai vakadonui kece tale kina na tamata.

²⁰A sa kau mai na vunau me uasivi kina nai valavala ca, ia ni sa uasivi mai nai valavala ca, sa qai uasivi vakalevu cake sara na loloma,

²¹Ni sa vakaveitaliataka tu na tamata o mate, ena vuku ni valavala ca, na loloma e qai mai vakacokotaka vinaka na tamata, me vakadonui kina bula Sega ni mudu, ena vuku i Jisu Karisito na noda Turaga.