[36] Sefanaia 1

¹Na vosa i Jiova ka yaco vei Sefanaia na luve i Kusi, na luvei Kitalaia, na luve i Amaraia, na luve i Esekaia, ena gauna i Josaia na luve i Emoni na Tui Juta.

²"Au na vakarusa na ka kecega e tiko ena dela ni qele," sa tukuna o Jiova;

³"Au na vakarusa na tamata kei na manumanu yava i va; Au na vakarusa na manumanu vuka, kei na ika kece ni waitui, na ka kece edau kauta mai na manumanu kei ira na i valavala ca. Au na vakarusa na tamata mai na vanua e tiko kina", sa tukuna o Jiova.

⁴"Na ligaqu ena tarai ira na Juta kei ira na lewe i Jerusalemi. Au na musuki ira sobu na dau qaravi Peali, kei ira taucoko na kena bete ni qaravi Kalou matakau -

⁵O ira na dau qarava na i vavakoso yaloca ni lomalagi ena vei tikina cecere; kei ira na dau bubului vakailasu vei Jiova, ia ka dau bubului ga vei Milikamo;

⁶Kei ira na vuki tani mai vei Jiova, ka ra sega ni bau masuti Jiova se gadrevi koya."

⁷Mo vakanomodi ena mata ni Kalou o Jiova; ni sa roro tiko mai na nona siga, ni sa vakarautaka tiko o Jiova e dua nai soro; ena ia kina o Koya na veisureti vei ira sa kila tiko o koya.

⁸"Ena siga dina ni nona vakacabora nai soro, ena cudruvi ira kina na ravouvou kei ira na luvedra lalai na Tui, kei ira kece era dau sulumaka tiko na nodra i sulu na matanitu tani eso.

⁹Ena siga vata tiko o ya Au na cudruvi ira talega na dau veikalawaci ena veibeci, ka vakaikuritaka nai vakarau kaukauwa kei na veivakaisini ena nodra veivale na i liuliu ni yavusa.

¹⁰"Ena qai yaco ena siga o ya, "sa tukuna o Jiova, "ena rorogo mai ena Matamata ni Ika na veitagicaki kei na tagi qoqolou ena kena i Karua ni Gauna, kei na rorogo tatamosamosa mai na veidelana.

¹¹Dou tagi qoqolou na lewei Makitesa! Ni ra sa vakamatei taucoko na nomudou liga ni cakacaka; kei ira na nomudou dau ni bisinisi.

¹²"Ena yaco mai na siga o ya, me'u na tutuvaka kina e dua na cina me'u vakasaqaqara yani e Jerusalemi, me'u na cudruvi ira o ira era vakawelewele ka sega ni kauwai, ka ra tukuna tu e yalodrau 'na Kalou ena sega ni rawa ni cakava na ka vinaka, ka sega talega ni cakava e dua na ka ca.'

¹³O koya oqo na nodra i yau talei era na taura na meca, era na qai vakaveitaliataka na dauvakaca na nodra veivale; ni ra sa tara tale na nodra vei vale, era na sega ni tawana; era na tea na vaini, era na sega ni gunuva ga na kena waini".

¹⁴Sa roro mai na siga i Jiova e levu ka rerevaki; ka sa voleka ka ena yaco vakatotolo. Na kena rorogo mada ga ni rogo mai ena veivakararawataki sara; ni ra rogoca na tamata i valu qaqa era na domobula ka tagi.

¹⁵Na siga o ya ena siga ni cudru, ena siga ni rarawa kei na yaluma, ena siga ni veivakarusai kei na veivakalolomataki, ena siga ni buto leka, na siga ni o loaloa ka butobuto,

¹⁶Na siga ni rogo ni davui kei na kaila, me baleta na veikoro lelevu kei na vei vale ni valu cecere.

¹⁷"Au a kauta mai na veivakararawataki vei ira na tamata, mera na vaka kina na mataboko, ni ra sai valavala ca vei Jiova; na nodra dra ni sa liviraki sa vaka ga na kuvu ni qele, kei na lewe ni yagodra sa vaka na dravusa."

¹⁸Ena sega ni rawa me vakabulai ira na siliva se koula ena siga ni cudru i Jiova; ia ena vakarusai me vakamai vakadua na vanua taucoko ena nona vuvu, ka vakasauri me ra kidacala ena veika ena yaco na lewe ni vanua.