[35] Apakuki 3

¹Na masu i Apakuki na parofita, me baleti Sikinoce.

²I Jiova, au a rogoca na domomuni au a qai rere; I Jiova, mo ni vakabulabulataka mada na nomuni cakacaka ena veimama ni gauna oqo! Ena veimama ni gauna oqo mo ni vakatakila me kilai; ka ni kemuni sa na cudru mo ni kua ni guilecava ga mo ni yalololoma tiko.

³Sa lako mai Temani na Kalou, o koya na yalosavasava mai na ulunivanua o Perana-Sela. Sa ubia na lomalagi na nona i ukuuku, kei na vuravura sa sinai ena vakavinavinaka.

⁴Na nona i serau sa ka e rarama sara; ka vakatakilai mai na i serau ena ligana, ka ni vuni tu kina na nona kaukauwa.

⁵E liu tiko vua na mate dauveidewavi ka muri koya tale tikoga mai.

⁶E tu o koya ka vakarautaki vuravura; me raica me vakayavalata. Era na qeqera sobu kina na veiulunivanua lelevu, era na vakalolovirataki sobu na veidelana na nona cakacaka e sega ni rawa e dua me tarova.

⁷Au raica na vale laca mai Kusani ni sa basuraki sobu; nai rairai totoka kei Mitiani sa vakacacani.

⁸I Jiova kemuni sa sega ni taleitaka na veiuciwai, o ni sa cudruva na uciwai kei na wasawasa, mo ni vodoka lako kina na ose kei na qiqi ni valu dau veivakabulai?

⁹O ni sa vakarautaka oti tu na nomuni dakai titi; ka o ni sa bubului oti tu kina nomuni gasau. Kemuni a wasea na vuravura mera veiucuwai. Sela

¹⁰Ni ra raici kemuni na veiulunivanua era sa sautanini ga; kei na kena kui kaukauwa na wai. E voqa yawa sara na kena rorogo ka vakayacora me laveti cake ga kina na liga.

¹¹Na matanisiga kei na vula e rau sega ni toso rawa ena vanua e rau cila tiko mai kina; ka rau qai toso ga ni sa cilavi rau yani na kaukauwa ni rarama e tiko ena nomu gasau; kei na nomu moto ni rau sa vukayani.

¹²O ni lakova yani na vuravura ena yalokatakata; ka yavalata na veimatanitu ena nomuni rarawa.

¹³O ni a lako talega yani ena vukudra na nomuni tamata mera vakabulai, kei ira o ni a lumuta. O ni a vakamatei ira na nodra i liuliu na mataqali dauvuki vaka tani, ka ena nomuni vakamalumalumutaka na vanua edau kaukauwa kina. Sela.

¹⁴O ni vukica lesu tale na gasau me vuka lesu tale vei ira na nodra i liuliu ni mataqali. Ka era qai lako mai vaka na covulaca mera vakarerei au; na nodra marau mai sa qai vuki me vakaloloku.

¹⁵O ni a lako ena loma ni wasawasa kei na nomuni ose, ena maliwa ni ua lelevu.

¹⁶Au a rogoca, ka rise na bati ni ketequ; ka sega ni matata na gusuqu ena kena rorogo; ka sa vaka na sui vuca na noqu sui ni sa sega ni taura rawa na levu ni sautaninini, io au na vakacegu ga ena siga ni veika rarawa, ena nona na lako mai vei ira na lewe ni vanua, ena vakayagataka o koya na nona mataivalu.

¹⁷E dina ni ra na sega ni seraki na lolo, ka sega ni vua mai na vaini, ka sega ni solia mai na vuni olive na kena i lumu talei; kei na qele sa sega ni vakalewe vinaka kina na kakana; ka sa yali eso na sipi vei ira na qele ni sipi, kei na bulumakau e ra sa yali taucoko ena kena bai.

¹⁸Io, au na rekitaki Jiova tikoga, au na marautaki koya ni o koya ga na noqu Kalou ka noqu i vakabula.

¹⁹Na Kalou o Jiova sa vuni noqu kaukauwa; ka ena vakayacora na yavaqu me vaka na yava ni dia, ka ena keveti au o koya me'u lakova na noqu veidelana cecere. Kivei koya na dauniserelevu ka'u na kauta kina na noqu i yaya ni vakatagi.