Sálmarnir 38

¹Drottinn, refsa mér ekki í reiði þinni og tyfta mig ekki í gremi þinni.

²(38:3) Örvar þínar standa fastar í mér, og hönd þín liggur þungt á mér.

³(38:4) Enginn heilbrigður blettur er á líkama mínum sakir reiði þinnar, ekkert heilt í beinum mínum sakir syndar minnar.

⁴(38:5) Misgjörðir mínar ganga mér yfir höfuð, sem þung byrði eru þær mér of þungar orðnar.

⁵(38:6) Ódaun leggur af sárum mínum, rotnun er í þeim sakir heimsku minnar.

⁶(38:7) Ég er beygður og mjög bugaður, ráfa um harmandi daginn langan.

⁷(38:8) Lendar mínar eru fullar bruna, og enginn heilbrigður blettur er á líkama mínum.

⁸(38:9) Ég er lémagna og kraminn mjög, kveina af angist hjartans.

⁹(38:10) Drottinn, öll mín þrá er þér kunn og andvörp mín eru eigi hulin þér.

¹⁰(38:11) Hjarta mitt berst ákaft, kraftur minn er þrotinn, jafnvel ljós augna minna er horfið mér.

¹¹(38:12) Ástvinir mínir og kunningjar hörfa burt fyrir kröm minni, og frændur mínir standa fjarri.

¹²(38:13) Þeir er sitja um líf mitt, leggja snörur fyrir mig, þeir er leita mér meins, mæla skaðræði og hyggja á svik allan liðlangan daginn.

¹³(38:14) En ég er sem daufur, ég heyri það ekki, og sem dumbur, er eigi opnar munninn,

¹⁴(38:15) ég er sem maður er eigi heyrir og engin andmæli eru í munni hans.

¹⁵(38:16) Því að á þig, Drottinn, vona ég, þú munt svara mér, Drottinn minn og Guð minn,

¹⁶(38:17) því að ég segi: "Lát þá eigi hlakka yfir mér, eigi hælast um af því, að mér skriðni fótur."

¹⁷(38:18) Því að ég er að falli kominn, og þjáningar mínar eru mér æ fyrir augum.

¹⁸(38:19) Ég játa misgjörð mína, harma synd mína,

¹⁹(38:20) og þeir sem án saka eru óvinir mínir, eru margir, fjölmargir þeir er hata mig að ástæðulausu.

²⁰(38:21) Þeir gjalda mér gott með illu, sýna mér fjandskap, af því ég legg stund á það sem gott er.

²¹(38:22) Yfirgef mig ekki, Drottinn, Guð minn, ver ekki fjarri mér,

²²(38:23) skunda til liðs við mig, Drottinn, þú hjálp mín.