Sálmarnir 44

¹Guð, með eyrum vorum höfum vér heyrt, feður vorir hafa sagt oss frá dáð þeirri, er þú drýgðir á dögum þeirra, frá því, er þú gjörðir forðum daga.

²(44:3) Þú stökktir burt þjóðum, en gróðursettir þá, þú lékst lýði harðlega, en útbreiddir þá.

³(44:4) Eigi unnu þeir landið með sverðum sínum, og eigi hjálpaði armleggur þeirra þeim, heldur hægri hönd þín og armleggur þinn og ljós auglitis þíns, því að þú hafðir þóknun á þeim.

⁴(44:5) Þú einn ert konungur minn, ó Guð, bjóð út hjálp Jakobsætt til handa.

⁵(44:6) Fyrir þína hjálp rekum vér fjandmenn vora undir, og fyrir þitt nafn troðum vér mótstöðumenn vora fótum.

⁶(44:7) Ég treysti eigi boga mínum, og sverð mitt veitir mér eigi sigur,

⁷(44:8) heldur veitir þú oss sigur yfir fjandmönnum vorum og lætur hatursmenn vora verða til skammar.

⁸(44:9) Af Guði hrósum vér oss ætíð og lofum nafn þitt að eilífu. [Sela]

⁹(44:10) Og þó hefir þú útskúfað oss og látið oss verða til skammar og fer eigi út með hersveitum vorum.

¹⁰(44:11) Þú lætur oss hörfa undan fjandmönnum, og hatursmenn vorir taka herfang.

¹¹(44:12) Þú selur oss fram sem fénað til slátrunar og tvístrar oss meðal þjóðanna.

¹²(44:13) Þú selur lýð þinn fyrir gjafverð, tekur ekkert verð fyrir hann.

¹³(44:14) Þú lætur oss verða til háðungar nágrönnum vorum, til spotts og athlægis þeim er búa umhverfis oss.

¹⁴(44:15) Þú gjörir oss að orðskvið meðal lýðanna, lætur þjóðirnar hrista höfuðið yfir oss.

¹⁵(44:16) Stöðuglega stendur smán mín mér fyrir sjónum, og skömm hylur auglit mitt,

¹⁶(44:17) af því ég verð að heyra spott og lastmæli og horfa á óvininn og hinn hefnigjarna.

¹⁷(44:18) Allt þetta hefir mætt oss, og þó höfum vér eigi gleymt þér og eigi rofið sáttmála þinn.

¹⁸(44:19) Hjarta vort hefir eigi horfið frá þér né skref vor beygt út af vegi þínum,

¹⁹(44:20) en samt hefir þú kramið oss sundur á stað sjakalanna og hulið oss niðdimmu.

²⁰(44:21) Ef vér hefðum gleymt nafni Guðs vors og fórnað höndum til útlendra guða,

²¹(44:22) mundi Guð eigi verða þess áskynja, hann sem þekkir leyndarmál hjartans?

²²(44:23) En þín vegna erum vér stöðugt drepnir, erum metnir sem sláturfé.

²³(44:24) Vakna! Hví sefur þú, Drottinn? Vakna, útskúfa oss eigi um aldur!

²⁴(44:25) Hví hylur þú auglit þitt, gleymir eymd vorri og kúgun?

²⁵(44:26) Sál vor er beygð í duftið, líkami vor loðir við jörðina.

²⁶(44:27) Rís upp, veit oss lið og frelsa oss sakir miskunnar þinnar.