Sálmarnir 55

¹Hlýð, ó Guð, á bæn mína, fel þig eigi fyrir grátbeiðni minni.

²(55:3) Veit mér athygli og svara mér. Ég kveina í harmi mínum og styn

³(55:4) sakir háreysti óvinarins, sakir hróps hins óguðlega, því að þeir steypa yfir mig ógæfu og ofsækja mig grimmilega.

⁴(55:5) Hjartað berst ákaft í brjósti mér, ógnir dauðans falla yfir mig,

⁵(55:6) ótti og skelfing er yfir mig komin, og hryllingur fer um mig allan,

⁶(55:7) svo að ég segi: "Ó að ég hefði vængi eins og dúfan, þá skyldi ég fljúga burt og finna hvíldarstað,

⁷(55:8) já, ég skyldi svífa langt burt, ég skyldi gista í eyðimörkinni. [Sela]

⁸(55:9) Ég skyldi flýta mér að leita mér hælis fyrir þjótandi vindum og veðri."

⁹(55:10) Rugla, Drottinn, sundra tungum þeirra, því að ég sé kúgun og deilur í borginni.

¹⁰(55:11) Dag og nótt ganga þær um á múrum hennar, en ógæfa og armæða eru þar inni fyrir.

¹¹(55:12) Glötun er inni í henni, ofbeldi og svik víkja eigi burt frá torgi hennar.

¹²(55:13) Því að það er eigi óvinur sem hæðir mig - það gæti ég þolað, og eigi hatursmaður minn er hreykir sér yfir mig - fyrir honum gæti ég farið í felur,

¹³(55:14) heldur þú, jafningi minn, vinur minn og kunningi,

¹⁴(55:15) við sem vorum ástúðarvinir, sem gengum í eindrægni saman í Guðs hús.

¹⁵(55:16) Dauðinn komi yfir þá; stígi þeir lifandi niður til Heljar, því að illska er í bústöðum þeirra, í hjörtum þeirra.

¹⁶(55:17) En ég hrópa til Guðs, og Drottinn mun hjálpa mér.

¹⁷(55:18) Kvöld og morgna og um miðjan dag harma ég og styn, og hann heyrir raust mína.

¹⁸(55:19) Hann endurleysir sál mína og gefur mér frið, svo að þeir geta eigi nálgast mig, því að mótstöðumenn mínir eru margir.

¹⁹(55:20) Guð mun heyra, og hann er ríkir frá eilífð mun lægja þá. [Sela] Þeir breytast ekki og óttast eigi Guð.

²⁰(55:21) Vinur minn lagði hendur á þann er lifði í sátt við hann, hann rauf sáttmál sitt.

²¹(55:22) Hálli en smjör er tunga hans, en ófriður er í hjarta hans, mýkri en olía eru orð hans, og þó brugðin sverð.

²²(55:23) Varpa áhyggjum þínum á Drottin, hann mun bera umhyggju fyrir þér, hann mun eigi að eilífu láta réttlátan mann verða valtan á fótum.

²³(55:24) Og þú, ó Guð, munt steypa þeim niður í grafardjúpið. Morðingjar og svikarar munu eigi ná hálfum aldri, en ég treysti þér.