Sálmarnir 65

¹Þér ber lofsöngur, Guð, á Síon, og við þig séu heitin efnd.

²(65:3) Þú sem heyrir bænir, til þín kemur allt hold.

³(65:4) Margvíslegar misgjörðir urðu mér yfirsterkari, en þú fyrirgafst afbrot vor.

⁴(65:5) Sæll er sá er þú útvelur og lætur nálægjast þig til þess að búa í forgörðum þínum, að vér megum seðjast af gæðum húss þíns, helgidómi musteris þíns.

⁵(65:6) Með óttalegum verkum svarar þú oss í réttlæti, þú Guð hjálpræðis vors, þú athvarf allra jarðarinnar endimarka og fjarlægra stranda,

⁶(65:7) þú sem festir fjöllin með krafti þínum, gyrtur styrkleika,

⁷(65:8) þú sem stöðvar brimgný hafsins, brimgnýinn í bylgjum þess og háreystina í þjóðunum,

⁸(65:9) svo að þeir er búa við endimörk jarðar óttast tákn þín, austrið og vestrið lætur þú fagna.

⁹(65:10) Þú hefir vitjað landsins og vökvað það, blessað það ríkulega með læk Guðs, fullum af vatni, þú hefir framleitt korn þess, því að þannig hefir þú gjört það úr garði.

¹⁰(65:11) Þú hefir vökvað plógför þess, jafnað plóggarða þess, með regnskúrum hefir þú mýkt það, blessað gróður þess.

¹¹(65:12) Þú hefir krýnt árið með gæsku þinni, og vagnspor þín drjúpa af feiti.

¹²(65:13) Það drýpur af heiðalöndunum, og hæðirnar girðast fögnuði.

¹³(65:14) Hagarnir klæðast hjörðum, og dalirnir hyljast korni. Allt fagnar og syngur.