Sálmarnir 75

¹Vér lofum þig, ó Guð, vér lofum þig, og þeir er ákalla nafn þitt, segja frá dásemdarverkum þínum.

²(75:3) "Þegar mér þykir tími til kominn, dæmi ég réttvíslega.

³(75:4) Þótt jörðin skjálfi með öllum þeim, er á henni búa, þá hefi ég samt fest stoðir. [Sela]

⁴(75:5) Ég segi við hina hrokafullu: Sýnið eigi hroka! og við hina óguðlegu: Hefjið eigi hornin!

⁵(75:6) Hefjið eigi hornin gegn himninum, mælið eigi drambyrði hnakkakerrtir!"

⁶(75:7) Því að hvorki frá austri né vestri né frá eyðimörkinni kemur neinn, sem veitt geti uppreisn,

⁷(75:8) heldur er Guð sá sem dæmir, hann niðurlægir annan og upphefur hinn.

⁸(75:9) Því að bikar er í hendi Drottins með freyðandi víni, fullur af kryddi. Af því skenkir hann, já, dreggjar þess súpa og sötra allir óguðlegir menn á jörðu.

⁹(75:10) En ég vil fagna að eilífu, lofsyngja Jakobs Guði.

¹⁰(75:11) Öll horn óguðlegra verða af höggvin, en horn réttlátra skulu hátt gnæfa.