Sálmarnir 76

¹Guð er augljós orðinn í Júda, í Ísrael er nafn hans mikið.

²(76:3) Skáli hans er í Salem og bústaður hans á Síon.

³(76:4) Þar braut hann sundur leiftur bogans, skjöld og sverð og hervopn. [Sela]

⁴(76:5) Þú birtist dýrlegur, ógurlegri en hin öldnu fjöll.

⁵(76:6) Hinir harðsvíruðu urðu öðrum að herfangi, þeir sofnuðu svefni sínum, og hendurnar brugðust öllum hetjunum.

⁶(76:7) Fyrir ógnun þinni, Jakobs Guð, hnigu bæði vagnar og hestar í dá.

⁷(76:8) Þú ert ógurlegur, og hver fær staðist fyrir þér, er þú reiðist?

⁸(76:9) Frá himnum gjörðir þú dóm þinn heyrinkunnan, jörðin skelfdist og kyrrðist,

⁹(76:10) þegar Guð reis upp til dóms til þess að hjálpa öllum hrjáðum á jörðu. [Sela]

¹⁰(76:11) Því að reiði mannsins verður að lofa þig, leifum reiðinnar gyrðir þú þig.

¹¹(76:12) Vinnið heit og efnið þau við Drottin, Guð yðar, allir þeir sem eru umhverfis hann, skulu færa gjafir hinum óttalega,

¹²(76:13) honum sem lægir ofstopa höfðingjanna, sem ógurlegur er konungum jarðarinnar.