Нақыл сөздер 11

¹Жалған таразы Жаратқанға жиренішті, Адал таразы Оған ұнамдысы.

²Менмендікке масқара серік, Кішіпейілге даналық серік.

³Әділ жанды адалдығы жетелер, Арамзаның түбіне сұмдығы жетер.

⁴Қаһарлы күнде байлықтан пайда болмайды, Ал әділдік өлімнен аман сақтайды.

⁵Таза жанның әділдігі жолын түзер, Арамзаны зұлымдығы сүріндірер.

⁶Әділді адалдығы құтқарар, Алдамшы ашкөздігінен ұсталар.

⁷Арамза өлгенде үміті үзілер, Зұлымның күткені босқа кетер.

⁸Әділ жан пәледен құтқарылар, Арамза оның орнына соған ұшырар.

⁹Арсыз адам сөзімен жақынын жояр, Әділ жан түсінігімен аман қалар.

¹⁰Әділдің амандығына қала қуанар, Зұлымның құруына мәз-мейрам болар.

¹¹Әділдің ақ батасымен қала өркендер, Зұлымның жалған тілінен бытырап кетер.

¹²Ақылсыз көршісін келекелер, Ақылды аузына ие боп жүрер.

¹³Өсек тасыған сырыңды ашар, Адал жан ісіңді құпия сақтар.

¹⁴Жетекшіге зәру ел тозар, Кеңесшісі мол ел озар.

¹⁵Бөтенге кепіл болған пәлеге ұшырар, Кепілдіктен бас тартқан қауіпсіз болар.

¹⁶Сүйкімді әйел абыройға бөленер, Күш сала істеген байлықты иемденер.

¹⁷Қайырымды өз жанына рақым табар, Қатыгез өз тәніне зиян туғызар.

¹⁸Арамза өткінші өнім жинайды. Әділдік сепкеннің сыйы тозбайды.

¹⁹Шын әділдік өмір сыйлар, Зұлымдыққа ұмтылған өлім табар.

²⁰Зымиян жаннан Жаратқан жиренер, Мінсіз жүргенге Ол сүйсінер.

²¹Сөз жоқ, зұлым жан жазасын тартар, Әділдің ұрпағы аман құтылар.

²²Әдемі, алайда әдепсіз әйел заты Шошқа мұрнындағы алтын сырға сияқты.

²³Әділдің тілегені жақсылықпен бітер, Зұлымның күткені ашу-ызамен бітер.

²⁴Қолы ашық адам байи түсер, Тым сараң жан кедейлене түсер.

²⁵Жомарт жан игілікке кенелер, Басқаны сергіткен өзі де сергір.

²⁶Аштықта астық жасырғанды жұрт қарғар, Астығын елге сатқанға батасын жаудырар.

²⁷Жақсылыққа ұмтылған рақым іздеп табар, Зұлымдыққа ұмтылған зұлымдыққа тап болар.

²⁸Байлығына сенім артқан сүрінер, Ал әділ жан жапырақтай көгерер.

²⁹Отбасының берекесін кетірген дымсыз қалар, Зердесіз зерделі жанға қызмет қылар.

³⁰Әділ жанның жемісі өмір сыйлар ағашқа ұқсар, Зерделі жан адамдарды әділдікке тартар.

³¹Әділ жан бұ дүниеде тиістісін алмақ, Зұлым мен күнәкар одан бетер жазаланбақ.