Нақыл сөздер 12

¹Тәрбиені ұнатқан — білімді де ұнатқан, Ал ескертуді жек көрген — санасыз надан.

²Ізгі жанды Жаратқан Ие ұнатар, Зымиянға Ол үкімін шығарар.

³Адам зұлымдықпен берік болмас, Ал әділ жанның түп-тамыры мызғымас.

⁴Ізгі әйел күйеуінің абыройын асырар, Арсыз әйел күйеуінің қуатын тауысар.

⁵Әділдің ой-ниеті әділетті, Арамзаның кеңесі алдамшы.

⁶Зұлымның сөзі қан төгер тұзақ құрар, Әділдің сөзі пәледен құтқарар.

⁷Зұлым құлап, із-түзсіз жоқ болар, Әділдің шаңырағы берік тұрар.

⁸Ақылына қарап адамды мақтар, Ойы бұзық жан жексұрын болар.

⁹Кеуде көтеріп аш жүргеннен гөрі, Адал еңбек еткен қарапайым жан игі.

¹⁰Ізгі жан малының да қамын ойлар, Арамзаның жүрегі қатыгез болар.

¹¹Жерін өңдегеннің қарны тоқ, Бос қиял қуғанның ақылы жоқ.

¹²Зұлымның олжасына сұрқия көз салар, Тамыры берік әділ жан жемісті болар.

¹³Арамза жалған сөзінен ұсталар, Әділ жан пәледен аман құтылар.

¹⁴Аузынан шыққан жақсы сөзі адамды тоқ қылар, Еңбек еткен қолы да ақысын алар.

¹⁵Ақымақ жүрген жолым тура дер, Дана жан кеңеске құлақ түрер.

¹⁶Ақымақтың ашуы бірден бетіне шығар, Ақылды жан шеккен жәбіріне немқұрайды қарар.

¹⁷Білген шындығын айтқан әділдікті паш етер, Жалған куәгер болған опасыздық етер.

¹⁸Мылжың өз тілімен семсердей шағар, Дана өз тілімен жанның жарасын сауықтырар.

¹⁹Шыншылдың сөзі мәңгілік, Өтірікшінің сөзі бір-ақ сәттік.

²⁰Зұлымдық ойлағанның жүрегі толған сұмдық, Татулық ойлағанның жүрегі толған шаттық.

²¹Әділге күнәнің кесірі жұқпас, Зұлым толған пәлесінен арылмас.

²²Жалған тіл Жаратқанға жиренішті, Ақиқатты айтатын Оған сүйкімді.

²³Зерделі білімін жасырар, Зердесіз надандығын жариялар.

²⁴Еңбекқор қол билікке жеткізер, Жалқау қол құлдыққа түсірер.

²⁵Сары уайым адамның еңсесін басар, Жақсы сөз оның көңілін тасытар.

²⁶Әділ жан серіктерін ақ жолмен бастар, Арамзаның жолы оларды адастырар.

²⁷Жалқау аң аулап, етін қуыруға да ерінер, Ал еңбекқордың меншігі құндана түсер.

²⁸Әділдік жолында шынайы өмір бар, Онымен жүрген мәңгі өлімнен құтылар.