Нақыл сөздер 13

¹Ақылды бала әке тәрбиесін қабыл алар, Ал мысқылшыл ескертуге құлақ аспас.

²Адам игі сөздерінің жемісін көрер, Ал опасыз жан зорлық-зомбылық көздер.

³Аузына ие болған өмірін сақтар, Аузын айқара ашқан пәлеге ұшырар.

⁴Жалқау мол аңсағанмен аз алар, Ынтамен еңбек еткен тоқ болар.

⁵Әділ өтірік сөзді жек көрер, Зұлым арсыз ісімен абыройын төгер.

⁶Таза жанды әділдігі аман сақтар, Күнәкарды зұлымдығы құлатар.

⁷Бай болғансыған біреудің түгі де жоқ, Ал кедейсіген басқа біреу байлыққа тоқ.

⁸Байлық байдың өміріне төлем болар, Ал кедей қоқан-лоқыдан аман болар.

⁹Әділдің нұры жарқырап жанар, Зұлымның шырағы өшіп қалар.

¹⁰Менмендік дау-жанжал туғызар, Даналық ақылдасқандарда болар.

¹¹Оңай олжа тез таусылар, Еңбекпен жинаған байлығын молайтар.

¹²Ұзаққа созылған үміт жүрек қажытар, Орындалған тілек өмірді құлпыртар.

¹³Нақыл сөзді елемеген кесірін көрер, Нұсқауды құрметтеген пайдасын көрер.

¹⁴Данышпанның тәлімі — өмір бұлағы, Ол адамды ажал торынан құтқарады.

¹⁵Ақыл-парасат адамды ұнамды қылар, Зымиянның жолы тым ауыр болар.

¹⁶Зерделі білгірлікпен әрекет етер, Зердесіз надандығын паш етер.

¹⁷Зұлым хабаршы пәлеге тап болар, Адал хабаршы амандық орнатар.

¹⁸Тәрбиеден безген жоқтық пен масқараға ұшырар, Ескертуге көңіл бөлген қадір-құрметке ие болар.

¹⁹Аңсағаны іске асса көңіл сүйсінер, Арам ісінен қайтудан надан жиренер.

²⁰Данамен жолдас болған дана болар, Наданмен жолдас болған пәлеге қалар.

²¹Күнәкардың соңынан пәле қалмас, Әділ жан ізгі сыйынан ада қалмас.

²²Ізгі жанның мұрасы үрім-бұтағына қалар, Күнәкардың байлығы әділ жанға сақталар.

²³Кедей жыртқан тың жерден егін бітік шығар, Ал әділетсіздіктің кесірінен бір бөлігі ұрланар.

²⁴Жазасын тартқызбаған баласын сүймейді, Баласын сүйген оны жасынан тәрбиелейді.

²⁵Әділ жан тамағын тойып ішер, Арамзаның қарны аш жүрер.