Забур жырлары 119

¹Пәк таза да тура жолмен жүріп, Жаратқанның тәліміне бағынғандар бақытты!

²Иеміздің ережелерін ұстанып, Шын жүректен Оған бет бұрғандар бақытты!

³Олар әділетсіздік істемейді, Тек Жаратқанның жолымен ғана жүреді.

⁴Ием, тұрақты орындауымыз үшін, Өз бұйрықтарыңды шығарған едің.

⁵Сенің жарлықтарыңа бағынып мен Жүре берсем, шіркін, тура жолыңмен!

⁶Сонда ден қойып бар өсиеттеріңе, Ешқашан масқара болмас та едім.

⁷Әділ шешімдеріңді үйренгенде Сені дәріптеймін таза жүрекпен.

⁸Мен жарлықтарыңды ұстана берем, Жалғыз қалдыра көрме мені мүлдем.

⁹Жастар қалай таза жолмен жүре алады? Сөзіңе бағынып соны істей алады.

¹⁰Шын жүректен Саған бет бұрып келемін, Тайдыра көрме мені өсиеттеріңнен.

¹¹Күнә жасамауым үшін Саған қарсы, Жүрегіме сақтадым айтқандарыңды.

¹²Даңқталуға лайықсың, уа, Жаратқан, Үйрете гөр жарлықтарыңды маған.

¹³Мен дауыстап айтып та отырамын Бар шешімдеріңді Өзің шығарған.

¹⁴Жұрт шаттана қуанғандай мол байлыққа, Мен ережелеріңмен жүремін шаттана.

¹⁵Бұйрықтарың жайлы терең ойланамын, Сенің жолыңа мұқият ден қоямын.

¹⁶Жарлықтарыңды қуана орындаймын, Сөздеріңді ешқашан ұмытпаймын.

¹⁷Уа, Ием, мол мейірім көрсете гөр маған, Сонда аман болып, сөзіңді сақтай аламын.

¹⁸Рухани көзімді аша гөр менің, Тәліміңнен кереметтер көрейін.

¹⁹Бұ дүниеде жат жерлік кірмедеймін. Өсиеттеріңді жасыра көрме менен.

²⁰Шешімдеріңді үйренуді сағынып, Жаным әрдайым шөліркейді зарығып.

²¹Сөгіп ескертесің тәкаппар адамдарды, Өсиеттеріңнен тайған сол қарғалғандарды.

²²Масқара, қорлықты алып тастай гөр менен, Ережелеріңді ұстанып келемін мен.

²³Әкімдер жиналып, мені өсектегенмен, Жарлықтарың жайлы толғанамын, уа, Ием.

²⁴Ережелеріңнен рақат табамын, Олар маған ақыл береді әрдайым.

²⁵Ажал аузында жанымның жатқаны-ай, Аман сақтай гөр берген уәдеңе сай!

²⁶Жүрген жолдарымды айтып бергенімде Өзің құлақ салып, жауап бердің де, Жарлықтарыңды маған үйрете гөр енді.

²⁷Ұқтыра гөр бұйрықтарыңның мағынасын, Кереметтерің жайлы терең ойланамын.

²⁸Жаныма қайғы батып, шаршап-шалдыққам, Уәдеңе сәйкес күш сыйлай гөр маған.

²⁹Тәліміңді маған сыйлап рақымменен, Жалғандық жолын алшақтата гөр менен.

³⁰Шындық жолымен жүруді таңдап алдым да, Шешімдеріңді ұстаймын мен көз алдымда.

³¹Берік ұстанамын Сенің ережелеріңді, Уа, Жаратқан, ұятқа қалдыра көрме мені.

³²Менің жүрегімді азат еттің Сен, Жүремін өсиеттеріңнің жолымен.

³³О, Ием, үйретсеңші жарлықтарыңның жолын, Оны соңына дейін берік ұстанбақпын.

³⁴Түсінік сыйлашы, тәліміңді сақтамақпын, Оған шын жүректен мойынсұнбақпын.

³⁵Жүргізе гөр мені өсиетіңнің жолымен, Содан зор қуаныш тауып келемін мен.

³⁶Жан дүнием пайдақорлыққа салынбасын, Оны ережелеріңе құштар етсең, шіркін!

³⁷Бос нәрселерге түсірмей көзімді, Өз жолыңда жаңарта гөр өмірімді.

³⁸Ием, орындай гөр маған берген сөзіңді, Содан бәрі терең қастерлесін Өзіңді.

³⁹Менен алшақтата гөр үрейлі масқараны, Себебі шешімдерің сондай жақсы!

⁴⁰Қалаймын бұйрықтарыңа бағынуды, Әділдігіңмен сергіте гөр жанымды.

⁴¹Уа, Жаратқан, маған рақымыңды түсіре гөр, Берген сөзіңе сай мені құтқара гөр.

⁴²Сонда сөккенге жауап бере аламын, Сенің сөзіңе сенімімді артамын.

⁴³Шындық сөзін алып қойма аузымнан, Шешімдеріңе үмітімді артамын,

⁴⁴Тәліміңді мен ұдайы ұстанамын, Әрдайым оны орындайтын боламын.

⁴⁵Содан жүрісім де болады емін-еркін, Себебі бұйрықтарыңа бет бұрып келемін.

⁴⁶Патшалар алдында ережеңді айтамын, Сонда ешқандай қаймықпайтын боламын.

⁴⁷Өсиеттеріңді қатты ұнатамын, Олардан жұбаныш пен рақат табамын.

⁴⁸Өсиеттеріңді сүйіп, қабылдаймын, Жарлықтарың жайлы үңіле ойлаймын.

⁴⁹Ескере гөр пендеңе берген уәдеңді, Өзің қалайсың соған үміттенуімді.

⁵⁰Сенің сөзің мені жандандырады, Бұл мені жапа шеккенде жұбатады.

⁵¹Паң жандар мені мазақтай бергенмен, Тағылымыңнан тайып кетпедім мен.

⁵²Ежелгі шешімдеріңді еске аламын, Уа, Жаратқан, содан жұбаныш табамын.

⁵³Тағылымыңнан безген зұлымдарды Көргенімде ашу кернейді бойымды.

⁵⁴Жат жерлік болып тұрған жақтарда мен Жарлықтарыңды жырлап жүремін.

⁵⁵Уа, Жаратқан, түнде атыңды есіме саламын, Сенің тәліміңді ұдайы ұстанамын.

⁵⁶Бұл менің берік әдетіме айналды: Іске асырамын берген бұйрықтарыңды.

⁵⁷Уа, Жаратқан, Өзіңсің менің үлесім, Сөздеріңді сақтаймын деп уәде бердім.

⁵⁸Шын жүректен сиынып келемін Саған: Уәдеңе сай рақымды бола гөр маған.

⁵⁹Жүрген жолдарыма түңіле толғандым, Ережелеріңмен жүруге бел будым.

⁶⁰Мен өсиеттеріңді тез орындап, Кешеуілдеткен жоқпын жалтақтап.

⁶¹Зұлымдар шырмап алды айналамды, Ал мен ұмытпадым тағылымыңды.

⁶²Сені әділ шешімдеріңе бола Дәріптеймін, тұрып түн ортасында.

⁶³Мен Сені терең қастерлеген жандардың Әрі бұйрықтарыңды ұстанғандардың Барлығымен де жақын жолдаспын.

⁶⁴Жер мейіріміңе толы, о, Жаратқан, Жарлықтарыңды үйрете гөр маған.

⁶⁵Берген сөзіңе сай, уа, Жаратқан, Көп жақсылық жасап келесің маған.

⁶⁶Мені үйретші дұрыс түсінік пен білімге, Себебі сенемін Сенің өсиеттеріңе.

⁶⁷Мен азап шекпес бұрын жолдан адасқан едім, Ал енді Сенің сөзіңді сақтап жүремін.

⁶⁸Ізгісің Сен, істейсің игі істеріңді, Үйрете көрші маған ережелеріңді.

⁶⁹Тәкаппарлар жапса да маған жалаларын, Мен шын жүректен бұйрықтарыңа бағынамын.

⁷⁰Олардың жүрегі сезімсіз боп қасарысқан, Ал мен рақат табамын тағылымыңнан.

⁷¹Үйренуім үшін жарлықтарыңды, Азап шеккенім маған жақсы болды.

⁷²Мыңдаған алтын-күміс ақшалардан Аузыңнан шыққан тәлімің қымбат маған!

⁷³Сенің қолың мені жаратып қалыптастырды, Енді түсінік сыйлап, үйрете гөр бұйрықтарыңды.

⁷⁴Сені қастерлейтіндер мені көргенде шаттансын, Себебі Сенің сөзіңе сенімімді артамын.

⁷⁵Сенің шешімдеріңнің әділдігін мойындаймын, Мені жазалағаның да әділ, уа, Жаратқаным.

⁷⁶Осы пендеңе берген уәдеңе сай мейірімің Маған ұдайы жұбаныш бола берсін.

⁷⁷Рақымың түсіп, мен аман болайын, Тағылымыңнан қуаныш табайын.

⁷⁸Мені себепсіз езген паңдар масқаралансын, Ал мен бұйрықтарың туралы толғанамын.

⁷⁹Қастерлеп Сені, ережелеріңді білетін Кісілер маған бет бұрып, қосылса, шіркін!

⁸⁰Масқара болмауым үшін жүрегім менің Жарлықтарыңа түгел адал бола берсін!

⁸¹Құтқаруыңды аңсап шаршап келемін, Бірақ Сенің сөзіңе үміттенемін.

⁸²«Мені қашан жұбатасың?» деп зарығып, Көзім талды сөзіңнің іске асуын тосып.

⁸³Түтінге қақталған торсықтай мен Еш нәрсеге жарамсыз көрінгенмен, Шығармадым жарлықтарыңды есімнен.

⁸⁴О, Ием, мен тағы қанша уақыт тосайын, Мені қудалағандарды қашан соттайсың?

⁸⁵Сол тәкаппарлар Сенің заңыңа қарсы Мені құлатпақ болып терең ор қазды.

⁸⁶Күллі өсиет атаулың адал да ақиқат, Жар бола гөр, жау артымнан қуады нақақ!

⁸⁷Олар мені аластата жаздады жерден, Бірақ Сенің бұйрықтарыңнан безбедім мен.

⁸⁸Сақтауым үшін шығарған ережелеріңді, Рақымыңа сай нығайта гөр өмірімді.

⁸⁹Сенің айтқан сөздерің, Жаратқан Ием, Көкте тұр мәңгілікке бекітілген!

⁹⁰Күллі келер ұрпаққа адал боласың, Жер бола береді, Сен оны орнаттың.

⁹¹Шешімдеріңе сай бұған дейін бәрі тұрады, Бір Өзіңе барлығы да қызмет қылады.

⁹²Сенің тәлімің мені жұбатып қуантпағанда, Құрып кеткен болар едім мүшкіл жағдайымда.

⁹³Ешқашан ұмытпаймын ережелеріңді, Солармен аман сақтайсың өмірімді.

⁹⁴Құтқара гөр мені, себебі Сенікімін, Мен бұйрықтарыңа көңіл бөліп келемін.

⁹⁵Зұлымдар аңдып жүр мені құртуға, Мен болсам үңілемін жарлықтарыңа.

⁹⁶Әр кемелдіктің шегі бар екенін түсіндім, Ал аясы шексіз Сенің өсиеттеріңнің!

⁹⁷Сенің тәліміңді сондай қатты сүйемін! Күні бойы сол жайлы ойланып та жүремін.

⁹⁸Өсиеттерің есімде мәңгі бақи қалады, Олар мені жауларымнан парасатты қылады.

⁹⁹Бар ұстазымнан терең ұға аламын, Себебі жарлықтарың туралы толғанамын.

¹⁰⁰Тіпті жасы үлкендерден де білімдірекпін, Себебі бұйрықтарыңды сақтап келемін.

¹⁰¹Сенің сөздеріңді ұстанып келемін, Сол үшін теріс жолдан аулақ жүремін.

¹⁰²Сенің шешімдеріңнен тайып кетпеймін, Өйткені Өзің маған тәлім беріп келесің.

¹⁰³Қандай тамаша Сенің сөзіңнің дәмі, Ол тіпті тіл үйірген балдан да тәтті!

¹⁰⁴Ақыл-кеңес табамын бұйрықтарыңнан, Бар жалған жолдар сондай жексұрын маған!

¹⁰⁵Сенің сөздерің қадамдарымды жарқыратады, Өмір жолыма шам-шырақтай нұрын шашады.

¹⁰⁶Мен ант еттім әділ шешімдеріңді сақтауға, Сөзімде тұрып, сертімді орындаймын да.

¹⁰⁷Уа, Жаратқан Ие, қиналып жүрмін тым қатты, Берген сөзіңе сай өмірімді жаңартсаңшы!

¹⁰⁸Аузымнан шыққан мадақтауымды, уа, Жаратқан, Ерікті сый-тарту деп менен қабылдасаң, Әрі өз шешімдеріңді үйретсеңші маған,

¹⁰⁹Әрқашан жанымды қиюға дайынмын, Сенің тәліміңді есімнен шығармаймын!

¹¹⁰Зұлымдар маған тор салып, тұзақ құрған, Ал мен тайып кетпедім бұйрықтарыңнан.

¹¹¹Ережелеріңді қабылдадым мәңгі мұраға, Жүрегімді кенелтеді олар қуанышқа.

¹¹²Жүрегімде нық шешім қабылдадым бағынуға Ақырына дейін Сенің жарлықтарыңа.

¹¹³Жалтақтайтын жандарды еш жақтырмаймын, Сенің тәліміңді қатты ұнатамын!

¹¹⁴Сен қорғанымсың әрі қалқаным, Сенің сөзіңе сенімімді артамын.

¹¹⁵Әй, әділетсіздер, аулақ кетіңдер қасымнан, Құдайымның өсиеттерін ұстанатын болам.

¹¹⁶Тірі қалуым үшін мені қолдасаңшы, Берген уәдең бойынша нығайтсаңшы, Үмітім Өзіңде: ұятқа қалдырмасаңшы.

¹¹⁷Мені қолдай гөр, сонда аман қаламын, Жарлықтарыңа ұдайы ден қоямын.

¹¹⁸Жарлықтарыңнан безгендерді құлатасың, Құр бекер — айлалы қылықтары олардың.

¹¹⁹Қоқыстай шығарасың жердің бар зұлымдарын, Ережелеріңді сондықтан қатты ұнатамын.

¹²⁰Тұла бойым дірілдеп Сенен қорқамын, Шешімдеріңді елемеуден шошынамын.

¹²¹Қуғыншылардың қолына түсіре көрме мені, Жасап келемін ғой әділ де дұрыс істерді.

¹²²Осы пендеңді игілікке жеткізіп, қолдай гөр, Паң жандардың жәбірінен мені сақтай гөр!

¹²³Әділ уәдеңнің іске асуын тосып, Көзім талды құтқаруыңды аңсай күтіп.

¹²⁴Осы пендеңе рақымшылықпен қарай гөр, Жарлықтарың жайлы тәлім бере гөр.

¹²⁵Пендеңмін, түсінік сыйлай гөр маған, Сонда ережелеріңді ұғына аламын.

¹²⁶Уа, Жаратқан, шара қолданатын уақытың жетті: Адамдар Таурат заңыңа бағынбай кетті!

¹²⁷Ал мен Сенің өсиеттеріңді алтыннан Артық көремін, әрі саф алтыннан!

¹²⁸Содан бар бұйрықтарыңды әділ деп санаймын, Бүкіл бұрыс жолдарды да жақтырмаймын.

¹²⁹Сондай керемет — Сенің ережелерің, Сондықтан оларға шын жүректен көнемін.

¹³⁰Мәнісі ашылғанда сөздерің нұрын шашады, Білімсіздердің де санасын оятып ашады.

¹³¹Аузын ашып, ауаға зәру болған кісідей, Мен шексіз құштармын Сенің өсиеттеріңе.

¹³²Есіміңді сүйген өзгелерге істегеніңдей, Маған да бет бұрып, көрсете гөр мейіріміңді.

¹³³Қадамдарымды табанды ете гөр сөзіңмен, Еш жамандық жүргізбесін маған өктемдігін!

¹³⁴Мені құтқара гөр адамдардың езгісінен, Сонда бұйрықтарыңды сақтай аламын мен.

¹³⁵Уа, Ием, маған нұрын төгіп бет-жүзіңнің, Үйрете гөр ережелеріңді Өзіңнің.

¹³⁶Көпшілік көнбегендіктен тағылымыңа, Көз жасым менің көл болып ағылуда.

¹³⁷Уа, Жаратқан Ие, Сен әділсің, Әрі әділетті күллі шешімдерің!

¹³⁸Әділдікпен және шексіз адалдықпен Ережелеріңді белгілеп бердің Сен.

¹³⁹Сөздеріңді менсінбейді дұшпандарым, Соған қатты налып, шаршап-шалдығамын.

¹⁴⁰Уәделеріңнің шындығы іс жүзінде сыналған, Уа, Ием, оларды қатты ұнатамын сондықтан.

¹⁴¹Жұрт менсінбей, кішік болғаныммен, Бас тартпаймын Сенің ережелеріңнен.

¹⁴²Сенің әділдігің — мәңгі бақи хақ, Әрі тағылымың — нағыз ақиқат.

¹⁴³Ауыртпалыққа ұшырап, қысылып қалдым, Ал өсиеттеріңнен жұбаныш пен рақат таптым.

¹⁴⁴Мәңгілік әділетті ережелерің Сенің, Түсінік сыйлай гөр шын өмір сүруім үшін.

¹⁴⁵Уа, Ием, шын жүректен Саған сиынамын: Құлақ сала гөр, жарлықтарыңа бағынамын.

¹⁴⁶Мені құтқара гөр деп Саған жалынамын, Ережелеріңді ұстанатын боламын.

¹⁴⁷Таң атпас бұрын Сені көмекке шақырамын, Сенің берген сөзіңе сенімімді артамын.

¹⁴⁸Сөзіңе терең үңілу мақсатында Ұйқыдан бас тартамын таң алдында.

¹⁴⁹Уа, Ием, рақыммен үніме құлақ сала гөр, Әділдігіңе сай өмірімді нығайта гөр!

¹⁵⁰Сұм жоспар құрғандар таяп қалды маған, Олар алшақтап кетті тағылымыңнан.

¹⁵¹Ал, Жаратқан Ие, Сен маған жақынсың, Нағыз шындық — күллі өсиет атаулың.

¹⁵²Баяғыда-ақ мен Сенің ережелеріңнен Оларды мәңгілік орнатқаныңды білгенмін.

¹⁵³Мүшкіл халіме көз салып құтқарсаңшы, Есімнен шығармадым тағылымыңды.

¹⁵⁴Сен мені жақтап, мүддемді қорғасаңшы, Уәдеңе сәйкес өмірімді сақтасаңшы.

¹⁵⁵Құтқарылу тым алыс зұлымдардан, Өйткені олар безеді жарлықтарыңнан.

¹⁵⁶Уа, Ием, ұлан-ғайыр — Сенің мейірімің, Шешіміңе сай нығайта гөр өмірімді менің.

¹⁵⁷Мені қудалауда жаулар сонша көптеген, Бірақ мен бас тартпаймын ережелеріңнен.

¹⁵⁸Опасыздарды көргенде жиренемін, Олар сақтамайды сөздеріңді Сенің.

¹⁵⁹Бұйрықтарыңды қалай сүйетініме қарасаңшы, О, Ием, рақымыңа сай өмірімді нығайтсаңшы.

¹⁶⁰Түп-тамырымен ақиқат Сенің сөздерің, Әділетті де мәңгілік әрбір шешімің.

¹⁶¹Басшылар жазықсыз мені қудалайды, Ал жүрегім сөздеріңді қастерлеп қалтырайды.

¹⁶²Зор олжаға тап болған адам сияқты, Сенің сөздеріңе қуанамын сондай қатты!

¹⁶³Жалғандықты жек көріп, одан жиренемін, Өзіңнің тағылымыңды қатты сүйемін!

¹⁶⁴Өзіңді әділетті шешімдерің үшін Сені күніне жеті рет дәріптеудемін.

¹⁶⁵Тәліміңді сүйгендер тыныштыққа кенелер, Ештеңеге сүрінбей, аман-есен жүрер.

¹⁶⁶Уа, Ием, өсиеттеріңді іске асырамын, Мені құтқарасың деп үміттене тосамын.

¹⁶⁷Ережелеріңді жан дүниемде сақтап келемін, Өйткені мен оларды қатты сүйемін.

¹⁶⁸Мойынсұнамын ережелерің мен заңдарыңа, Барлық жүрген жолдарым Сенің көз алдыңда.

¹⁶⁹Жалбарынған үнім құлағыңа жетсе екен, Түсінік сыйлай гөр уәдеңе сай, уа, Ием.

¹⁷⁰Өтінішім Өзіңнің алдыңа жетсінші, Берген сөзіңе сай мені құтқара көрші.

¹⁷¹Сен маған үйреткендіктен ережелеріңді, Лайым аузым мадақтай берсін Өзіңді.

¹⁷²Тілім сөздеріңді ән-жырға қоса берсін, Өйткені әділ күллі өсиеттерің Сенің.

¹⁷⁴Уа, Жаратқан Ием, құтқаруыңды аңсап тосамын, Сенің тағылымыңнан зор қуаныш табамын.

¹⁷⁵Жаным аман қалып, Сені дәріптей берсін, Шешімдерің тірек болып мені қолдай көрсін.

¹⁷⁶Жоғалған қой іспетті адасып келемін, О, Ием, іздеп мені, қасыңа қайтарсаң екен, Өсиеттеріңді енді шығармаймын есімнен.