Забур жырлары 18

¹Уа, Жаратқан Ие, Сені сүйемін, Сен күш-қуатымның қайнар көзісің.

²Жаратқан — жартастай берік қорғаным, Мені қауіп-қатерден құтқарушым, Құдайым — сенім артқан шың құзым, Қалқандай қорғаушым, мықты құтқарушым, Әрі биік таудағыдай баспанам!

³Мадаққа лайық Жаратқанға сиынам, Ол мені арашалайды жауларымнан.

⁴Өлім толқындары жан-жақтан құрсады, Заңсыздық тасқыны көміп тастады,

⁵Ажалдың шынжыры мені матады, Өлімнің торы бұғаулап шырмады.

⁶Қатты қиналып Жаратқанға сиындым, Жәрдем сұрап Құдайыма жалындым. Киелі орнынан Ол құлақ салды, Жалынышым Оның алдына барды.

⁷Сол заматта жер дірілдеп сілкінді, Таулардың негізі шайқалып дірілдеді, Өйткені Құдай қаһарына мінген еді.

⁸Қаһарынан Оның түтін шықты, От лаулап, аузынан жалын атты, Ыстық шоқ ішінен атқылады.

⁹Аспанды ашып Ол төмен түсті, Қара бұлттар болды аяғының асты,

¹⁰Мықты періштелерге мініп алды, Желдің қанаттарында зулап ұшты,

¹¹Түнекті айналдыра перде қылды, Жаңбырдың қалың бұлттарын жамылды,

¹²Қасындағы нұрын бұлттар жасырды, Бұршақ жауып, найзағай жарқылдады.

¹³Жаратқан Ие аспаннан күркіреп шақырды, Алла Тағаланың дауысы жаңғырықты.

¹⁴Жебелер атқылап жауларын шашыратты, Найзағай жарқылдап оларды абдыратты.

¹⁵Көрінді сонда теңіздің арналары, Әрі дүниенің негіздері ашылды, Уа, Жаратқан Ие, қатаң сөгісіңнен, Қаһарлы да құдіретті лебіңнен.

¹⁶Көктен қолын созып, Ол мені ұстап алды, Терең судан Ием мені шығарып алды,

¹⁷Құтқарды мені мықты дұшпанымнан, Өзімнен қуатты қас жауларымнан.

¹⁸Мүшкіл кезімде олар маған бас салды, Жаратқан Ие бірақ тірегім болды,

¹⁹Кең-байтақ жерге Ол мені шығарды, Маған риза болып аман құтқарды.

²⁰Адал жүрген мені Ием қолдады, Пәк істерім үшін игілік сыйлады.

²¹Өйткені Жаратқанның жолымен жүрдім, Арсыз болып Құдайымнан безбедім.

²²Қайта, күллі шешімдері көз алдымда, Оның ережелерінен бас тартпаймын да.

²³Құдайдың алдында мінсіз болып келемін, Күнә жасаудан сақтанып жүремін.

²⁴Жаратқан маған берді әділдігіме қарай, Оның көз алдындағы пәк ісіме сай.

²⁵Ием, рақымды жанға рақым танытасың, Адал жанға адалдықпен қарайсың,

²⁶Таза жүрген жанмен Өзің де тазасың. Арамзаға айламен жауап қайырасың.

²⁷Жәбір көрген жандарды құтқарасың, Бірақ менменді байқап, құлатасың.

²⁸Уа, Ием, маған шырақтай нұр шашасың, Уа, Құдайым, түнегімді жарық қыласың.

²⁹Сенің күшіңмен жау тобын жеңе аламын, Құдайыммен қамалдың үстіне шығамын.

³⁰Күмән жоқ, Құдайдың жолы мінсіз, Жаратқанның сөзі де еш мүлтіксіз. Құдайға сенім артқан бар жандарға Ол — қалқандай қорған әрі берік баспана.

³¹Жаратқан Иеден басқа кім Құдай екен? Құдайымыздан басқа кім қорғайтын құз екен?

³²Құдай мені күш-қуатқа бөлейді, Мінсіз өмір жолымен жетелейді,

³³Аяғымды бұғыдай жүйрік қылады, Биік жерлерімде аман тұрғызады.

³⁵Сен құтқаруыңды қалқандай сыйладың, Мені қолдайды құдіретті қолың, Жоғарылатады мені шапағатың.

³⁶Жолда қадамдарымды ұлғайтасың, Аяқтарымды таюдан сақтап қаласың.

³⁷Жауларымның артынан қуып жеттім, Бәрін құртпайынша кері келмедім.

³⁸Олар жеңіліп, қайта тұра алмады, Аяғымның астына менің құлады.

³⁹Шайқасуға маған күш-қуат сыйладың, Қарсыластарды алдыма бас ұрғыздың,

⁴⁰Қалған жауларды қашуға мәжбүр қылдың. Мені жек көргендердің көздерін құрттым,

⁴¹Көмекке шақырды олар, ешкім құтқармады, Жаратқанға жалынды, Ол құлақ салмады.

⁴²Жауларды желмен ұшқан шаңдай ұнтақтадым, Далаға батпақтай лақтырып тастадым.

⁴³Сен мені халықтың бүлігінен құтқардың, Әрі басшысы етіп қойдың өзге ұлттардың. Бөтен халық енді маған қызмет етеді,

⁴⁴Олар да айтқанымды екі етпейді, Бөгде ұлттар алдымда құлдық ұрады,

⁴⁵Жат жұрттықтар қатты қорқып бозарады, Дірілдеп өз қамалдарынан шығады.

⁴⁶Жаратқан тірі! Құздай Қорғаушым мақталсын, Құтқарушы Құдайым лайым даңқталсын!

⁴⁷Құдайым мүддемді қорғаған, Әрі халықтарды маған бағындырған,

⁴⁸Жауымнан өзімді аман сақтап қалған. Жоғары қойдың мені қарсыластардан, Сен құтқарып алдың зорлықшылдардан.

⁴⁹Басқа халықтар арасында сондықтан, Уа, Жаратқан Ием, Сені мадақтаймын, Сенің атыңа ән-жырымды арнаймын.

⁵⁰Сен Өзіңнің тағайындаған патшаңа: Дәуітке және оның ұрпақтарына Ұдайы ұлы жеңістер сыйлайсың, Тұрақты мейіріміңді бағыштайсың.