Забур жырлары 51

¹Шексіз сүйіспеншілігіңе бола, О, Құдай, маған рақым ете гөр, Мейіріміңнің молдығына бола Қылмыстарымды өшіріп тастай гөр.

²Мені әділетсіздігімнен арылтып, Күнәларымнан түгел тазарта гөр.

³Қылмыстарымды жақсы білемін де, Күнәларым әрдайым тұр есімде.

⁴Мен Өзіңе қарсы күнә жасадым, Сенің көз алдыңда зұлымдық істедім. Осылай әділ Сенің айтқандарың, Мүлтіксіз де маған жүргізген сотың.

⁵Мен күнәкар болып дүниеге келдім, Құрсақта жатқанда-ақ күнәкар едім.

⁶Сен жүректің таза болуын қалайсың, Жан дүниеме даналық та құясың.

⁷Құрбандық қанын бүркіп, күнәмді кеше гөр, Сонда көз алдыңда пәк таза боламын, Күллі күнәмнан мені жуып-шая гөр, Сонда қардан да аппақ тазарамын.

⁸Шаттық үнін маған қайтадан естірте гөр, Сен әлсіреткен денемді қуанта гөр,

⁹Күнәларыма енді назар аудармай, Бар қылмыстарымды өшіріп тастай гөр.

¹⁰Уа, Құдайым, жүрегімді тазарта гөр, Рухымды берік қылып, жаңарта гөр.

¹¹Қасыңнан мені қуып шыға көрме, Киелі Рухыңды менен ала көрме,

¹²Мені құтқарғаныңа қуантып тағы, Сыйлай гөр азғырылмайтын берік рухты.

¹³Қылмыскерлерге ақ жолыңды үйретейін, Күнәкарлар сонда Саған бұрмақ беттерін.

¹⁴Қан төккен мені арылтсаңшы кінәмнан, Сенсің ғой жалғыз Құтқарушы Құдайым. Тіліммен әділдігіңді мадақтаймын.

¹⁵Аузыма ерік бере гөр, Жаратқан Ием, Сені емін-еркін мадақтап, дәріптейін.

¹⁶Құрбандық шалуымды қаламай тұрсың, Өртеу құрбандығын да ұнатпай тұрсың, Әйтпесе оларды ұсынар да едім.

¹⁷Ал Құдайға ұнамды сый, құрбандық — Күнәсіне шынымен өкінген рух. Шын опық жеп, бағынған жүрекке Сен Теріс қарамайсың, уа, Құдай Ием.

¹⁸Игі еркіңмен Сионды өркендете гөр, Қамалын оның қайта тұрғыза гөр.

¹⁹Сонда Саған ұнамды пәк тартулар Шалынбақ һәм өртелетін құрбандықтар, Үстеліңе торпақтар да ұсынылмақ, Сенің жолыңа солар бағышталмақ.