Забур жырлары 65

¹Сионда Саған, Құдай, мақтау арналады, Өзіңе берілген анттар орындалады,

²Мінажаттар құлағыңа жетеді, Барлық адамдар алды��а келеді.

³Теріс істеріміз жаншып тұр бізді. Ал Сен кешіресің күнәларымызды.

⁴Қандай бақытты — Өзің таңдағандар, Қасыңда, аулаларыңда тұрады олар, Сонда кенелеміз үйіңнің жақсылығына, Киелі ғибадатханаңның рақатына.

⁵Құдай, құлақ саласың әділдікпен, Бізді құтқарасың керемет істермен. Саған үміт артады жер шетіндегілер Және алыс теңіздегі кемешілер.

⁶Сен құдіретіңмен тауларды орнаттың, Күш-қуатқа бөленіп, беліңді будың.

⁷Теңіз толқынының гүрілін тыншыттың, Халықтардың шуылын тыныштандырдың.

⁸Кереметтеріңе таңғалар алыс елдер, Шығыс пен батысқа айтқызасың әндер.

⁹Сен жерді баптап суарып, құнартасың, Уа, Құдай, халықты нанға тойдыру үшін Өзендеріңді суға толтырасың, Жерді Өзің солай дайындайсың.

¹⁰Соқаның іздерін суға қандырасың, Топырақ кесектерін тегіс қыласың, Құйылған нөсермен оларды жұмсартасың, Өсіп шыққан өнімдерін жарылқайсың.

¹¹Солай жылды игілікке бөлейсің, Қайда жүрсең де молшылық бересің,

¹²Иен даланың жайылымдары суланған, Қыраттар құлпырып қуаныш жамылған,

¹³Жайылым қора-қора малға толып, Алқаптар егінменен жайқалып, Бәрі қуана айқайлайды ән салып.