Забур жырлары 75

¹Саған мақтау айтамыз, уа, Құдайым! Сені дәріптейміз, бізге жақынсың, Паш етіледі керемет істерің.

²Сен былай дедің: «Кезін Мен белгілеймін, Әділетті сотты Өзім жүргіземін.

³Шайқалады жер күллі тұрғындарымен, Тіреулерін оның берік ұстаймын Мен».

⁴«Бөсуіңді тоқтат!» — дедім мақтаншаққа, «Жұдырығыңды көтерме! — дедім арамзаға, —

⁵Көкке қарсы да жұдырығыңды көтерме, Тоңмойын болып паңдана сөйлеме!»

⁶Шығыс, батыс не айдаладан келген Ешкім басқаны жоғарылатпас шынымен,

⁷Себебі сотты Құдайдың Өзі жүргізеді, Ол біреуді түсіріп, басқаны көтереді.

⁸Жаратқанның қолында «қаһарлы тостаған», Іші дәмдеуіштермен араласқан Көпірген «жаңа шарапқа» толған. Оны құйып береді Жаратқан, Бар зұлымдар ішуге тиіс содан, Сарқып ішеді тіпті ашытқысынан.

⁹Ал мен Иемнің істерін мәңгі паш етемін, Жақыптың сиынған Құдайын әндетемін,

¹⁰Өйткені Құдай Иеміз былай деген: «Мен зұлымдарды күшінен айырамын, Ал әділдің күш-қуатын молайтамын!»