Забур жырлары 76

¹Құдай танымал Яһуда елінде, Оның аты қастерлі Исраилде,

²Тұрағы Оны�� Иерусалимде, Киелі үйі Сион төбесінде.

³Сонда Ол қиратты жаудың отты жебелерін, Һәм соғыс қалқандары мен семсерлерін.

⁴Уа, Құдай, аңға толы таулардан гөрі Сен салтанаттысың әрі құдіретті.

⁵Тоналды батыл жүректі ер адамдар, Терең ұйқыға батты мықты сарбаздар, Қол көтере алмайды бізге қарсы олар.

⁶Уа, Жақыптың сиынатын Құдайы, Қатты дауыспен сөктің сол жауларды, Сонда бәрі тып-тыныш тұра қалды: Соғыс күймелері және аттары.

⁷Уа, Құдай, айбаттысың, қаһарланғаныңда Кім тұра алар еді Сенің алдыңда?

⁸Жердегі бейшара жандарды құтқаруға Сен сот жүргізіп орныңнан тұрғанда,

⁹Көктен үкім шығардың күнәкарларға, Жер қорқып үнсіз тұрды Сенің алдыңда.

¹⁰Пенденің ашуымен де даңқталасың, Оның қалған ашуын Өзің басасың.

¹¹Ей, айбатты Құдайдың маңындағылар, Жаратқан Иелеріңе беріңдер анттар, Әрі соларыңды мұқият орындаңдар, Барлығың Оған тартулар ұсыныңдар!

¹²Ол әміршілердің батылдығын жояды, Жер патшаларының үрейін ұшырады.