Забур жырлары 80

¹Уа, Исраилдің Бағушысы, құлақ түрші, Бейне қой отарындай жетелейсің Жүсіпті. Уа, керубтер арасында «тақта�� Отырушы, Өзіңнің нұрлы салтанатыңды жайнатшы.

²Ефрем, Бунямин, Манаса руларының Көз алдында зор күшіңді көрсетші, Өзің келіп, бізді құтқарсаң етті!

³О, Құдай, бізді қайтаршы өз жолыңа, Бет нұрыңды төксең бізге тағы да, Құтқарылатын боламыз осылайша.

⁴Уа, Жаратқан, Әлемнің Иесі — Құдайсың, Қашанғы өз халқыңа ашуланасың, Мінажаттарымыздан мүлдем бас тартасың?

⁵Сен халқыңды көз жасымен тойындырдың, Иә, көз жасымен шөлімізді әбден қандырдың,

⁶Сөйтіп мазақтаттың бізді көршілерімізге, Дұшпандарымыз табалап келекелеуде.

⁷Уа, Әлемнің Иесі — Құдай Тағала, Бізді қайтара гөр өз тура жолыңа, Бет нұрыңды төксең бізге тағы да, Құтқарылатын боламыз осылайша.

⁸Бізді Мысырдан жүзім бұтасындай әкелдің, Басқа ұлттарды елден қуып шығардың, Солардың орнына бізді отырғыздың.

⁹Ол үшін тазартып, өңдедің жерді, Сол «бұта» тамыр жайып, толтырды елді,

¹⁰Оның көлеңкесі тауларды жапты, Сабақтары зор самырсындарды басты.

¹¹Бұтақтары созылды теңізге дейін, Өркендері — Евфрат өзеніне дейін.

¹²Енді неге қоршаған дуалын қираттың? Қасынан өткеннің бәрі жұлды жемісін,

¹³Орман қабаны түбін қазып, қопаруда, Түз аңдары жайылып, «бұтаңды» жалмауда!

¹⁴Уа, Әлемнің Иесі, қайта оралсаңшы, О, Құдай, көктен жерге көз салсаңшы, Осы «жүзім бұтасын» қамқорлашы,

¹⁵Құдіретті қолыңмен оны отырғыздың, Сабақтарын Өзіңе арнап өсірдің.

¹⁶«Жүзім бұтаңды» шауып, өртеді жаулар, Бетіңнің ызбарынан жойылады олар.

¹⁷Қолдай гөр оң жағыңдағы халқыңды, Өзіңе арнап нығайтқан ұлтыңды.

¹⁸Сенен енді қайтып безбейміз сонда, Сиынатын боламыз Сенің атыңа, Өмірімізді жаңарта гөр тағы да.

¹⁹Уа, Әлемнің Иесі — Құдай Тағала, Бізді қайтара гөр өз тура жолыңа, Бет нұрыңды төксең бізге тағы да, Құтқарылатын боламыз осылайша.