Забур жырлары 81

¹Күш-қуатымыз — Құдайға шаттана ән салыңдар, Жақып сиынған Құдайға қуана айқайлаңдар,

²Ән-жырлар айта бастап, даңғыраны соғыңдар, Домбыра, жетігенмен әсем әуен тартыңдар!

³Жаңа ай туғанда кернейде ойнаңдар, Ай толғанда да тойымызды жариялаңдар.

⁴Өйткені бұл — Исраил халқының міндеті, Жақып сиынған Құдайдың берген ережесі.

⁵Жаратқан Иеміз Мысырға қарсы шыққанда, Осыны бұйырды Жүсіптің ұрпағына, Біз бөтен тілді естіген уақытта.

⁶(Жаратқан былай деп білдірді бұйрығын:) «Иықтарыңнан ауыр жүкті алып тастадым, Қолдарыңды көтерген себеттен босаттым.

⁷Қиын кезде айқайлап сиындыңдар Маған, Сонда сендерді азат етіп алдым аман. Күннің күркірінен сендерге құлақ салғам, Меріба сулары маңында сендерді сынағам.

⁸Халқым, Мені тыңда, сендерге ескертемін, Игі болар, Исраил, Маған құлақ түргенің!

⁹Ешқандай да бөгде тәңірлерің болмасын, Құлшылық етпеңдер жат тәңірлерге ешқашан!

¹⁰Мен Жаратқан Ие — бірден-бір Тәңірлеріңмін, Мысыр елінен алып шыққан Иелеріңмін. Ал енді, ауыздарыңды ашыңдар айқара, Мен оларды толтырамын жақсылыққа.

¹¹Бірақ таңдаған халқым Мені тыңдамады, Исраилдің ұрпағы Маған бағынбады,

¹²Сондықтан Мен қасарысқан жүректеріне Жол бердім өз беттерімен жүрулеріне.

¹³Халқым Менің сөзіме құлақ салса екен, Исраилдің ұрпағы жолыммен жүрсе екен!

¹⁴Онда Мен жауларын лезде жуасытар едім, Қинаған дұшпандарына қол жұмсар едім,

¹⁵Өзімді жек көргендер Маған бағынғансыр еді, Ал азапты уақыттары мәңгіге созылар еді.

¹⁶Бірақ сендерді жақсы бидаймен тойдырар едім, Жартастағы балмен рақатқа қандырар едім».