Забур жырлары 83

¹Уа, Құдайым, үндемей қала берме, Тіл қатпастан тып-тыныш бола көрме,

²Себебі жауларың у-шу көтеруде, Сені жек көретіндер өркөкіректенуде.

³Халқыңа қарсы олар сұмдық ойласуда, Өзіңе қымбат жандарға қарсы ақылдасуда:

⁴«Кәне, құртайық оларды ұлттар арасынан, Исраил аталмасын енді қайтып ешқашан».

⁵Бірауыздан олар сөз байласып Жатыр, Саған қарсы одақ құрып:

⁶Шатырларда тұрған едомдықтар, Ысмағұлдық, моабтық, ажарлықтар,

⁷Гебалдық, аммондық, амалектіктер, Тирдің тұрғындары мен філістірлер.

⁸Ассурдың халқы да оларға қосылды, Луттың ұрпақтарына қолдаушы болды.

⁹Сен ежелде Мадиян тайпасына, Сисара мен Ябинге Қишон аңғарында Істегеніңдей істеші жауларымызға!

¹⁰Сол байырғылар Ендорда талқандалды, Төгілген қи-қоқыстай жерге тапталды.

¹¹Істеші жаулардың әміршілеріне Ежелде істегеніңдей Ориб пен Зипке, Істеші олардың бар көсемдеріне, Өзің істегеніңдей Салман мен Зебейге, Өйткені жау былай деді біз жөнінде:

¹²«Құдайдың мекендерін иемденейік, Жайылымдарын қолға түсірейік!»

¹³Зұлымдарды етші құйын соққан тозаңдай, О, Құдайым, жел ұшырған сабандай

¹⁴Әрі от жалмап қойған ормандай, Жалын күйреткен қырат басындай.

¹⁵Дұшпанды қуып шықшы елден құйыныңмен, Дүрбелеңге түсірші Өзіңнің дауылыңмен,

¹⁶Уа, Жаратқан жауды қара бет қылып масқарала, Олар Саған бұрылып, сиынсын атыңа.

¹⁷Ал қыңырлары лайым қысылып абыржысын, Олар қорланып, ақырында өлім құшсын,

¹⁸Жаратқан Ие деп аталған жалғыз Сенің Бүкіл жер бетіне билік жүргізетін Хақ Тағала екеніңді барлығы білсін!