1 Abakkolinso 10

¹Kubanga ssaagala mmwe obutategeera, ab'oluganda, bajjajjaffe bonna bwe baali wansi w'ekire, era bonna bwe baayita mu nnyanja;

²era bonna bwe baabatizibwa eri Musa mu kire ne mu nnyanja;

³era bonna ne balyanga emmere emu ey'omwoyo; era bonna ne banywanga ekyokunywa ekimu eky'omwoyo:

⁴kubanga baanywanga mu lwazi olw'omwoyo olwabagobereranga: n'olwazi olwo lwali Kristo.

⁵Naye bangi ku bo Katonda teyabasiima: kubanga baazikiririzibwa mu ddungu.

⁶Naye ebyo byali byakulabirako gye tuli, tulemenga okwegomba ebibi, era nga bo bwe beegomba.

⁷So temubanga basinza ba bifaananyi, ng'abamu ku bo: nga bwe kyawandiikibwa nti Abantu ne batuula okulya n'okunywa, ne bagolokoka okuzannya.

⁸Era tetwendanga, ng'abamu ku bo bwe baayenda, ne bagwa ku lunaku olumu obukumi bubiri mu enkumi ssatu.

⁹Era tetukemanga Mukama waffe, ng'abamu ku bo bwe baakema, emisota egyo ne gibatta.

¹⁰Era temwemulugunyanga, ng'abamu ku bo bwe beemulugunya, ne bazikirizibwa omuzikiriza.

¹¹Naye ebyo byababaako abo okubeeranga ebyokulabirako; era byawandiikibwa olw'okutulabulanga ffe abatuukiddwako enkomerero z'emirembe.

¹²Kale alowooza ng'ayimiridde yeekuumenga aleme okugwa.

¹³Siwali kukema okubakwata okutali kwa bantu: naye Katonda mwesigwa, ataabaganyenga kukemebwa okusinga bwe muyinza; naye awamu n'okukemebwa era anassangawo n'obuddukiro; mulyoke muyinzenga okugumiikiriza.

¹⁴Kale, baganda bange, muddukenga okusinza ebifaananyi.

¹⁵Mbagamba ng'abalina amagezi; mulowooze kye njogera.

¹⁶Ekikompe eky'omukisa, kye tusabira omukisa, si kwe kusseekimu omusaayi gwa Kristo? Omugaati gwe tumenyaamenya si kwe kusseekimu omubiri gwa Kristo?

¹⁷kubanga ffe abangi tuli mugaati gumu, omubiri gumu: kubanga fenna tugabana omugaati gumu.

¹⁸Mulabe Isiraeri ow'omubiri: abalya ssaddaaka tebassa kimu na kyoto?

¹⁹Kale njogera ki? ekiweebwa eri ekifaananyi nga kintu, oba ekifaananyi nga kintu?

²⁰Naye njogera ng'ab'amawanga bye bawaayo bawa eri balubaale, so si eri Katonda: nange ssaagala mmwe kubeeranga abasseekimu ne balubaale.

²¹Temuyinza kunywa ku kikompe kya Mukama waffe ne ku kikompe kya balubaale: temuyinza kugabana ku mmeeza ya Mukama waffe ne ku mmeeza ya balubaale.

²²Oba Mukama waffe tumukwasa obuggya? ffe tumusinga amaanyi?

²³Byonna birungi; naye ebisaana si byonna. Byonna birungi, naye ebizimba si byonna.

²⁴Omuntu yenna tanoonyanga bibye yekka, wabula ebya munne.

²⁵Buli kye batundanga mu katale, mukiryanga, nga temubuuzizza kigambo olw'omwoyo;

²⁶kubanga ensi ya Mukama waffe, n'okujjula kwayo.

²⁷Omu ku abo abatakkiriza bw'abayitanga, nammwe bwe mwagalanga okugenda; ekiteekebwanga mu maaso gammwe mukiryanga, nga temubuuzizza kigambo olw'omwoyo.

²⁸Naye omuntu bw'abagambanga nti Kino kyaweebwa okubeera ssaddaaka, temukiryanga ku lw'oyo abuulidde, n'olw'omwoyo:

²⁹bwe njogera omwoyo, si gugwo ggwe naye gwa mulala; kubanga eddembe lyange lwaki okusalirwa omusango n'omwoyo gw'omulala?

³⁰Nze bwe ndya n'okwebaza, kiki ekinvumya olw'ekyo kye nneebaza?

³¹Kale oba nga mulya, oba nga munywa, oba nga mukola ekigambo kyonna kyonna, mukolenga byonna olw'ekitiibwa kya Katonda.

³²Temuleetanga ekyesittaza eri Abayudaaya, newakubadde eri Abayonaani, newakubadde eri ekkanisa ya Katonda:

³³era nga nange bwe nsanyusa bonna mu byonna, nga sinoonya magoba gange nze, wabula ag'abangi, balyoke balokoke.