1 Timoseewo 2

¹Kale okusooka byonna mbabuulirira okwegayiriranga n'okusabanga n'okutakabananga n'okwebazanga bikolebwenga ku lw'abantu bonna;

²ku lwa bakabaka n'abakulu bonna; tulyoke tubeerenga n'obulamu obutereevu obw'emirembe mu kutya Katonda kwonna ne mu kwegendereza.

³Ekyo kye kirungi, ekikkirizibwa mu maaso g'Omulokozi waffe Katonda,

⁴ayagala abantu bonna okulokoka, era okutuuka mu kutegeerera ddala amazima.

⁵Kubanga waliwo Katonda omu, era omutabaganya wa Katonda n'abantu omu, omuntu Kristo Yesu,

⁶eyeewaayo abe omutango olwa bonna; okutegeeza kulibaawo mu ntuuko zaakwo:

⁷nze kwe nnateekerwa omubuulizi era omutume (njogera mazima, ssirimba), omuyigiriza w'amawanga olw'okukkiriza n'amazima.

⁸Kyenva njagala abasajja basabenga mu buli kifo, nga bayimusa emikono emitukuvu, awatali busungu na mpaka.

⁹Bwe batyo n'abakazi beeyonjenga mu byambalo ebisaana, n'okukwatibwa ensonyi n'okwegendereza; si mu kulanganga enviiri, ne zaabu oba luulu oba engoye ez'omuwendo omungi;

¹⁰naye (nga bwe kisaanira abakazi abeeyita abatya Katonda) n'ebikolwa ebirungi.

¹¹Omukazi ayigenga mu bukkakkamu mu kugonda kwonna.

¹²Naye omukazi mmugaanyi okuyigirizanga, newakubadde okufuganga omusajja, naye okubeeranga mu bukkakkamu.

¹³Kubanga Adamu ye yasooka okutondebwa, oluvannyuma Kaawa;

¹⁴era Adamu si ye yalimbibwa, naye omukazi oli ye yalimbibwa n'aba mu kwonoona:

¹⁵naye anaalokokanga mu kuzaala, bwe banaanyiikiranga mu kukkiriza n'okwagala n'obutukuvu awamu n'okwegendereza.