Yokaana 10

¹Ddala ddala mbagamba nti Atayita mu mulyango ng'ayingira mu kisibo ky'endiga, naye n'alinnyira awalala, oyo ye mubbi era omunyazi.

²Naye ayita mu mulyango, ye musumba w'endiga.

³Oyo omuggazi amuggulirawo; n'endiga zimuwulira eddoboozi: aziyita endiga ze amannya; azifulumya ebweru.

⁴Bw'amala okufulumya ezize zonna, azikulembera, n'endiga zimugoberera: kubanga zimumanyi eddoboozi.

⁵Omulala tezirimugoberera, naye zirimudduka buddusi: kubanga tezimanyi ddoboozi lya balala.

⁶Yesu n'abagerera olugero luno, naye bo tebaategeera bigambo bwe biri bye yabagamba.

⁷Awo Yesu n'abagamba nate nti Ddala ddala mbagamba nti Nze mulyango gw'endiga.

⁸Bonna abansooka baali babbi era abanyazi: naye endiga tezaabawulira.

⁹Nze mulyango: omuntu bw'ayingirira mu nze alirokoka, aliyingira, alifuluma, aliraba eddundiro.

¹⁰Omubbi tajja wabula okubba, n'okutta, n'okuzikiriza. Nze najja zibe n'obulamu, era zibe nabwo obungi.

¹¹Nze musumba omulungi: omusumba omulungi awaayo obulamu bwe olw'endiga.

¹²Alundirira empeera, atali musumba, endiga nga si zize ye, bw'alaba omusege nga gujja, aleka endiga n'adduka, n'omusege guzisikula guzisaasaanya.

¹³Adduka kubanga wa mpeera, so endiga tazissaako mwoyo.

¹⁴Nze musumba omulungi: era ntegeera ezange, n'ezange zintegeera

¹⁵nga Kitange bw'antegeera, nange mpaayo obulamu bwange olw'endiga.

¹⁶Era nnina n'endiga endala ezitali za mu kisibo kino: nazo kiŋŋwanira okuzireeta, ziriwulira eddoboozi lyange; era ziriba ekisibo kimu, omusumba omu.

¹⁷Kitange kyava anjagala, kubanga nze mpaayo obulamu bwange, ndyoke mbutwale ate.

¹⁸Tewali abunziyako, naye nze nzekka mbuwaayo. Nnina obuyinza obw'okubuwaayo, era nnina obuyinza obw'okubutwala nate. Ekiragiro ekyo nakiweebwa Kitange.

¹⁹Ne wabaawo nate okwawukana mu Bayudaaya olw'ebigambo ebyo.

²⁰Abamu ku bo bangi ne bagamba nti Aliko dayimooni era alaluse; mumuwulirira ki?

²¹Abalala ne bagamba nti Ebigambo bino si bya muntu aliko dayimooni. Dayimooni ayinza okuzibula amaaso ga bamuzibe?

²²Yali mbaga ey'okutukuza mu Yerusaalemi; byali biro bya mpewo;

²³Yesu n'atambulira mu yeekaalu mu kisasi kya Sulemaani.

²⁴Awo Abayudaaya ne bamwetooloola, ne bamugamba nti Olituusa wa okutubuusisabuusisa? Oba nga ggwe Kristo, tubuulirire ddala.

²⁵Yesu n'abaddamu nti Nnabagamba, naye temukkiriza: emirimu gye nkola mu linnya lya Kitange, gye gintegeeza nze.

²⁶Naye mmwe temukkiriza kubanga temuli ba mu ndiga zange.

²⁷Endiga zange ziwulira eddoboozi lyange, nange nzitegeera, era zingoberera;

²⁸nange nziwa obulamu obutaggwaawo; so teziribula emirembe n'emirembe, so tewali alizisikula mu mukono gwange.

²⁹Kitange eyazimpa ye mukulu okusinga bonna, so tewali ayinza okuzisikula mu mukono gwa Kitange.

³⁰Nze ne Kitange tuli omu.

³¹Abayudaaya ne baddira nate amayinja okumukuba.

³²Yesu n'abaddamu nti Emirimu mingi emirungi egyava eri Kitange nagibalaga mmwe; mulimu guluwa mu egyo ogubankubya amayinja?

³³Abayudaaya ne bamuddamu nti Olw'omulimu omulungi tetukukuba mayinja, naye olw'okuvvoola; era kubanga ggwe oli muntu ne weefuula Katonda.

³⁴Yesu n'abaddamu nti Tekyawandiikibwa mu mateeka gammwe nti Nze nnagamba nti Muli bakatonda?

³⁵Oba nga yabayita abo bakatonda, abajjirwa ekigambo kya Katonda, (so n'ebyawandiikibwa tebiyinza kudiba),

³⁶mwe mumugambira ki ye, Kitaawe gwe yatukuza, n'amutuma mu nsi, nti Ovvodde; kubanga ŋŋambye nti Ndi Mwana wa Katonda?

³⁷Bwe sikola mirimu gya Kitange, temunzikiriza.

³⁸Naye bwe ngikola, newakubadde nga temunzikiriza nze, naye mukkirize emirimu: mumanye mutegeere nga Kitange ali mu nze nange mu Kitange.

³⁹Ne basala amagezi nate okumukwata: n'ava mu mikono gyabwe.

⁴⁰N'agenda nate emitala wa Yoludaani mu kifo Yokaana gye yali olubereberye ng'abatiza; n'abeera eyo.

⁴¹Abantu bangi ne bajja gy'ali; ne bagamba nti Yokaana teyakola kabonero: naye byonna Yokaana bye yayogera ku ono byali bya mazima.

⁴²Ne bamukkiririza eyo bangi.