Okukungubaga 4

¹Zaabu ng'eyonoonese! zaabu ennungi ennyo nnyini nga efuuse! Amayinja ag'omu kifo ekitukuvu gafukibwa buli luguudo we lusibuka.

²Batabani ba Sayuuni ab'omuwendo omungi, abenkana zaabu ennungi, Nga bayitiddwa nsuwa za bbumba, omulimu gw'emikono gy'omubumbi!

³Era n'emisege giggyayo amabeere, giyonsa abaana baagyo: Omuwala w'abantu bange afuuse mukambwe nga bamaaya mu ddungu.

⁴Olulimi lw'omwana ayonka lwegasse n'ekibuno kye olw'ennyonta: Abaana abato basaba emmere, so tewali abagibegera.

⁵Abaalyanga nga beenaanya bawuubaalira mu nguudo: Abaakulira mu ngoye entwakaavu bawambaatira mmungo,

⁶Kubanga obutali butuukirivu bw'omuwala w'abantu bange businga obunene ekibi kya Sodomu, Ekyasuulibwa nga mu kaseera, so tewali eyakissaako omukono.

⁷Abakungu baali balongoofu okusinga omuzira, baali beeru okusinga amata, Emibiri gyabwe gyasinga amayinja amatwakaavu okumyuka, baali banyirivu nga safiro:

⁸Amaaso gaabwe gaasinga ekisiriiza okuddugala; tebaamanyibwa mu nguudo: Eddiba lyabwe lyegasse n'amagumba gaabwe; likaze, lifuuse ng'omuggo.

⁹Abattiddwa n'ekitala basinga abo abafudde enjala; Kubanga abo bayongobera nga bafumitiddwa olw'okubulwa ebibala eby'omu nnimiro.

¹⁰Abakazi ab'okusaasira okungi bafumbye abaana baabwe bo n'emikono gyabwe bo; Baabanga ba kulya gye bali mu kuzikirira kw'omuwala w'abantu bange.

¹¹Mukama atuukirizza ekiruyi kye, era afukidde ddala obusungu bwe obukambwe; Era akumye omuliro mu Sayuuni ogwokezza emisingi gyakyo.

¹²Bakabaka b'ensi tebakkiriza, newakubadde bonna abatuula mu nsi zonna, Ng'omulabe n'oyo abakyawa agenda okuyingira mu miryango gy'e Yerusaalemi.

¹³Lwa bibi bya bannabbi baamu n'obutali butuukirivu bwa bakabona baamu, Abaayiwa omusaayi gw'abatuukirivu wakati mu kyo.

¹⁴Bawaba ng'abazibe b'amaaso mu nguudo, boonoonese n'omusaayi, N'okuyinza abantu ne batayinza kukoma ku byambalo byabwe.

¹⁵Muveewo, bwe baabalangira, nti Ekitali kirongoofu muveewo, muveewo, temukomako: Bwe badduka ne bawaba, abantu ne boogera mu mawanga nti Tebakyabeera wano nate.

¹⁶Obusungu bwa Mukama bubasaasaanyizza; takyassaayo mwoyo eri bo: Tebatya maaso ga bakabona, tebaganza bakadde.

¹⁷Amaaso gaffe gakyaziba nga tutunuulira okubeerwa kwaffe okutaliiko kye kugasa: Bwe twalindirira twalindirira eggwanga eritayinza kulokola.

¹⁸Bacocca ebisinde byaffe, n'okuyinza ne tutayinza kutambulira mu nguudo zaffe: Enkomerero yaffe eneetera kutuuka, ennaku zaffe zituukiridde; kubanga enkomerero yaffe etuuse.

¹⁹Abatuyigganya basinga embiro empungu ez'omu bbanga: Batucoccera ku nsozi, baatuteegera mu ddungu.

²⁰Omukka ogw'omu nnyindo zaffe, oyo Mukama gwe yafukako amafuta, yakwatibwa mu bunnya bwabwe; Gwe twayogerako nti Tulituula mu mawanga wansi w'ekisiikirize ky'oyo.

²¹Sanyuka ojaguze, ai omuwala wa Edomu abeera mu nsi ya Uzi: Ekikompe kirigguka kirituuka ne ku ggwe; olitamiira ne weebikkula.

²²Okubonereza obutali butuukirivu bwo kutuukiridde, ai omuwala wa Sayuuni; Takyakutwala nate mu busibe: Alibonereza obutali butuukirivu bwo, ai omuwala wa Edomu; Alikunnyonnyola ebibi byo.