Lukka 19

¹Nayingira mu Yeriko n'aba ng'agiyitamu.

²Kale, laba, waaliwo omuntu eyali ayitibwa erinnya lye Zaakayo, naye yali mukulu w'abawooza, era nga mugagga.

³N'asala amagezi okulaba Yesu bw'ali; n'atayinza olw'ekibiina, kubanga ekigera kye yali mumpi.

⁴N'adduka n'akulembera, n'alinnya ku muti omusukomooli amulabe: kubanga yali agenda kuyita mu kkubo eryo.

⁵Awo Yesu bwe yatuuka mu kifo w'ali, n'atunula waggulu, n'amugamba nti Zaakayo, kka mangu; kubanga leero kiŋŋwanidde okutuula mu nnyumba yo.

⁶N'akka mangu, n'amwaniriza ng'asanyuka.

⁷Bwe baalaba, ne bamwemulugunyiza bonna, nga bagamba nti Ayingidde okusula omw'omuntu alina ebibi.

⁸Zaakayo n'ayimirira n'agamba Mukama waffe nti Laba, Mukama wange, ekitundu ky'ebintu byange mbawa abaavu; oba nga nnalyazaamaanya omuntu yenna ekintu kye, mmuliyira emirundi ena.

⁹Yesu n'amugamba nti Leero okulokolebwa kuzze mu nnyumba muno, kubanga naye mwana wa Ibulayimu.

¹⁰Kubanga Omwana w'omuntu yajja okunoonya n'okulokola ekyo ekyabula.

¹¹Awo bwe baawulira ebyo ne yeeyongera n'agera olugero, kubanga yali kumpi ne Yerusaalemi, era kubanga baali balowooza ng'obwakabaka bwa Katonda bugenda kulabika mangu ago.

¹²Kyeyava agamba nti Waaliwo omuntu omukulu eyagenda mu nsi y'ewala, okulya obwakabaka alyoke akomewo.

¹³N'ayita abaddu be kkumi, n'abawa shillings ebikumi bibiri, n'abagamba nti Musuubuzenga okutuusa we ndijjira.

¹⁴Naye basajja be ne bamukyawa, ne batuma ababaka ennyuma we, nga bagamba nti Tetwagala oyo kutufuga.

¹⁵Awo olwatuuka bwe yakomawo ng'amaze okulya obwakabaka, n'alagira okuyita abaddu abo be yawa effeeza, alyoke amanye amagoba ge baasuubula.

¹⁶Ow'olubereberye n'ajja n'agamba nti Mukama wange, shillings zo amakumi abiri gaagobamu shillings bibiri.

¹⁷N'amugamba nti Weebale, omuddu omulungi: kubanga wali mwesigwa ku kintu ekitono ennyo, kale ba n'obuyinza ku bibuga kkumi.

¹⁸N'ajja ow'okubiri ng'agamba nti Mukama wange, shillings zo abiri zaagobamu shillings kikumi.

¹⁹N'oyo n'amugamba nti Naawe ba ku bibuga bitaano.

²⁰N'omulala n'ajja n'agamba nti Mukama wange, laba, shillings zo zino abiri nnazitereka nga zisibiddwa mu kiwero:

²¹kubanga nnakutya kubanga oli munti mukakanyavu: olonda ky'otaateekawo, okungula ky'otaasiga.

²²N'amugamba nti Akamwa ko kanaakunsaliza omusango, ggwe omuntu omubi. Wali omanyi nga nze ndi muntu mukakanyavu, nga nnonda kye ssaateekawo, nga nkungula kye ssaasiga;

²³kale kiki ekyakulobera okuwa shillings zange abasuubuzi nange bwe nnandizze nnandizitutte n'amagoba gaazo?

²⁴N'agamba abaali bayimiridde awo nti Mumuggyeeko shillings ze, muziwe oyo alina shillings ebikumi ebibiri

²⁵Ne bamugamba nti Mukama waffe, alina shillings ebikumi bibiri.

²⁶Mbagamba nti Buli alina aliweebwa; naye oyo atalina, era ekyo ky'ali nakyo , kirimuggibwako.

²⁷Naye abo abalabe bange abatayagala nze kubafuga, mubaleete wano mubattire mu maaso gange.

²⁸Awo bwe yamala okwogera ebyo n'akulembera n'alinnya e Yerusaalemi.

²⁹Awo olwatuuka bwe yali ng'anaatera okutuuka e Besufaage n'e Bessaniya, ku lusozi oluyitibwa olwa Zeyituuni, n'atuma ku bayigirizwa be babiri,

³⁰ng'agamba nti Mugende mu mbuga eri mu maaso gammwe; bwe munaayingira omwo munaalaba omwana gw'endogoyi nga gusibiddwa oguteebagalwangako muntu: mugusumulule muguleete

³¹Era omuntu bw'ababuuza nti Mugusumululira ki? mugambe bwe mutyo nti Mukama waffe ye agwetaaga.

³²N'abo abaatumibwa ne bagenda, ne balaba nga bw'abagambye.

³³Awo bwe baali nga basumulula omwana gw'endogoyi bannannyini gwo ne babagamba nti Musumululira ki omwana gw'endogoyi ogwo?

³⁴Ne bagamba nti Mukama waffe ye agwetaaga.

³⁵Ne baguleeta eri Yesu: ne baaliira engoye zaabwe ku mwana gw'endogoyi, ne beebagazaako Yesu.

³⁶Awo yali ng'agenda ne baaliira engoye zaabwe mu luguudo.

³⁷Awo bwe yali ng'anaatera okutuuka mu kikko ky'olusozi olwa Zeyituuni, ekibiina kyonna eky'abayigirizwa ne batanula okusanyuka n'okutendereza Katonda n'eddoboozi ddene olw'eby'amagero byonna bye baalaba;

³⁸nga bagamba nti Aweereddwa omukisa Kabaka ajjira mu linnya lya Mukama: emirembe mu ggulu, n'ekitiibwa waggulu ennyo.

³⁹Abafalisaayo abamu ab'omu kibiina ne bamugamba nti Omuyigiriza, koma ku bayigirizwa bo.

⁴⁰N'addamu n'abagamba nti Mbagamba nti Abo bwe banaasirika, amayinja ganaayogerera waggulu.

⁴¹Awo bwe yasembera okumpi, n'alaba ekibuga n'akikaabira,

⁴²ng'agamba nti Singa omanyi ku lunaku luno, ggwe, ebigambo eby'emirembe! naye kaakano bikwekeddwa amaaso go.

⁴³Kubanga ennaku zirikujjira, abalabe bo lwe balikuzimbako ekigo, balikwetooloola, balikuzingiza enjuyi zonna,

⁴⁴balikusuula wansi, n'abaana bo abali mu nda yo; so tebalikulekamu jjinja eriri kungulu ku jjinja; kubanga tewamanya biro bya kukyalirwa kwo.

⁴⁵N'ayingira mu yeekaalu, n'asooka okugobamu abaali batunda

⁴⁶ng'abagamba nti Kyawandiikibwa nti Era ennyumba yange eneebanga nnyumba ya kusabirangamu: naye mmwe mugifudde mpuku ya banyazi.

⁴⁷Awo n'ayigirizanga mu yeekaalu buli lunaku. Naye bakabona abakulu n'abawandiisi n'abakulu b'abantu ne basala amagezi okumuzikiriza:

⁴⁸ne batalaba kye banaakola; kubanga abantu bonna baamussaako nnyo omwoyo nga bamuwulira.