Lukka 23

¹Ekibiina kyonna ne kigolokoka, ne kimutwala ewa Piraato.

²Ne basooka okumuloopa nga bagamba nti Ono twamulaba ng'akyamya eggwanga lyaffe, ng'abagaana okuwa Kayisaali omusolo, ng'ayogera yennyini okuba Kristo, kabaka.

³Piraato n'amubuuza, ng'agamba nti Ggwe Kabaka w'Abayudaaya? N'amuddamu n'agamba nti Oyogedde.

⁴Piraato n'agamba bakabona abakulu n'ebibiina nti Siraba nsonga yonna ku muntu ono.

⁵Naye bo ne beeyongera okutayirira nga bagamba nti Asasamaza abantu, ng'ayigiriza mu Buyudaaya bwonna, yasookera Ggaliraaya okutuuka ne wano.

⁶Naye Piraato bwe yawulira, n'abuuza oba ng'omuntu oyo Mugaliraaya.

⁷Bwe yategeera nga wa mu matwale ga Kerode, n'amuweereza ewa Kerode, kubanga naye yali mu Yerusaalemi mu nnaku ezo.

⁸Awo Kerode bwe yalaba Yesu, n'asanyuka nnyo; kubanga okuva edda yayagalanga okumulaba kubanga yawulira ebigambo bye; n'asuubira okulaba ng'akola akabonero.

⁹N'amubuuliriza ebigambo bingi, naye ye n'atamuddamu kigambo.

¹⁰Bakabona abakulu n'abawandiisi ne bayimirira ne banyweza nnyo okumuloopa.

¹¹Awo Kerode ne basserikale ne bamunyooma, ne bamuduulira, ne bamwambaza ekyambalo ekinekaaneka ne bamuzzaayo ewa Piraato.

¹²Kerode ne Piraato ne balyoka batabagana ku lunaku olwo; kubanga olubereberye baali bakyawaganye.

¹³Piraato n'ayita bakabona abakulu n'abakungu n'abantu,

¹⁴n'abagamba nti Mundeetedde omuntu ono, nti yakyamya abantu; era, laba, nze bwe mmukemererezza mu maaso gammwe, sirabye nsonga ku muntu ono mu ebyo bye mumuloopye;

¹⁵era, newakubadde Kerode, kubanga amuzzizza gye tuli; era, laba, tewali kigambo ky'akoze ekisaanidde okumussisa:

¹⁶kale bwe nnaamala okumubonereza, n'amuta.

¹⁷Era kyamugwaniranga okubateeranga omusibe omu ku mbaga.

¹⁸Naye ne bakaayana bonna wamu, nga bagamba nti Twala ono, otuteere Balaba:

¹⁹ye muntu gwe bassa mu kkomera olw'obujeemu obwali mu kibuga, n'olw'obussi.

²⁰Piraato n'ayogera nabo nate, ng'ayagala okuta Yesu;

²¹naye bo ne boogerera waggulu nga bagamba nti Mukomerere, mukomerere.

²²N'abagamba omulundi ogw'okusatu nti Lwaki, ono akoze kibi ki? Sirabye ku ye nsonga emussa: kale bwe nnaamala okumubonereza, n'amuta.

²³Naye bo ne bamuzitoowerera n'amaloboozi amanene, nga beegayirira okumukomerera. Amaloboozi gaabwe ne gasinga okukola.

²⁴Piraato n'asalawo ebigambo bye beegayiridde.

²⁵N'ata oyo eyasuulibwa mu kkomera olw'obujeemu n'obussi gwe bamwegayiridde; naye n'awaayo Yesu okumukola nga bwe baagadde.

²⁶Awo baali nga bamutwala, ne bakwata Omukuleene Simooni, eyali ava mu kyalo, ne bamutikka emusalaba, okugwetikka ng'ava ennyuma Yesu.

²⁷Ekibiina kinene ne kimugoberera eky'abantu n'eky'abakazi abaamukaabira, ne bamulirira.

²⁸Naye Yesu n'abakyukira n'agamba nti Abawala ab'e Yerusaalemi, temukaabira nze, naye mwekaabire mwekka, n'abaana bammwe.

²⁹Kubanga, laba, ennaku zijja, mwe baligambira nti Balina omukisa abagumba, n'embuto ezitazaala n'amabeere agatayonsa.

³⁰Ne balyoka batanula okugamba ensozi nti Mutugweko; n'obusozi nti Mutuvuunikire.

³¹Kubanga bwe bakola bino ku muti omubisi, ku mukalu kiriba kitya?

³²Era yatwalibwa n'abalala babiri, abaakola obubi, okuttirwa awamu naye.

³³Awo bwe baatuuka mu kifo ekiyitibwa kiwanga, ne bamukomererera awo, na bali abaakola obubi, omu ku mukono ogwa ddyo n'omulala ku gwa kkono.

³⁴Awo Yesu n'agamba nti Kitange, basonyiwe; kubanga tebamanyi kye bakola. Ne bagabana ebyambalo bye, nga bakuba akalulu.

³⁵Abantu ne bayimirira nga batunuulira. Abakungu nabo ne bamusekerera nga bagamba nti Yalokolanga balala yeerokole yekka, oba ng'oyo ye Kristo wa Katonda, omulonde we.

³⁶Basserikale nabo ne bamuduulira nga bajja w'ali, nga bamuwa omwenge omukaatuufu,

³⁷nga bagamba nti Oba nga ggwe Kabaka w'Abayudaaya, weerokole wekka.

³⁸Ne wabaawo n'ebbaluwa waggulu we nti ONO YE KABAKA W’ABAYUDAAYA.

³⁹Omu ku abo abaakola obubi abaawanikibwa n'amuvuma ng’agamba nti Si ggwe Kristo? Weerokole wekka naffe.

⁴⁰Naye ow'okubiri n'addamu n'amunenya, n’agamba nti N'okutya totya Katonda, kubanga oli ku kibonerezo kye kimu naye?

⁴¹Era ffe twalangibwa nsonga; kubanga ebisaanidde bye twakola bye tusasulibbwa: naye ono takolanga kigambo ekitasaana.

⁴²N'agamba nti Yesu, onjijukiranga bw'olijjira mu bwakabaka bwo.

⁴³Yesu n'amugamba nti Mazima nkugamba nti Leero onooba nange mu Lusuku lwa Katonda.

⁴⁴Awo obudde bwali butuuse essaawa nga mukaaga, ne waba ekizikiza ku nsi yonna okutuusa essaawa mwenda,

⁴⁵enjuba obutayaka: n'eggigi ery'omu yeekaalu ne liyulikamu wakati.

⁴⁶Awo Yesu n’ayogera n'eddoboozi ddene, n'agamba nti Kitange, nteeka omwoyo gwange mu mikono gyo: bwe yamala okwogera ekyo, n'awaayo obulamu.

⁴⁷Awo omwami w'ekitongole bwe yalaba ekibaddewo, n'atendereza Katonda, ng'agamba nti Mazima ono abadde muntu mutuukirivu.

⁴⁸N'ebibiina byonna ebyali bikuŋŋaanye okwerolera, bwe baalaba ebibaddewo ne baddayo nga beekuba mu bifuba.

⁴⁹Ne mikwano gye gyonna, n'abakazi abaava naye e Ggaliraaya, ne bayimirira wala nga balaba ebyo.

⁵⁰Kale laba, omuntu erinnya lye Yusufu, eyali omukungu, omuntu omulungi era omutuukirivu

⁵¹oyo teyassa kimu mu kuteesa kwabwe newakubadde mu kikolwa kyabwe, ow'e Alimasaya, ekibuga ky'Abayudaaya, eyali alindirira obwakabaka bwa Katonda:

⁵²oyo n'agenda ewa Piraato, n'asaba omulambo gwa Yesu.

⁵³N'aguwanula n'aguzinga mu lugoye olwa bafuta, n'amussa mu ntaana eyabajjibwa mu jjinja, omutateekebwanga muntu.

⁵⁴Kale lwali lunaku lwa Kuteekateeka, essabbiiti ng'eneebaako enkya.

⁵⁵N'abakazi be yava nabo e Ggaliraaya, ne bagoberera, ne balaba entaana, n'omulambo gwe bwe gwateekebwa.

⁵⁶Ne bakomawo, ne bategeka eby'akaloosa n'amafuta ag'omugavu. Ne ku lunaku olwa ssabbiiti ne bawummula ng'etteeka bwe liri.