Makko 8

¹Awo mu nnaku ezo, ebibiina bwe byayinga obungi nate, ne bataba na mmere, n'ayita abayigirizwa be n'abagamba nti

²Nsaasira ebibiina, kubanga leero ennaku ssatu nga bali nange, so tebalina mmere;

³bwe mbasiibula okuddayo nga basiibye enjala, banaazirikira mu kkubo; n’abamu bava wala.

⁴Abayigirizwa be ne bamuddamu nti Omuntu anaayinza atya okukkusa abantu bano emigaati wano mu ddungu?

⁵N'ababuuza nti Mulina emigaati emeka? Ne bamugamba nti Musanvu.

⁶N'alagira ebibiina okutuula wansi: n'addira emigaati omusanvu, ne yeebaza, n'amenyamu, n’awa abayigirizwa be, okugissa mu maaso gaabwe; ne bagissa mu maaso g'ekibiina.

⁷Era baali balina obw'ennyanja butono: n'abwebaza, n’alagira n'obwo okubussa mu maaso gaabwe.

⁸Ne balya ne bakkuta, ne bakuŋŋaanya obukunkumuka obwasigalawo ebisero musanvu.

⁹Baali ng'enkumi nnya: n'abasiibula.

¹⁰Amangu ago n'asaabala mu lyato n'abayigirizwa be, n'ajja ku njuyi ez'e Dalumanusa.

¹¹Abafalisaayo ne bafuluma ne bajja, ne batanula okumusokaasoka, nga banoonya gy'ali akabonero akava mu ggulu, nga bamukema.

¹²N'asinda nnyo mu mwoyo gwe, n’agamba nti ab'Emirembe gino banooyeza ki akabonero? mazima mbagamba nti ab'Emirembe gino tebaliweebwa kabonero.

¹³N'abaleka, n'asaabala nate n'agenda emitala w'eri.

¹⁴Awo ne beerabira okutwala emigaati, so tebaali nagyo mu lyato wabula omugaati gumu.

¹⁵N'abakuutira ng'agamba nti Munywere, mwekuume ekizimbulukusa eky'Abafalisaayo n’ekizimbulukusa kya Kerode.

¹⁶Ne beebuuzaganya bokka na bokka, ne bagamba nti Tetulina migaati.

¹⁷Yesu bwe yategeera n'abagamba nti Kiki ekibeebuuzaganyisa olw'obutaba na migaati? temunnalaba, so temutegeera? emitima gyammwe mikakanyavu?

¹⁸Mulina amaaso, temulaba? mulina amatu, temuwulira? so temujjukira?

¹⁹Bwe nnameyera enkumi ettaano emigaati etaano, ebibbo bimeka ebyajjula obukunkumuka bye mwakuŋŋaanya? Ne bamugamba nti Kkumi na bibiri.

²⁰Era bwe nnamenyera omusanvu enkumi ennya, mwakuŋŋaanya ebisero bimeka ebyajjula obukunkumuka? Ne bamugamba nti Musanvu.

²¹N'abagamba nti Temunnategeera?

²²Ne bajja ne batuuka mu Besusayida ne bamuleetera omuzibe w'amaaso, ne bamwegayirira okumukomako.

²³N'akwata omuzibe w'amaaso ku mukono, n'amufulumya ebweru w'embuga; awo bwe yawanda amalusu ku maaso ge, n'amussaako engalo, n'amubuuza nti Oliko ky'olaba?

²⁴N'atunula waggulu, n'agamba nti Ndaba abantu, kubanga ndaba bafaanana ng'emiti, nga batambula.

²⁵Ate n'amussa engalo ku maaso ge n'akanula okulaba, n'awona, n'alaba byonna bulungi.

²⁶N'amusindika ewuwe, ng'amugamba nti Toyingiranga mu mbuga muno.

²⁷Yesu n'asitula n'agenda n'abayigirizwa be mu mbuga z'e Kayisaliya ekya Firipo. Bwe baatuuka mu kkubo n'abuuza abayigirizwa be, n'abagamba nti Abantu bampita ani?

²⁸Ne bamugamba nti Yokaana Omubatiza: n'abalala nti Eriya: naye abalala nti Omu ku bannabbi.

²⁹Ye n'ababuuza nti Naye mmwe mumpita ani? Peetero n'addamu n'amugamba nti Ggwe Kristo.

³⁰N'abakomako baleme okubuulirako omuntu ebigambo bye.

³¹N'atanula okubayigiriza nti kimugwanira Omwana w'omuntu okubonyaabonyezebwa ebingi, n'okugaanibwa abakadde, ne bakabona abakulu, n'abawandiisi, n'okuttibwa, n'okuyitawo ennaku essatu okuzuukira.

³²N'ayogera ekigambo ekyo mu lwatu. Peetero n'amutwala, n'atanula okumunneya.

³³Naye n'akyuka, n'alaba abayigirizwa be, n'anenya Peetero, ng'agamba nti Dda ennyuma wange, Setaani: kubanga tolowooza bya Katonda, wabula eby'abantu.

³⁴N'ayita ebibiina n'abayigirizwa be, n'abagamba nti Omuntu bw'ayagala okungoberera, yeefiirize yekka, yeetikke omusalaba gwe, angoberere.

³⁵Kubanga buli ayagala okulokola obulamu bwe alibubuza; na buli alibuza obulamu bwe ku lwange n'olw'enjiri alibulokola.

³⁶Kubanga kimugasa ki omuntu okulya ensi zonna, n'okufiirwa obulamu bwe?

³⁷Kubanga omuntu yandiwaddeyo ki okununula obulamu bwe?

³⁸Kubanga buli ankwatirwa ensonyi nze n'ebigambo byange mu mirembe gino egy'obwenzi era emibi, n'Omwana w'omuntu alimukwatirwa ensonyi oyo lw'alijjira mu kitiibwa kya Kitaawe ne bamalayika abatukuvu.