Engero 12

¹Ayagala okubuulirirwa ayagala okumanya: Naye oyo akyawa okunenyezebwa aliŋŋanga ensolo.

²Omuntu omulungi anaaweebwanga Mukama ekisa: Naye omuntu ow'enkwe embi alimusalira omusango okumusinga.

³Omuntu taanywezebwenga lwa bubi: Naye emmizi gy'abatuukirivu tegijjululwenga ennaku zonna.

⁴Omukazi eyeegendereza ngule eri bba: Naye aswaza kivundu mu magumba ge.

⁵Ebirowoozo eby'abatuukirivu bya nsonga: Naye ababi bye bateesa bulimba.

⁶Ebigambo eby'ababi bya kutega musaayi: Naye akamwa k'abagolokofu kalibawonya.

⁷Ababi bameggebwa ne babula: Naye ennyumba ey'abatuukirivu eriyimirira.

⁸Omuntu alisiimibwa ng'amagezi ge bwe gali: Naye oyo alina omutima omukyamu alinyoomebwa.

⁹Oyo atayitibwa ka buntu, era alina omuddu, Asinga oyo eyessaamu ekitiibwa era abulwa eby'okulya.

¹⁰Omuntu omutuukirivu alowooza obulamu bw'ensolo ye: Naye okusaasira kw'ababi kukambwe.

¹¹Alima ensi ye aliba n'emmere nnyingi: Naye agoberera abataliiko kye bagasa abuliddwa okutegeera.

¹²Omubi yeegomba ekitimba ky'abasajja ab'ekyejo: Naye ekikolo eky'abatuukirivu kibala ebibala.

¹³Mu kusobya kw'emimwa mulimu ekyambika eri omuntu ow'ekyejo: Naye omutuukirivu aliva mu kulaba ennaku.

¹⁴Omuntu alikkuta ebirungi olw'ebibala eby'akamwa ke: N'ebikolwa eby'emikono gy'omuntu alibisasulibwa.

¹⁵Ekkubo ery'omusirusiru ddungi mu maaso ge ye: Naye ow'amagezi awulira okuweererwa ebigambo.

¹⁶Okweraliikirira kw'omusirusiru kumanyibwa mangu ago: Naye omuntu omutegeevu akisa ensonyi.

¹⁷Ayatula eby'amazima ayolesa obutuukirivu, Naye omujulirwa ow'obulimba ayolesa obukuusa.

¹⁸Wabaawo ayogera ng'ayanguyiriza ng'okufumita okw'ekitala: Naye olulimi lw'ab'amagezi kwe kulaama.

¹⁹Omumwa ogw'amazima gunaanywezebwanga emirembe gyonna: Naye olulimi olulimba lwa kaseera buseera.

²⁰Okudyeka kuli mu mitima gy'abo abateesa obubi: Naye abateesa emirembe baba n'essanyu.

²¹Omutuukirivu talibaako kabi k'aliraba: Naye ab'ekyejo balikkuta obubi.

²²Emimwa egirimba gya muzizo eri Mukama: Naye abo abakola eby'amazima b'asanyukira.

²³Omuntu omutegeevu akisa okumanya: Naye omutima gw'abasirusiru gulaalika obusirusiru.

²⁴Omukono gw'abanyiikivu gulifuga: Naye omugayaavu balimukoza omulimu ogw'obuddu.

²⁵Ennaku bwe ziba mu mutima gw'omuntu zigukutamya; Naye ekigambo ekirungi kigusanyusa.

²⁶Omutuukirivu aba musaale eri munne: Naye ekkubo ery'ababi libawabya.

²⁷Omuntu omugayaavu tayokya ekyo ky'akutte ng'ayigga; Naye ebintu eby'omuwendo omungi eby'abantu biba bya munyiikivu.

²⁸Mu kkubo ery'obutuukirivu mwe muli obulamu; Ne mu luwenda lw'abo temuli kufa.