Engero 3

¹Mwana wange, teweerabiranga tteeka lyange; Naye omutima gwo gukwatenga ebiragiro byange;

²Kubanga ennaku ennyingi n'emyaka egy'okuwangaala N'emirembe bye birikwongerwako.

³Okusaasira n'amazima tebikulekanga: Bisibenga mu bulago bwo; Biwandiikenga ku bipande eby'omutima gwo:

⁴Bw'onoolabanga bw'otyo okuganja n'okutegeera okulungi Mu maaso ga Katonda n'ag'abantu.

⁵Weesigenga Mukama n'omutima gwo gwonna. So teweesigamanga ku kutegeera kwo ggwe:

⁶Mwatulenga mu makubo go gonna, Kale anaaluŋŋamyanga olugendo lwo.

⁷Tobanga na magezi mu maaso go ggwe; Tyanga Mukama ove mu bubi:

⁸Ekyo kye kinaabanga obulamu eri ekkundi lyo, N'obusomyo eri amagumba go.

⁹Ossangamu ekitiibwa Mukama n'ebintu byo, N'ebibereberye ku bibala byo byonna:

¹⁰Amawanika go bwe ganajjulanga bwe gatyo ekyengera, N'amasogolero go ganaayiikanga omwenge omusu.

¹¹Mwana wange, tonyoomanga kubuulirira kwa Mukama; So n'okunenya kwe kulemenga okukukooya:

¹²Kubanga Mukama gw'ayagala gw'anenya; Era nga kitaawe omwana we gw'asanyukira.

¹³Aweereddwa omukisa omuntu alaba amagezi. N'oyo afuna okutegeera.

¹⁴Kubanga obuguzi bwago businga obuguzi obwa ffeeza, N'amagoba gaago gakira zaabu ennungi.

¹⁵Ga muwendo mungi okusinga amayinja amatwakaavu: So tewali kintu ky'oyinza okwegomba ebyenkanyankanyizibwa nago.

¹⁶Okuwangaala kuli mu mukono gwago ogwa ddyo; Mu mukono gwago ogwa kkono mulimu obugagga n'ekitiibwa.

¹⁷Amakubo gaago makubo ga kusanyukiramu, N'eŋŋendo zaago zonna mirembe.

¹⁸Ago gwe muti ogw'obulamu eri abo abagakwata: Era alina omukisa buli muntu abeera nago.

¹⁹Mukama yassaawo emisingi gy'ensi n'amagezi; Yanyweza eggulu n'okutegeera.

²⁰Ennyanja yayabika n'okumanya kwe, Eggulu ne litonnya omusulo.

²¹Mwana wange, ebyo tebivanga ku maaso go; Kwatanga amagezi amatuufu n'okuteesa;

²²Bwe binaabanga bwe bityo obulamu eri emmeeme yo, N'obuyonjo eri obulago bwo.

²³Awo lw'olitambulira mu kkubo lyo mirembe, So n'ekigere kyo tekiryesittala.

²⁴Bw'onoogalamiranga tootyenga: Weewaawo, onoogalamiranga n'otulo two tunaakuwoomeranga.

²⁵Totyanga ntiisa gy'otomanyiridde, Newakubadde okuzikiriza okw'ababi bwe kujjanga:

²⁶Kubanga Mukama ye anaabanga obwesige bwo, Era ye anaakuumanga ekigere kyo olemenga okuwambibwa

²⁷Tommanga birungi abo abagwanira, Bwe kiri mu buyinza bw'omukono gwo okubikola.

²⁸Togambanga muliraanwa wo nti Genda okomewo, Enkya ndikuwa; Bwe kiri naawe.

²⁹Tosaliranga munno bubi, Kubanga abeera gy'oli mirembe

³⁰Toyombanga na muntu awatali nsonga, Oba nga taliiko bubi bw'akukoze.

³¹Tokwatirwanga buggya omusajja ow'amawaggali, So teweerobozanga makubo ge gonna.

³²Kubanga omukyamu wa muzizo eri Mukama: Naye ekyama kye kiri n'abagolokofu.

³³Ekikolimo kya Mukama kiri mu nnyumba ey'omubi: Naye awa omukisa ekifo abatuukirivu mwe babeera.

³⁴Mazima anyooma abanyoomi, Naye awa abeetoowaza ekisa.

³⁵Ab'amagezi balisikira ekitiibwa: Naye ensonyi ze ziriba okukuzibwa okw'abasirusiru.