Engero 8

¹Amagezi tegoogerera waggulu N'okutegeera tekuleeta ddoboozi lyakwo?

²Enguudo we zisibuka mu kkubo Mu masaŋŋanzira we gayimirira;

³Ku mabbali g'emiryango awayingirirwa mu kibuga, Abantu we bayingirira awali enzigi googerera waggulu:

⁴Mmwe abasajja, mbakoowoola; N'eddoboozi lyange liri eri abaana b'abantu.

⁵Mmwe abatalina magezi, mutegeerenga obukabakaba; Nammwe, abasirusiru, mubeerenga n'omutima ogutegeera.

⁶Muwulire, kubanga naayogera ebigambo ebirungi ennyo; N'okwasama emimwa gyange kunaavaamu eby'ensonga.

⁷Kubanga akamwa kange kanaayogera eby'amazima; N'obubi bwa muzizo eri emimwa gyange.

⁸Ebigambo byonna eby'omu kamwa kange biri mu butuukirivu; Mu byo temuli kintu ekikyamakyama newakubadde ekyenyodde.

⁹Byonna byangu eri oyo ategeera, Era bya nsonga eri abo abalaba okumanya.

¹⁰Mukkirize okuyigiriza kwange so si ffeeza; N'okumanya okukira zaabu ennonde.

¹¹Kubanga amagezi gasinga amayinja amatwakaavu; N'ebintu byonna ebiyinzika okwegombebwa tebyenkanyankanyizibwa nago.

¹²Nze amagezi nfudde obukabakaba okuba ennyumba yange Era nnoonya okumanya n'okuteesa.

¹³Okutya Mukama kwe kukyawa obubi; Amalala n'essukuti n'ekkubo ebbi N'akamwa akabambaavu bye nkyawa.

¹⁴Okuteesa kwange n'okumanya okutuufu: Nze ndi kutegeera; nnina amaanyi.

¹⁵Ku bwange bakabaka bafuga, Abalangira ne bateeka eby'obutuukiruvu.

¹⁶Ku bwange abalangira bafuga, N'abakungu, abalamuzi bonna ab'oku nsi:

¹⁷Njagala abo abanjagala; N’abo abanyiikira okunnoonya balindaba.

¹⁸Obugagga n’ekitiibwa biri nange; Wewaawo, obugagga obw’enkalakkalira n’obutuukirivu.

¹⁹Ebibala byange bisinga zaabu obulungi, weewaawo, zaabu ennungi; N'amagoba gange gakira ffeeza ennonde.

²⁰Ntambulira mu kkubo ery'obutuukirivu, Wakati mu mpenda ez'okusala emisango:

²¹Ndyoke mpe abo abanjagala okusikira ebintu, Era njijuze amawanika gaabwe.

²²Mukama yali nange ekkubo lye we lyasookera, Okusooka emirimu gye egy'edda.

²³Nateekebwawo okuva emirembe n'emirembe, okuva ku lubereberye, Ensi nga tennabaawo.

²⁴Nga tewannabaawo buziba, nazaalibwa; Ensulo ezijjudde amazzi nga tezinnabaawo.

²⁵Ensozi nga tezinnaba kussibwawo, Nasooka obusozi okuzaalibwa:

²⁶Ye nga tannatonda nsi newakubadde ennimiro, Newakubadde enfuufu ey'ensi eyasooka.

²⁷Bwe yanyweza eggulu, nze naliyo: Bwe yakulunga amaaso g'obuziba:

²⁸Bwe yanyweza eggulu waggulu: Ensulo ez'ennyanja bwe zaafuuka ez'amaanyi:

²⁹Bwe yawa ennyanja ensalo yaayo, Amazzi galemenga okusobya ekiragiro kye: Bwe yalamba emisingi gy'ensi:

³⁰Kale nze nga ndi awo gy'ali ng'omukoza: Era bulijjo yansanyukiranga, Nga njaguliza bulijjo mu maaso ge;

³¹Nga nsanyukira ensi ye ebeerekamu; N'essanyu lyange lyali n'abaana b'abantu.

³²Kale nno, baana bange, mumpulirenga: Kubanga balina omukisa abakwata amakubo gange.

³³Muwulirenga okuyigirizibwa mubenga n’amagezi, So temugagaananga.

³⁴Alina omukisa omuntu ampulira, Ng'atunuulira bulijjo ku nzigi zange, Ng'alinda awali emifuubeeto gy'enzigi zange.

³⁵Kubanga buli alaba nze alaba bulamu, Era alifuna okuganja eri Mukama.

³⁶Naye oyo annyonoona asobya obulamu bwe ye: Bonna abakyawa nze baagala okufa.