Engero 9

¹Amagezi gazimbye ennyumba yaago, Gatemye empagi zaago musanvu:

²Gasse ensolo zaago; gatabudde omwenge gwago; Era gategese emmeeza yaago.

³Gasindise abawala baago, googerera waggulu. Ku bifo eby'omu kibuga ebisinga obugulumivu,

⁴Nti Buli atalina magezi akyamire muno: Oyo abulwa okutegeera gamugamba nti

⁵Mujje mulye ku mmere yange, Era munywe ku mwenge gwe ntabudde.

⁶Mulekenga, mmwe abatalina magezi, mubeerenga abalamu; Era mutambulirenga mu kkubo ery'okutegeera.

⁷Anenya omukudaazi yeeswaza: N'oyo abuulirira omubi yeetonnyezaako ebbala.

⁸Tobuuliriranga mukudaazi aleme okukukyawa: Buuliriranga ow'amagezi, anaakwagalanga.

⁹Yigirizanga ow'amagezi, aneeyongeranga okuba n'amagezi: Yigirizanga omutuukirivu, aneeyongeranga okuyita.

¹⁰Mu kutya Mukama amagezi mwe gasookera: N'okumanya oyo Omutukuvu kwe kutegeera.

¹¹Kubanga ku bwange ennaku zo ziryongerwa, N’emyaka egy’obulamu bwo girisukkirizibwa.

¹²Oba nga olina amagezi, weebeera n’amagezi wekka: Era bw’onoonyoomanga, kuliba ku ggwe wekka.

¹³Omukazi omusirisiru aleekaana; Talina magezi, so taliiko ky'amanyi.

¹⁴Era atuula ku mulyango gw'ennyumba ye, Ku ntebe mu bifo eby'omu kibuga ebigulumivu,

¹⁵Okuyita abo abayitawo, Abakwatira ddala amakubo gaabwe,

¹⁶Nti Buli atalina magezi akyamire muno: N'oyo abulwa okutegeera amugamba nti

¹⁷Amazzi amabbe ge gawooma, N'emmere eriirwa mu kyama ye esanyusa.

¹⁸Naye tamanyi ng'abafu bali eyo: Ng'abagenyi be bali mu buziba bw'emagombe.