Zabbuli 109

¹Tosirika, ai Katonda gwe ntendereza;

²Kubanga akamwa k'ababi n'akamwa k'obulimba bakanjasamidde: Boogedde nange n'olulimi olulimba.

³Era banneetooloola n'ebigambo eby'okukyawa, Ne balwana nange awatali nsonga.

⁴Olw'okwagala kwange bafuuse balabe bange: Naye nze nsaba.

⁵Era bansasudde obubi olw'obulungi, N'okukyawa olw'okwagala kwange.

⁶Omusseeko omuntu omubi: Omulabe ayimirirenga ku mukono gwe ogwa ddyo.

⁷Bw'asalirwa omusango, afulume nga gumusinze; Era okusaba kwe kufuuke ekibi.

⁸Ennaku ze zibe ntono; Omulala alye obukulu bwe.

⁹Abaana be babe nga tebalina kitaabwe, Ne mukazi we nnamwandu.

¹⁰Abaana be babe mmomboze, basabirizenga; Banoonyenga emmere mu bifo byabwe ebyazika.

¹¹Omunyazi atege byonna by'alina; B'atamanyi banyageenyage emirimu gye.

¹²Anaamwongerako ekisa amubule; Anaasaasira abaana be nga tebalina kitaabwe naye abule.

¹³Ezzadde lye lizikirizibwe; Mu mirembe egirijja amannya gaabwe gasaangulibwe.

¹⁴Obutali butuukirivu bwa bajjajjaabe bujjukirwe eri Mukama: So ekibi kya nnyina kireme okusangulibwa.

¹⁵Bibeerenga mu maaso ga Mukama ennaku zonna, Azikirize okujjukirwa kwabwe ku nsi.

¹⁶Kubanga teyajjukira kusaasira, Naye n'ayigganya omuntu omwavu eyeetaaga, N'oyo eyalina omutima ogumenyese, okubatta.

¹⁷Weewaawo, yayagala okukolima, ne kutuuka gy'ali; So teyasanyukira kusaba mukisa, ne gumuba wala.

¹⁸Era yayambala okukolima ng'ekyambalo kye, Ne kuyingira mu nda ye ng'amazzi, Era ng'amafuta mu magumba ge.

¹⁹Kubenga gy'ali ng'ekyambalo ky'ayambala, Era kubenga ng'olukoba lwe yeesiba ennaku zonna.

²⁰Eyo ye mpeera ey'abalabe bange eva eri Mukama, N'abo aboogera obubi ku mmeeme yange.

²¹Naye olongoose ebyange, ai Katonda Mukama, olw'erinnya lyo: Kubanga okusaasira kwo kulungi, omponye.

²²Kubanga nze ndi mwavu, nneetaga, N'omutima gwange gufumitiddwa munda yange.

²³ŋŋendedde ddala ng'ekisiikirize bwe kiggwaawo: Nkuŋŋunta ng'enzige.

²⁴Amaviivi gange ganafuwadde olw'okusiiba; N'omubiri gwange guweebuuse obutagejja.

²⁵Era nfuuse ekivume gye bali: Bwe bandaba, banyeenya omutwe gwabwe.

²⁶Onnyambe, ai Mukama Katonda wange; Nkwegayiridde ondokole ng'okusaasira kwo bwe kuli.

²⁷Balyoke bategeere ng'ogwo gwe mukono gwo: Nga ggwe, Mukama, wakikola.

²⁸Bo bakolime, naye ggwe ompe omukisa: Bwe baligolokoka, balikwatibwa ensonyi, naye omuddu wo alisanyuka.

²⁹Abalabe bange bambale okuswazibwa, Era beebikke ensonyi zaabwe ng'ekikunta.

³⁰Neebazanga nnyo Mukama n'akamwa kange; Weewaawo, naamutenderezanga mu kibiina.

³¹Kubanga anaayimiriranga ku mukono ogwa ddyo ogw'omwavu, Okumulokola eri abo abasalira omusango emmeeme ye.