Zabbuli 108

¹Omutima gwange gunywedde, ai Katonda; Naayimba, weewaawo, naayimba okutendereza, naayimba n'ekitiibwa kyange.

²Muzuukuke, mmwe amadinda n'ennanga: Nze naakeera nnyo okuzuukuka.

³Naakwebazanga ggwe, ai Mukama, mu mawanga: Era naayimbanga okukutendereza mu bantu.

⁴Kubanga okusaasira kwo kungi, kusinga eggulu: N'amazima go gatuuka mu ggulu.

⁵Ogulumizibwe, ai Katonda, okusinga eggulu: N'ekitiibwa kyo okusinga ensi zonna.

⁶Muganzi wo alyoke awone, Olokole n'omukono gwo ogwa ddyo, otuddemu.

⁷Katonda yayogera mu butukuvu bwe nti Ndijaguza: Ndisala mu Sekemu, era ndigabaagaba ekiwonvu ekya Sukkosi.

⁸Gireyaadi wange; Manase wange; Efulayimu naye yakuuma omutwe gwange; Yuda gwe muggo gwange ogw'obwakabaka.

⁹Mowaabu kye kinaabirwamu kyange; Edomu ndimukasukira engatto Yange Ndyogerera waggulu ku Firisutiya.

¹⁰Ani alinnyingiza mu kibuga eky'amaanyi? Ani eyandeeta mu Edomu?

¹¹Totusudde, ai Katonda? So totabaala, ai Katonda, n'eggye lyaffe.

¹²Otuyambe eri omulabe: Kubanga obuyambi bw'abantu tebuliimu.

¹³Katonda ye alitukoza eby'obuzira: Kubanga oyo ye alinnyirira ku balabe baffe.