Zabbuli 115

¹Si ffe, ai Mukama, si ffe, Wabula erinnya lyo lye ligwana okuweebwa ekitiibwa Olw'okusaasira kwo, n'olw'amazima go.

²Kiki ekinaaba kiboogeza ab'amawanga Nti Katonda waabwe ali ludda wa kaakano?

³Naye Katonda waffe ali mu ggulu: Akoze bye yayagala byonna.

⁴Ebifaananyi byabwe ye ffeeza, ye zaabu, Omulimu ogw'emikono gy'abantu.

⁵Birina obumwa, naye tebyogera; Birina amaaso, naye tebiraba;

⁶Birina amatu, naye tebiwulira; Birina ennyindo, naye tebiwunyiriza;

⁷Birina engalo, naye tebizikwasa kintu; Birina ebigere, naye tebitambula; So tebyogeza bulago bwabyo.

⁸Ababikola balibifaanana; Weewaawo, buli abyesiga.

⁹Ggwe Isiraeri, mwesigenga Mukama: Ye mubeezi waabwe, ye ngabo yaabwe.

¹⁰Ggwe ennyumba ya Alooni, mwesigenga Mukama: Ye mubeezi waabwe, ye ngabo yaabwe.

¹¹Mmwe abatya Mukama, mwesigenga Mukama: Ye mubeezi waabwe, ye ngabo yaabwe.

¹²Mukama atujjukidde; alituwa omukisa; Aliwa omukisa ennyumba ya Isiraeri; Aliwa omukisa ennyumba ya Alooni.

¹³Aliwa omukisa abo abatya Mukama, Abato era n'abakulu.

¹⁴Mukama ayongerenga bulijjo okubaaza Mmwe n'abaana bammwe.

¹⁵Mmwe muweereddwa Mukama omukisa, Eyakola eggulu n'ensi.

¹⁶Eggulu lye ggulu lya Mukama; Naye ensi yagiwa abaana b'abantu.

¹⁷Abafu tebatendereza Mukama, Newakubadde abo bonna abakka mu kusirika;

¹⁸Naye ffe tuneebazanga Mukama Okuva leero okutuusa emirembe gyonna. Mumutendereze Mukama.